«ءححى عاسىرداعى الاشتىڭ اق جولى» جالپىۇلتتىق بايقاۋىنىڭ قورىتىندى كەزەڭى قاراعاندى قالاسى قر ىشكى ىستەر مينيسترلىگى بارىمبەك بەيسەنوۆ اتىنداعى قاراعاندى اكادەمياسىندا ءوتتى.

جالپىۇلتتىق بايقاۋعا قر پارلامەنتى ماجىلىسىندەگى «اق جول» فراكتسياسىنىڭ اپپارات جەتەكشىسى بەرىك دۇيسەمبينوۆ، قر پارلامەنتى ءماجىلىسىنىڭ دەپۋتاتى سەرىك ەرۋباەۆ، قر ءىىم ب.بەيسەنوۆ اتىنداعى قاراعاندى اكادەمياسىنىڭ باستىعى، پوليتسيا پولكوۆنيگى نۇرلان بيەكەنوۆ، پارتيانىڭ ءماسليحات دەپۋتاتتارى قاتىستى. ال بايقاۋعا قازىلار القاسىندا  قر ۇعا اكادەميگى، الاشتانۋشى ديحان قامزابەكۇلى، ل.ن.گۋميلەۆ اتىنداعى ەۇۋ «الاش» ينستيتۋتىنىڭ ديرەكتورى، ف.ع.ك.، سۇلتان حان اققۇلۇلى، PHD دوكتور، MNU Adjunct Assistant پروفەسسورى الما سايلاۋقىزى قاتىسسا، مودەراتور رەتىندە ەۇۋ قازاق كافەدراسىنىڭ مەڭگەرۋشىسى، ف.ع.ك.، الاشتانۋشى قايىربەك كەمەڭگەر جۇرگىزدى.

Cۋرەت: "اق جول" دەمپارتياسىنىڭ رەسمي سايتىنان الىندى.

«بىرىنشىدەن، ءبىز تاريحشى ەمەسپىز، بىراق بۇگىنگى ساياساتىمىز ءۇشىن، تاجىريبەلىك قاجەتتىكتەرىمىز ءۇشىن جاڭا يدەيا مەن ۇسىنىستار كەرەك. ۇلتتىق يدەولوگيا – كەز كەلگەن مەملەكەتتىڭ تىرەگى، ول حالىق پەن مەملەكەت اراسىنداعى التىن كوپىر ىسپەتتى. قازاق ەلى ءۇشىن الاشتان اسقان، الاشتان وزگە ۇلتتىق يدەيا جوق.

الاش – قاتىپ قالعان دوگما ەمەس، الاش – يدەيا. ال يدەيا – ءتىرى دۇنيە، ول ۇنەمى دامىپ، تەرەڭدەپ، كەڭەيىپ وتىرۋى كەرەك. ءبىزدىڭ بايقاۋ – ءدال وسى الاش يدەياسىن جاڭعىرتۋعا ارنالعان باستاما. بايقاۋعا قاتىسۋشىلاردىڭ ارقايسىسى وسى يدەيانىڭ دامۋىنا ءوز ۇلەستەرىن قوسىپ جاتىر.

ەكىنشىدەن، بايقاۋ بيىل 13-ءشى رەت ۇيىمداستىرىلدى. بيىل رەكوردتىق كورسەتكىش – 250-دەن استام جۇمىس كەلىپ ءتۇستى. بۇل – 250-دەن استام جاس ستۋدەنت پەن ماماننىڭ قاتىسقانىن كورسەتەدى. بايقاۋدىڭ ەكى ىرىكتەۋ كەزەڭى ءوتتى، ال قورىتىندى كەزەڭدە وتە جوعارى دەڭگەيدە پىكىر الماسۋ جانە ساپالى باياندامالار جاسالدى.  اسىرەسە، ەكونوميكا جاعىنان ماعان پىكىر الماسۋ مەن باياندامالار وتە ۇنادى»،- دەدى  ءماجىلىس دەپۋتاتى ازات پەرۋاشەۆ.

Cۋرەت: "اق جول" دەمپارتياسىنىڭ رەسمي سايتىنان الىندى.

