جاڭا جىل قارساڭىندا باعانى ۇستاپ تۇرۋ ءۇشىن ايماقتارداعى تۇراقتاندىرۋ قورلارىنان ونىمدەر الۋ باستالدى. بۇل تۋرالى ۇكىمەتتىڭ ءباسپاسوز قىزمەتى ءمالىم ەتتى.

پرەمەر-ءمينيستردىڭ ورىنباسارى سەرىك جۇمانعاريننىڭ توراعالىعىمەن وتكەن ۇكىمەتتەگى كەڭەستە 11 ايداعى ينفلياتسيا قورىتىندىلارى مەن 2024 جىلعى بولجامدار قارالدى.

ۇلتتىق ستاتيستيكا بيۋروسىنىڭ مالىمەتى بويىنشا، قاراشا ايىندا ازىق-تۇلىك ەمەس تاۋارلاردىڭ باعا يندەكسى 0,7%، اقىلى قىزمەتتەردىڭ باعا يندەكسى — 0,8%، ازىق-تۇلىك ونىمدەرى — 1,1% بولدى.

اقىلى قىزمەتتەردىڭ ءوسۋىنىڭ باياۋلاۋى بايقالادى، ولار 2024 جىلى «ءتاريفتى ينۆەستيتسياعا ايىرباستاۋ» باعدارلاماسىنىڭ باستالۋىنا بايلانىستى ەڭ جوعارى ءوسىمدى كورسەتتى (جىلدىق ماندە 13,3%).

ازىق-تۇلىك ينفلياتسياسىن تەجەۋ ءۇشىن ايماقتاردا كوكونىس قورلارى پايدالانىلا باستادى. اۋىل شارۋاشىلىعى مينيسترلىگىنىڭ مالىمەتىنشە، 159,6 مىڭ توننا كوكونىس قورىنىڭ 13,4 مىڭ تونناسى ساتىلدى. ەڭ كوپ ساتىلعانى — كارتوپ (7,2 مىڭ توننا), ءسابىز — 2,1 مىڭ توننا، پياز — 2,2 مىڭ توننا، قىرىققابات — 1,7 مىڭ توننا.

سەرىك جۇمانعارين اۋىل شارۋاشىلىعى مينيسترلىگىنە ايماقتارمەن بىرلەسىپ، نەگىزگى ازىق-تۇلىك ونىمدەرىنىڭ، سونىڭ ىشىندە جىلىجايدا وسىرىلگەن كوكونىستەردىڭ باعاسىن تۇراقتاندىرىپ، جاڭا جىل قارساڭىندا ولاردىڭ جەتكىلىكتى مولشەردە ساۋدا سورەلەرىندە بولۋىن قامتاماسىز ەتۋدى تاپسىردى.

تۇراقتاندىرۋ قورلارىندا وسى ۋاقىتقا دەيىن جيناقتالعان ازىق-تۇلىك قورىن ءوڭىر نارىقتارىنا جەتكىزۋ جانە ونى اۋىل شارۋاشىلىعى جارمەڭكەلەرى ارقىلى ساتىلىمعا شىعارۋ تۇرعىنداردى جەتكىلىكتى مولشەردە قامتاماسىز ەتۋگە ءارى كوكونىس جانە باسقا ونىمدەردى قولجەتىمدى باعادا ساتۋعا مۇمكىندىك بەرەدى. بۇل شارالار جاڭا جىل الدىنداعى نەگىزگى ازىق-تۇلىك ونىمدەرى باعاسىنىڭ كۇرت ءوسۋىن تەجەۋگە باعىتتالعان.

Abai.kz