2008 جىلى رەسەيدىڭ گرۋزياعا جاساعان باسقىنشىلىعى كەزىندە تانىمال بولعان ەتنيكالىق قازاق تاسبولات يبراشەۆ ۋكرايناداعى سوعىستا قازا تاپتى. قايعىلى جاعداي 3 اقپاندا بولعان. بۇل تۋرالى 24tv.ua اگەنتتىگى جازدى، دەپ حابارلايدى «ادىرنا» ءتىلشىسى.

«ۋكراينا قورعانىس كۇشتەرى رەسەي اسكەري قىزمەتشىسى تاسبولات يبراشەۆتىڭ كوزىن جويدى. ول 2025 جىلدىڭ 3 اقپانىندا حاركوۆ وبلىسىنداعى ۆولچانسك قالاسىنداعى شايقاس كەزىندە مەرت بولدى»،—دەلىنگەن حابارلامادا.

ەسكە سالايىق، تاسبولات يبراشەۆ 2008 جىلى رەسەيدىڭ گرۋزياعا جاساعان باسقىنشىلىعى كەزىندە تانىمال بولعان ەدى. ونىڭ گوري قالاسىنىڭ شەتىندەگى گرۋزين اسكەري كولونناسىنىڭ الدىندا تۇرعان كادرلارى الەمدىك باق-تاردا جاريالانعان بولاتىن. ۇزاق ۋاقىت بويى سۋرەتتەگى ادام بۋرياتيادان شىققان باتو داشيدورجيەۆ دەپ كەلگەن. الايدا كەيىنىرەك بۇل سۋرەتتەگى ادام بۋريات ەمەس، قازاقستاننىڭ تۋماسى تاسبولات يبراشەۆ ەكەنى انىقتالدى. ول كەزدە 58-رەسەي اسكەرىندە كەلىسىمشارت بويىنشا قىزمەت ەتكەن.

تاسبولات يبراشەۆ 1984 جىلى اتىراۋ وبلىسىندا دۇنيەگە كەلگەن. 1986 جىلى اناسىمەن بىرگە رەسەيگە كوشىپ كەتكەن. 2008 جىلى سولتۇستىك كاۆكازدا قىزمەت ەتىپ، 2010 جىلى كەلىسىمشارت اياقتالعاننان كەيىن استراحانعا ورالعان.

Abai.kz