ۋكراينا مەن اقش پرەزيدەنتتەرى اق ۇيدە كەزدەستى. تىكەلەي ەفيردە، جاريا تۇردە تالقى جاسادى. سونداعى باستى ەكى اڭگىمە بولدى. ءبىرىنشىسى – اقش پەن ۋكراينا اراسىنداعى تابيعي رەسۋرستار تۋرالى كەلىسىم. ەكىنشىسى – بەيبىت كەلىسىمنىڭ جاي-جاپسارى.

اۋەلدە ترامپ تا، زەلەنسكي دە ءبىر-بىرىنە ءىلتيپات سوزدەر ايتىپ، ءبىر-ءبىرىنىڭ ارقاسىنان قاعىپ، سىپايى سويلەسە باستاعان. اياعى داۋىس كوتەرۋگە، ءبىر-بىرىنە ۋلتيماتۋم قويۋعا دەيىن جەتتى. زەلەنسكي مەن ترامپتىڭ كەزدەسۋى اسا شيەلەنىستى جاعدايدا ءوتتى.

زەلەنسكي:

– پۋتين ۋكراينامەن جاساسقان ۇرىستى توقتاتۋ رەجيمىن 25 مارتە بۇزعان ادام. ول كەلىسىمدى ساقتامايدى. مەن ونى جاقسى بىلەمىن. سول سەبەپتى دە ءبىز ءۇشىن ۇرىستى ۋاقىتشا توقتاتۋ ناتيجەگە اكەلمەيدى. ءپۋتيندى بىرلەسە توقتاتۋ كەرەك، - دەدى.

– پۋتين ۋكراينانى قيراتتى. ول قۇن تولەۋى ءتيىس. ءبىز ەۋروپانىڭ نەگە دايىن ەكەنىن بىلەمىز، ال اقش نەگە دايىن؟ مەن سونى بىلگىم كەلەدى. سول تۋرالى پرەزيدەنت مىرزادان سۇراعىم كەلەدى، - دەدى.

ترامپ:

– ءبىز ۋكرايناعا 350 ملرد دوللار بەردىك. ۋكراينا بىزگە العىس ايتۋى ءتيىس. ءبىزدىڭ قارۋىمىز بولماعاندا بۇل سوعىس بىرنەشە اپتادا بىتەر ەدى، - دەدى.

– ءسىز ءوزىڭىزدىڭ بىزگە دەگەن قۇرمەتسىزدىگىڭىزدى كورسەتىپ وتىرسىز. جاعداي ءۇشىنشى دۇنيەجۇزىلىك سوعىسقا جىلجىپ بارادى. بۇل وينايتىن نارسە ەمەس. ءسىزدىڭ قولىڭىزدا قانداي دا ءبىر كوزىر جوق، - دەدى.

– ءبىز بۇل كەلىسىمدى جاسايمىز، نە بۇل كەلىسىمنەن ءسىز (زەلەنسكي) شىعاسىز، - دەدى.

– زەلەنسكيدىڭ پۋتينگە دەگەن وشپەندىلىگىن كورىپ تۇرسىز. ول ونى قاتتى جەك كورەدى. وتە قاتتى. مۇنداي ساتتە كەلىسىم جاساۋ وتە قيىن، - دەدى.

زەلەنسكي:

– سىزدەر ءبىزدى ءوز قالاۋلارىڭىزدى جاساۋعا ماجبۇرلەي المايسىزدار، - دەدى.

ترامپ:

– ءسىز بىزگە: «انانى قالايمىن، مىنانى قالايمىن»، - دەپ «ديكتوۆكا» جاساي المايسىز، - دەدى.

سوزگە اقش-تىڭ ۆيتسە-پرەزيدەنتى ۆەنس ارالاسىپ:

– سىزدەر ءدال قازىر ۇلكەن پروبلەماعا كەلىپ تىرەلدىڭىزدەر، - دەدى.

زەلەنسكي:

– سىزدەر بىزدە نە بولىپ جاتقانىن ەگجەي-تەگجەيلى بىلمەيسىزدەر. سىزدەر مۇحيتتىڭ ارعى جاعىنداسىزدار، - دەدى.

ترامپ:

– سىزدەردىڭ قولدارىڭىزدا مىقتى كارتا جوق. ونى ءبىز بەرىپ وتىرمىز. سول ءۇشىن بىزگە العىس ايتۋلارىڭىز كەرەك! وباما سىزگە ەشتەڭە بەرگەن جوق. ال مەن سىزگە Javelin بەردىم، - دەدى.

زەلەنسكي:

– مەن مۇندا كارتا ويناۋعا كەلگەن جوقپىن، - دەدى.

ترامپ:

– مەن كارتا ويناۋعا كەلمەگەنىڭىزدى بىلەمىن! نە ءبىز كەلىسىمگە قول قويامىز، نە ءارى قاراي جالعىز وزدەرىڭىز، ءبىزسىز سوعىساسىزدار! سىزدەردە سارباز جەتىسپەيدى. سوعىستا كوپ ادام قىرىلىپ جاتىر. ءبىز سوعىستى توقتاتۋ ءۇشىن كۇش سالۋدامىز. سول ءۇشىن بىزگە ريزا بولۋلارىڭىز كەرەك، - دەدى.

زەلەنسكي:

– ءسىز ءوزىڭىز بىزگە كەلىپ، كوزىڭىزبەن كورىڭىز، - دەدى.

قوسىمشا: كەزدەسۋدىڭ باسىندا تاراپتار تابيعي رەسۋرس بويىنشا كەلىسىمگە كەلەتىنى، اقش ۋكرايناعا قارۋ-جاراق بەرۋدى جالعاستىراتىنى تۋرالى ايتقان. جاريا ءسوزتالاستان سوڭ زەلەنسكي مەن ترامپ كەلىسىمگە كەلە المادى. زەلەنسكي اق ۇيدەن جوسپارداعىدان ەرتە كەتتى. ءباسپاسوز ماسليحاتى دا، باسقاسى دا بولمايتىن بولدى!

ترامپ:

– مەن قورىتىندىعا كەلدىم. زەلەنسكي بەيبىتشىلىككە دايىن ەمەس. بەيبىت كەلىسسوزگە اقش ارالاسسا، بۇل وعان (زەلەنسكيگە) كەلىسسوز كەزىندە باسىمدىق بەرەدى دەپ ەسەپتەيدى. ماعان باسىمدىق كەرەك ەمەس، بەيبىتشىلىك كەرەك! ول اقش-قا قۇرمەتسىزدىك كورسەتتى! ول بەيبىتشىلىككە دايىن بولعان كەزدە قايتا كەلسە بولادى، - دەپ جازبا جاريالادى.

«Fox News»: «اقش پەن ۋكراينا اراسىنداعى تابيعي رەسۋرستار بويىنشا كەلىسىمگە قول قويىلمايتىن بولدى»، - دەپ جازدى. بۇل اقپاراتتى اق ءۇيدىڭ ءباسپاسوز قىزمەتى دە راستادى.

Abai.kz