الاش يدەياسى - قازاق ەلىنىڭ تەك تاريحى ەمەس، سونىمەن قاتار ول - ءبىزدىڭ بۇگىنگىمىز جانە بولاشاعىمىز دا.  ءبىزدىڭ ماقساتىمىز - ونى تەك قازىرگى ۋاقىتىنا ساي كەلتىرۋ عانا ەمەس، ونىڭ الدىن الۋ. ءححى عاسىردا ەلىمىز تاعى قانداي جاعدايلارعا كەلۋى مۇمكىن، قانداي جاعدايعا جاۋاپ ىزدەستىرۋى كەرەك؟ الاش يدەياسى سوعان دا ءتيىستى جاۋاپ بەرۋى كەرەك.

ىرىكتەۋ كەزەڭىنىڭ ناتيجەلەرى مىناداي:

«الاش» قايراتكەرلەرىنىڭ الاش رەسپۋبليكاسىنىڭ مەملەكەتتىك قۇرىلىمى تۋرالى يدەياسى جانە ونىڭ قازىرگى قازاقستان ءۇشىن وزەكتىلىگى» نوميناتسياسى بويىنشا:

I  ورىن - ەلنۇر اسكەنۇلى – جامبىل وبلىسى، قورداي مەكتەپ-ليتسەيىنىڭ مۇعالىمى

II ورىن - دارىن جاھانگەر – ءال-فارابي اتىنداعى كازۇۋ ستۋدەنتى (الماتى ق.)

||| ورىن - موناي قۇلىنتاي – قاراعاندى اكادەمياسىنىڭ اعا عىلىمي قىزمەتكەرى.

الاش قايراتكەرلەرىنىڭ وقۋ-اعارتۋ مەن عىلىمداعى ۇستانىمى جانە ونىڭ قازىرگى قازاقستان ءۇشىن ماڭىزى» نوميناتسياسى بويىنشا:

| ورىن - گۇلزات  شىنتاسوۆا – قىزىلوردا زياتكەرلىك مەكتەبىنىڭ مۇعالىمى

|| ورىن - زارينا ەمبەرگەن – جەتىسۋ ۋنيۆەرسيتەتىنىڭ  ستۋدەنتى (تالدىقورعان)

||| ورىن - ەلامان قادىلاشىم – «Aiqara.kz» اقپاراتتىق اگەنتتىگىنىڭ رەداكتورى (پاۆلودار)

«الاش قايراتكەرلەرىنىڭ ەكونوميكالىق كوزقاراسى جانە كاسىپكەرلىكتى دامىتۋ» نوميناتسياسى بويىنشا:

| ورىن - قاراقات ماحمۇدوۆا – ەۋرازيا ۇلتتىق ۋنيۆەرسيتەتىنىڭ ستۋدەنتى (استانا ق.)

|| ورىن - قانات قويانباەۆ – كوكشەتاۋ ۋنيۆەرسيتەتىنىڭ ستۋدەنتى

||| ورىن - دامير يسيرگەنوۆ – قوستاناي زياتكەرلىك مەكتەبىنىڭ مۇعالىمى

||| ورىن - لاتيفا مىڭجاساروۆا - ەۋرازيا ۇلتتىق ۋنيۆەرسيتەتىنىڭ ستۋدەنتى (استانا ق.)

«الاش» رەسپۋبليكاسى – الدىڭعى قازاق مەملەكەتتەرى (كونە تۇركى قاعاناتارى، ۇلىق ۇلىس، التىن وردا، قازاق حاندىعى) مەن قازىرگى تاۋەلسىز قازاق ەلىنىڭ زاڭنامالىق ساباقتاستىعىن جالعايتىن كوپىر نوميناتسياسى بويىنشا:

| ورىن - سىمبات كوشەرباەۆا – استانا حالىقارالىق ۋنيۆەرسيتەتىنىڭ ستۋدەنتى

|| ورىن - قانات بەرداليەۆ – تاراز قالاسى، № 8 گيمنازياسىنىڭ مۇعالىمى

||| ورىن - دينارا ەرحانقىزى – قىزىلوردا ۋنيۆەرسيتەتىنىڭ ستۋدەنتى.

Abai.kz