جەڭىلىس سەبەپتەرىنىڭ ءبىرى ۋكرايناعا جاپپاي شابۋىل جاساۋ بولدى. سيرياداعى باشار اساد رەجيمىنىڭ قۇلاۋى كرەمل بيلەۋشىسى پۋتينگە بيلىكتەگى كەزىندەگى ەڭ ۇلكەن گەوساياسي ساتسىزدىكتەردىڭ ءبىرى بولدى.

The New York Times جازعانداي، وپپوزيتسيالىق كۇشتەردىڭ شابۋىلى رەسەيدى «پاتشا جاساۋشىدان» باقىلاۋشىعا اينالدىردى. ساراپشىلاردىڭ پايىمداۋىنشا، ماسكەۋدىڭ سيرياداعى جەڭىلىسى ونىڭ وككۋپاتسيالىق كۇشتەرى ۋكرايناعا قارسى سوعىستا باتىپ كەتكەندىكتەن مۇمكىن بولدى.

ولاردىڭ پىكىرىنشە، ەندى ماسكەۋ جاڭا ۇكىمەتپەن تارتۋستاعى اسكەري-تەڭىز بازاسى مەن حمەيميم اۋە بازاسىن ساقتاپ قالۋعا مۇمكىندىك بەرەتىن كەلىسىمگە كەلە الا ما، جوق پا، بۇل باستى ماسەلە. رەسەيلىك ساراپشى انتون مارداسوۆ بۇعان سەنىمدى ەمەس، ويتكەنى رەسەي فەدەراتسياسى بۇل نىسانداردى وپپوزيتسيالىق كۇشتەرگە اۋە شابۋىلدارى ءۇشىن پايدالانعان.

كارنەگي قورىنىڭ رەسەي جانە ەۋرازيا باعدارلاماسىنىڭ ديرەكتورى يۋدجين رۋمەر كوتەرىلىسشىلەردىڭ جەڭىسىن ۋكرايناداعى سوعىس ءۇشىن كرەمل تولەپ وتىرعان «قۇننىڭ ءبىر بولىگى» دەپ اتادى: «سيريا - ولاردىڭ تاياۋ شىعىس پەن جەرورتا تەڭىزىندەگى جالعىز ناقتى تىرەگى. رەسەي تاياۋ شىعىستاعى ەڭ كونە كليەنتىن جاساقشىلار باندىسىنان قۇتقارا الماسا، سەرىكتەس رەتىندە نە پايدا؟ بۇل وپەراتسيالىق ساتسىزدىكپەن قاتار، ديپلوماتيالىق جانە بەدەلگە دە سوققى بولىپ تابىلادى».

امەريكالىق شەنەۋنىكتەردىڭ ءبىرى جۋرناليستەرگە رەسەي ۋكرايناعا قارسى سوعىستا قولدانۋ ءۇشىن سيريادان كوپتەگەن اسكەري ۇشاقتارىن شىعارعانىن ايتتى. ال قارا تەڭىزدەن كەلگەن رەسەيلىك كەمەلەرى جەرورتا تەڭىزىنە وتە المايتىن ەدى، ويتكەنى تۇركيا جاپپاي باسىپ الۋدىڭ باسىندا بۇعازداردى جاۋىپ تاستادى.

مارداسوۆتىڭ ايتۋىنشا، سيريا رەسەيلىك اسكەرلەر ءۇشىن «كۋرورت» جانە تۇككە تۇرعىسىز رەسەيلىك گەنەرالدار ءۇشىن دەمالاتىن ورنى بولدى. سونىمەن قاتار، ەۆگەني پريگوجين كوتەرىلىسىنەن كەيىن «ۆاگنەر» جەكە اسكەري كومپانياسىنىڭ جاۋىنگەرلەرى وسى ەلدەگى وپەراتسيالارىن اياقتادى.

ەستەرىڭىزگە سالا كەتەيىك، اقش-تىڭ قازىرگى پرەزيدەنتى دجو بايدەن بۇل وقيعا سيريا حالقى ءۇشىن ىرگەلى ادىلەت اكتىسى بولىپ تابىلادى، بىراق بەلگىلى ءبىر تاۋەكەلدەردى ۇمىتپاۋ كەرەك دەدى. ال جاڭادان سايلانعان امەريكا باسشىسى دونالد ترامپ رەسەي مەن پۋتين ەندى اسادتى قورعاۋعا مۇددەلى ەمەس، ويتكەنى ولاردىڭ باسىمدىعى ۋكرايناعا قارسى سوعىس ەكەنىن ايتتى.

كەرىمسال جۇباتقانوۆ،

تاريح عىلىمدارىنىڭ كانديداتى، س. سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىنىڭ دوتسەنتى

Abai.kz