الگىندە پاريجدە اقش-تىڭ جاڭا سايلانعان پرەزيدەنتى ترامپ پەن ۋكراينا پرەزيدەنتى زەلەنسكي ءھام فرانتسيا پرەزيدەنتى ماكرون ۇشجاقتى كەزدەسۋ وتكىزگەنىن بىلەسىزدەر. بۇل كەزدەسۋدى پرەزيدەنت ماكرون ۇيىمداستىرىپ، تاراپتار رەسەي-ۋكراينا سوعىسىن كەلىسسوز ارقىلى رەتتەۋ جونىندە پىكىر الماسقان.

«Reuters» اگەنتتىگى جۋىردا اتالعان كەزدەسۋگە قاتىستى ءبىرسىپىرا اقپاراتتاردى ساراپ قىلىپتى. اگەنتتىك دەرەگىنشە، اتالعان كەزدەسۋدە ماكرون مەن زەلەنسكي «ءبىراۋىزدى» بولعان، بىراق ترامپتى «وزەككە تەپپەۋگە» تىرىسقان. ال ترامپ ءوزىن «دوستىق قۇرمەتپەن ەمىن-ەركىن» ۇستاپ، از سويلەپ، كوپ تىڭداعان. ترامپقا جاقىن بىرنەشە دەرەككوزدىڭ ايتۋىنشا، ترامپ ودان ءارى قالاي ارەكەت ەتۋ كەرەكتىگىن شەشۋ ءۇشىن ءوزارا تۇسىنىستىك ورناتۋعا ۇمتىلعان.
ترامپ، زەلەنسكي مەن ماكرون 35 مينۋت بويى كەڭەسشىلەرسىز سويلەسكەن. ولار رەسەي-ۋكراينا سوعىسىن بەيبىت جولمەن رەتتەۋدىڭ ناقتى ماسەلەلەرىن تالقىلاماعان. بىراق ترامپ وق اتۋدى دەرەۋ ارادا توقتاتۋدى جانە كەلىسسوزدەر جۇرگىزۋدى قولدايتىنىن قايتالاپ ايتقان.

«كەزدەسۋ بارىسىندا كەيبىر ءتۇيىندى جايتتار تالقىلانعان. مىسالى، بەيبىتشىلىك ءۇشىن ۋكرايناعا كەپىلدىكتەر قاجەت، سەبەبى سوعىستى ۋاقىتشا توقتاتۋ جەتكىلىكسىز. پۋتين بۇل ءۇزىلىستى بۇرىنعىداي ءاپ-ساتتە بۇزۋى مۇمكىن»، - دەپ جازادى «Reuters» اگەنتتىگى.

ماكرون مەن زەلەنسكي كەزدەسۋ بارىسىندا ءوز كوزقاراستارىن ءبىلدىرىپ، اقش قولداۋىنسىز كيەۆكە وتە قيىن بولاتىنىن ايتقان.

ۋكراينا پرەزيدەنتىنە جاقىن شەنەۋنىك «Reuters» اگەنتتىگىنە پىكىر ءبىلدىرىپ: «پرەزيدەنت زەلەنسكي: «پۋتين حالىقارالىق ارەنادا تەك ترامپتان جانە قىتايدان عانا قورقادى»، دەپ بەكەر ايتقان جوق. سوندىقتان بەرىك بەيبىتشىلىككە قول جەتكىزۋ ءۇشىن ۆاشينگتون «شىنىمەن دە كۇشتى» بولۋى ءتيىس»، - دەيدى.

ماكرون مەن زەلەنسكي اتالعان كەزدەسۋدە ترامپقا: «2024 جىلعى پۋتين 2017 جىلداعىداي كۇشتى ەمەس»، - دەپ ايتقان.

بۇعان دەيىن دونالد ترامپ پاريجدە وتكەن كەلىسسوزدەردەن كەيىن، رەسەي-ۋكراينا سوعىسىن توقتاتۋ تۋرالى كەلىسسوزدەردى باستاۋعا شاقىرعان بولاتىن.

كرەمل: «رەسەيدە كەلىسسوزدەرگە جول اشىق»، - دەپ جاۋاپ بەردى، بىراق ول ءۇشىن ۆلاديمير زەلەنسكي ۋكرايناداعى رەسەي باسشىلىعىمەن كەز كەلگەن بايلانىسقا سالىنعان تىيىمدى الىپ تاستاۋى ءتيىس.

ترامپ پاريجدەگى كەزدەسۋدىڭ قورىتىندىسىنا تۇسىنىكتەمە بەرە وتىرىپ، «New York Post» گازەتىنە بەرگەن سۇحباتىندا زەلەنسكي «بەيبىتشىلىككە دايىن» ەكەنىن ايتىپ: «پۋتين جەڭىلىپ قالدى»، - دەپ سويلەگەن.

ءابىل-سەرىك الىاكبار

Abai.kz