تاۋەلسىزدىك كۇنى قارساڭىندا «اۋىل اماناتى» جوباسىنا قاتىسۋشىلار اراسىنداعى ۇزدىك شارۋاشىلىققا ارنالعان رەسپۋبليكالىق كونكۋرس قورىتىندىلاندى. ءىس-شاراعا ءماجىلىس سپيكەرى، «AMANAT» پارتياسىنىڭ توراعاسى ەرلان قوشانوۆ، پرەمەر-ءمينيستردىڭ ورىنباسارى تامارا دۇيسەنوۆا، پرەمەر-ءمينيستردىڭ كەڭەسشىسى ەرالى توعجانوۆ، قىزىلوردا وبلىسىنىڭ اكىمى نۇرلىبەك نالىباەۆ جانە تاعى باسقالار قاتىستى.

ءوز سوزىندە ەرلان قوشانوۆ وسى كۇنى حالىقتىڭ شامامەن 40%-ى اۋىلدىق جەرلەردە تۇراتىنىن، سوندىقتان پرەزيدەنت قاسىم-جومارت توقاەۆ ءوزىنىڭ سايلاۋالدى باعدارلاماسىندا اۋىل تۇرعىندارىنىڭ تۇرمىس جاعدايىن جاقسارتۋ جانە ءال-اۋقاتىن ارتتىرۋ ماسەلەسىنە ەرەكشە نازار اۋدارعانىن اتاپ ءوتتى.

سۋرەتتى تۇسىرگەن: ءالي عالىم.

«مەملەكەت باسشىسىنىڭ تاپسىرماسى بويىنشا «AMANAT» پارتياسى ەل يگىلىگى ءۇشىن بەلسەندى جۇمىس ىستەپ جاتقان «اۋىل اماناتى» جوباسىن ىسكە قوستى. بيىل ءبىزدىڭ پارتيا جوباعا قاتىسۋشىلار اراسىنداعى ۇزدىك شارۋاشىلىقتار مەن كووپەراتيۆتەردى جۇرتقا كورسەتۋ ءۇشىن ارنايى كونكۋرس وتكىزدى. ولاردىڭ تاجىريبەسى بولاشاقتا «اۋىل اماناتى» جوباسىن جەتىلدىرۋ ءۇشىن پايدالانىلادى. پرەزيدەنت ايتقانداي، جاھاندانۋ داۋىرىندە حالىقتى ساقتاۋ ءۇشىن، ەڭ الدىمەن، اۋىلدى ساقتاۋىمىز كەرەك. سوندىقتان كونكۋرس اياسىندا ءبىز اۋىل ومىرىنە ەرەكشە نازار اۋدارۋدى كوزدەدىك. اۋىل – ءبىزدىڭ التىن بەسىگىمىز، مادەنيەتىمىزدىڭ، ءداستۇرىمىزدىڭ جانە رۋحاني ءومىرىمىزدىڭ سارقىلماس قاينارى. اۋىلعا دەگەن قامقورلىق – ارقايسىمىزدىڭ وتكەنگە، بۇگىنگە جانە بولاشاققا دەگەن قامقورلىعىمىز»، – دەدى ول.

سونىمەن قاتار، ەرلان قوشانوۆ مەملەكەت تاراپىنان جۇيەلى نازار اۋدارۋدى تالاپ ەتەتىن بىرقاتار وزەكتى ماسەلەنى اتاپ ءوتتى. بۇل اۋىلداردىڭ ينفراقۇرىلىمىن دامىتۋ، اۋىل تۇرعىندارى ءۇشىن كەپىلسىز «تاۋارلىق نەسيە» ەنگىزۋ، اۋىلدىق وكرۋگتەر بيۋدجەتىنىڭ كىرىس بازاسىن ارتتىرۋ جانە تاعى باسقالار.

سۋرەتتى تۇسىرگەن: ءالي عالىم.

ءوز كەزەگىندە، ۆيتسە-پرەمەر تامارا دۇيسەنوۆا «اۋىل اماناتى» جوباسى ىسكە قوسىلعان ساتتەن باستاپ 16 مىڭعا جۋىق اۋىل تۇرعىنى جەكە كاسىبىن باستاۋ ءۇشىن 2,5% جەڭىلدىكپەن شاعىن نەسيە العانىن، بۇل 17 مىڭنان استام جۇمىس ورنىن قۇرۋعا مۇمكىندىك بەرگەنىن ايتتى. سونداي-اق ول قازىر شاعىن نەسيە الۋشىلار وندىرەتىن ءونىمدى وتكىزۋدى جولعا قويۋعا ەرەكشە نازار اۋدارۋ كەرەك ەكەنىن اتاپ ءوتتى.

ال پرەمەر-ءمينيستردىڭ كەڭەسشىسى ەرالى توعجانوۆ جوبا اۋىلداعى جۇمىسسىزدىق دەڭگەيىن ايتارلىقتاي تومەندەتۋگە ارنالعانىن اتاپ ءوتتى. سوندىقتان جوبانىڭ بارلىق ارتىقشىلىعى تۋرالى تۇرعىنداردى دۇرىس اقپاراتتاندىرۋ ماڭىزدى. ول ەلىمىزدىڭ بارلىق وڭىرىنەن بايقاۋعا قاتىسۋ ءۇشىن 250-دەن استام ءوتىنىم كەلىپ تۇسكەنىن اتاپ ءوتتى. قازىلار القاسىنىڭ شەشىمىمەن 30 ءوتىنىم 10 نوميناتسيا بويىنشا جۇلدەلى ورىندارعا يە بولدى.

