ەلورداداعى «جاستار» سارايىندا «ستۋدەنتتىك ءوزىن-ءوزى باسقارۋ» جوباسى اياسىندا وتكەن بايقاۋدىڭ جەڭىمپازدارى ماراپاتتالدى، دەپ حابارلادى قالا اكىمدىگىنىڭ رەسمي سايتى.

«استانا جاستارى» جاستار رەسۋرستىق ورتالىعى ۇيىمداستىرعان ماراپاتتاۋ ءراسىمى باستالعانعا دەيىن زاماناۋي بي، حالىق ءبيى، ۇلتتىق اسپاپتاردا ويناۋ جانە ۆوكال سياقتى نوميناتسيالار بويىنشا بايقاۋلار ءوتتى. اتالمىش ءىس-شاراعا ەلوردالىق جوو ستۋدەنتتەرى بەلسەنە قاتىستى.

«مۇنداي ءىس-شارالار جاستاردىڭ ءوزارا قارىم-قاتىناسىن نىعايتىپ، نەتۆوركينگ ورناتۋىنا جانە كوشباسشىلىق قاسيەتتەرىن تانىتۋىنا ىقپال ەتەدى. سونداي-اق، ولاردىڭ سپورتقا، بەلسەندى ءومىر سالتىنا دەگەن قىزىعۋشىلىعى ارتاتىن بولادى. وسىلايشا تۇراقتى نەگىزدە ۇيىمداستىرىلاتىن ءىس-شارالار ارقىلى ەلوردالىق جاستارعا ءجيى باس قوسىپ، جاڭا يدەيالاردى ورتاعا تاستاپ، ونى جۇزەگە اسىرۋدا بىرلەسە ءىس-ارەكەت ىستەۋگە، سولايشا دامي تۇسۋگە جول اشىلماق»، - دەدى استانا قالاسىنىڭ ءماسليحات دەپۋتاتى ارسلانبەك ماعزۇم.

شىعارماشىلىق بايقاۋلار اياقتالعان سوڭ جەڭىمپازداردى سالتاناتتى ماراپاتتاۋ ءساتى باستالدى.

«ءىس-شارانىڭ نەگىزگى ماقساتى – استانا جاستارىن بىرىكتىرۋ. مۇندا ەلوردالىق ستۋدەنتتەر وزدەرىن تانىتىپ قانا قويمايدى، سونىمەن بىرگە وقۋ ورىندارىنىڭ ابىرويىن اسقاقتاتۋعا ۇلەس قوسادى. ماراپاتتاۋ ءراسىمى ءوز دەڭگەيىندە ءوتتى دەپ ويلايمىن. بارلىق جەڭىمپاز العىس حاتتار مەن قارجىلاي سىيلىقتار، ال سپورتشىلار كۋبوكتار مەن مەدالدارعا يە بولدى»، - دەدى «استانا جاستارى» جاستار رەسۋرستىق ورتالىعىنىڭ قىزمەتكەرى كاميللا مۇقاتاەۆا.

جەڭىمپازداردى اتاپ ايتساق، فۋتبولدان جانە ۆولەيبولدان APEMS كومانداسى، تەننيستەن ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى، باسكەتبولدان س.سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتى ستۋدەنتتەرى 1-ورىندى جەڭىپ الدى. ال اسپاپتاردا ويناۋ مەن ۆوكال بويىنشا قازاق ۇلتتىق ونەر ۋنيۆەرسيتەتى، زامانۋي بيدەن Esil University, حالىق بيىنەن Astana international university ستۋدەنتتەرى 1-ورىندى يەلەندى.

Abai.kz