ۋكراينا پرەزيدەنتى زەلەنسكي امەريكالىق پودكاستەر لەكس فريدمانعا اۋقىمدى سۇحبات بەرىپتى. سول سۇحباتتىڭ ىشىندە: سوعىستىڭ العاشقى كۇندەرى بەلارۋس باسشىسى الەكساندر لۋكاشەنكومەن سويلەسكەنىن ايتتى.

پرەزيدەنت زەلەنسكي نە دەيدى؟

- مەن لۋكاشەنكومەن تەلەفون ارقىلى سويلەستىم. ول مەنەن كەشىرىم سۇرادى. «ءبىزدىڭ تەرريتوريادان ۋكرايناعا زىمىرانداردى مەن اتقان جوقپىن، پۋتين اتتى. مەن ەمەس، مەن باقىلاي المايمىن»، - دەپ اقتالدى. مەن وعان پۋتينمەن تەڭدەي قىلمىسكەر ەكەنىن بەتىنە ايتتىم. ال ول ماعان: «سەن ءتۇسىن، ورىستارمەن سوعىسۋدىڭ كەرەگى جوق»، - دەپ يلاندىرۋعا تىرىستى.

ءتىپتى، لۋكاشەنكو ماعان بەلارۋستى سوققىلاۋعا بولاتىن ايتتى. «جاقسى، ەندەشە بەلارۋستەگى ءبىر ءموز-گە (مۇناي وڭدەۋ زاۋىتى) سوققى جاسا. سەن بىلەسىڭ عوي، ول ءموز-ءدىڭ مەن ءۇشىن ماڭىزدى ەكەنىن»، - دەدى لۋكاشەنكو. ول موزىر ءموز-ءىن ۇسىندى ماعان. مەن وعان: «قايداعى جاۋاپ؟! نە دەپ وتىرسىڭ»، - دەپ اشۋلاندىم. بۇل سوعىستىڭ العاشقى ەكىنشى، الدە ءۇشىنشى كۇنى بولاتىن, - دەيدى.

ال پرەزيدەنت زەلەنسكي ايتىپ وتىرعان موزىر ءموز-ءى – بەلارۋستەگى ءىرى مۇناي وڭدەۋ زاۋىتى. ول رەسەي ارمياسىنا جاعارماي ءوندىرىپ، جەتكىزىپ وتىرعان نەگىزگى زاۋىتتاردىڭ ءبىرى. جۇمىسىن 2024 جىلدىڭ 15 شىلدەسىندە توقتاتقان. بەلارۋس بيلىگى ءموز جۇمىسىنىڭ توقتاۋىنا «داۋىل» سەبەپ بولعانىن ايتادى. ال ۋكارينا باق-تارى زاۋىت ۋكراينانىڭ دروندارىنان زاقىمدانعانىن جازدى.

لۋكاشەنكو نە دەپ جاۋاپ بەردى؟

پرەزيدەنت زەلەنسكيدىڭ بۇل ايتقاندارىنا بەلارۋس پرەزيدەنتى لۋكاشەنكونىڭ ءباسپاسوز قىزمەتى رەسمي جاۋاپ بەرىپ، سوعىستىڭ العاشقى كۇندەرى ەكەۋارا سويلەسۋ بولعانىن راستاپ، بىراق، كەشەرىم سۇراماعانىن ايتادى.

- بەلارۋس پەن ۋكراينا پرەزيدەنتتەرىنىڭ سوعىستىڭ العاشقى كۇندەرىندەگى اڭگىمەسى تەك بەلارۋس پرەزيدەنتىنىڭ كەنجە ۇلى نيكولايدىڭ ەموتسيونالدى رەاكتسياسىنىڭ ارقاسىندا عانا بولدى. ونىڭ تەلەفونىندا زەلەنسكيدىڭ كونتاكتىسى بولعان.

بۇل اڭگىمەنىڭ ءمانى مازمۇنى نە دەسەڭىز: ءبىزدىڭ پرەزيدەنت ەڭ الدىمەن، ۋكراينا اۋماعىندا، زەلەنسكيدىڭ اۋماعىندا سوعىس ءورشىپ كەتكەنىن جانە ۋاقىت وتە كەلە زەلەنسكيگە بەيبىت ادامداردىڭ ءولىمى ءۇشىن جاۋاپ بەرۋى كەرەك ەكەنىن ايتتى. جەكە مۇددەدەن ادامداردىڭ ءومىرى ارتىق تۇرۋى كەرەك!

سوندىقتان ءبىزدىڭ پرەزيدەنت كەلىسسوزدەر ۇستەلىنە وتىرۋعا شاقىردى جانە كەلىسسوزدەر بولدى. بەلارۋستە ءۇش راۋند ءوتىپ، ءارى قاراي ىستامبۇلدا جالعاستى. بەلارۋس پرەزيدەنتى زەلەنسكيدەن كەشىرىم سۇراعان جوق. كەشىرىم سۇراۋعا سەبەپ تە جوق!

كەرىسىنشە، ۋكراينا ءبىرىنشى بولىپ بىزگە قارسى سانكتسيالار سالدى. ءتىپتى، اقش سانكتسيا تۋرالى ويلاماي جاتىپ، ۋكراينا بەلارۋسكە سانكتسيا سالدى، - دەيدى لۋكاشەنكونىڭ ءباسپاسوز حاتشىسى.

لۋكاشەنكو بەلارۋستى 1994 جىلدان بەرى باسقارىپ كەلەدى. 2020 جىلعى سايلاۋدان كەيىن الەمنىڭ كوپتەگەن وركەنيەتتى ەلى ونىڭ بيلىگىن لەگيتيمدى دەپ ەسەپتەمەيدى. بيىل 26 قاڭتاردا ول 7-ءشى كەزەك سايلاۋعا تۇسكەلى جاتىر.

سوعىستىڭ العاشقى كەزىندە رەسەي اسكەرى بەلارۋس جەرى ارقىلى ۋكرايناعا سوققى جاساپ، كيەۆتى الۋعا تىرىسقان ەدى.

نۇرگەلدى ابدىعانيۇلى

Abai.kz