ماسەلەن، باتىس قازاقستان وبلىسى قوسكول اۋىلىنىڭ تۇرعىنى دامير قادىروۆ «ۇزدىك كووپەراتيۆ» نوميناتسياسىن جەڭىپ الدى. «ۇزدىك جقش» نوميناتسياسى بويىنشا ءبىرىنشى ورىن ماڭعىستاۋ وبلىسى اقشۇقىر اۋىلىنان الەكساندرا گريگولوۆاعا بۇيىردى. اقتوبە وبلىسى سارجاناي اۋىلىنىڭ اكىمى مەدەت بەكجانوۆ ۇزدىك اۋىل اكىمى اتاندى. «ۇزدىك تاۋار كرەديتورى» نوميناتسياسىندا اقتوبە وبلىسى بايقادام اۋىلىنىڭ تۇرعىنى ايگۇل تولەۋوۆا جەڭىسكە جەتتى. ۇزدىك ءسۇت ءونىمى ءۇشىن ءبىرىنشى ورىن اباي وبلىسى قاراسۋ اۋىلىنىڭ تۇرعىنى داريان جانبولاتوۆاعا بۇيىردى. قىزىلوردا وبلىسى تاسبوگەت كەنتىنىڭ تۇرعىنى گۇلزيرا ەرنيازوۆا ەت ونىمدەرىن ۇزدىك ءوندىرۋشى اتاندى. «ۇزدىك اسپازدىق ءونىم» نوميناتسياسى بويىنشا ءبىرىنشى ورىندى جەتىسۋ وبلىسى قاراشوقى اۋىلىنىڭ تۇرعىنى نازگۇل شوقانوۆا يەلەندى. الماتى وبلىسى قاراكەمەر اۋىلىنىڭ ازاماتى ومار ليمتونوۆ «ۇزدىك كوكونىس-باقشا جانە جيدەك-جەمىس ونىمدەرى» نوميناتسياسى بويىنشا جەڭىمپاز اتاندى. اۋىلداعى ۇزدىك اگرارلىق ەمەس جوبا ءۇشىن ءبىرىنشى ورىن دەمالىس ءۇيىن اشىپ، كاسىبىن وركەندەتىپ وتىرعان شىعىس قازاقستان وبلىسى جاڭا ءۇلبى اۋىلىنىڭ تۇرعىنى جاننا ابۋعاليگە بەرىلدى. ال باتىس قازاقستان وبلىسى دارينسك اۋىلىنىڭ تۇرعىنى سەرگەي كاۆەرين «ۇزدىك قايتا وڭدەۋ كاسىپورنى» نوميناتسياسىن جەڭىپ الدى. سونىمەن قاتار، قىزىلوردا وبلىسى بەسارىق اۋىلىنىڭ كاسىپكەرى مۇرات سارسەنباەۆ جوباعا قولداۋ بىلدىرگەنى ءۇشىن العىس حاتپەن ماراپاتتالدى.

سۋرەتتى تۇسىرگەن: ءالي عالىم.

بايقاۋعا قاتىسۋشىلار «اۋىل اماناتى» جوباسى – مەملەكەتتىڭ ەڭبەك ادامىنا دەگەن قامقورلىعىنىڭ جارقىن ۇلگىسى، اۋىل تۇرعىندارىنىڭ تابىسىن ارتتىرۋدىڭ قاراپايىم ءارى تۇسىنىكتى قۇرالى ەكەنىن اتاپ ءوتتى. ولار مەملەكەت باسشىسىنا جانە «AMANAT» پارتياسىنا كورسەتىلگەن قولداۋ ءۇشىن العىس ءبىلدىردى.

سونداي-اق، بەسارىق اۋىلىندا «اۋىل اماناتى» اياسىندا وندىرىلگەن اۋىل شارۋاشىلىعى ونىمدەرىنىڭ كورمەسى ءوتتى. بيىل اۋىلدا اتالعان جوبا اياسىندا ۇلكەن وندىرىستىك ورتالىق سالىندى. وندا كارتوپتان جاسالعان فري، ناۋبايحانا، كونديتەرلىك تسەح، سونداي-اق جارتىلاي دايىن ونىمدەر، پلاستيك ىدىس-اياقتار، جۇمىسشىلارعا ارنالعان قولعاپتار، سابىن، شۇلىق جانە اعاش بۇيىمدار شىعاراتىن كاسىپورىندار ءوز جۇمىسىن باستادى. سونداي-اق، «قىزىلوردا» سۋپەرماركەتى مەن كافە اشىلدى.

وسى كۇنى «AMANAT» پارتياسىنىڭ توراعاسى مەملەكەت باسشىسىنىڭ تاپسىرماسى بويىنشا اشىلعان قىزىلوردا قالاسىنىڭ «قورقىت اتا» اۋەجايىنداعى جاڭا تەرمينالدىڭ جۇمىسىمەن تانىستى.

«AMANAT» پارتياسىنىڭ ءباسپاسوز قىزمەتى

Abai.kz