بۇل راس جانە ونى ءبارىمىز كورىپ تە ءبىلىپ وتىرمىز، قازاق ەلىندە ەكى الەۋمەتتىك توپ بار: قازاق ءتىلدى جانە وزگە ءتىلدى.

وسى وزگە ءتىلدى الەۋمەتتىك توپ ءوز ىشىنەن ءورىستىلدى، سوسىن ءاناتىلدى دەپ تاعى جىكتەلەدى. ورىستىلدىلەر ۇلتقا، ناسىلگە ءھام دىنگە بولىنبەيدى. ال، ءاناتىلدى الەۋمەتتىك توپ ۇلتتىق بەلگىسىنە وراي توپتاسقان. ولار - وزبەك، ۆايناح (شەشەن-ينگۋش), ۇيعىر، تاجىك ت.ب. ۇزىن-سانى 10 مىڭ مەن 100 مىڭنىڭ ء(تىپتى ودان دا كوپ) اراسىنداعى ءبىر اۋماققا شوعىرلانا قونىستانعان دياسپورالار. ەلىمىزدە وزگە ءتىلدى الەۋمەتتىك توپ ءۇشىن: ورىس، وزبەك، ۇيعىر جانە تاجىك تىلىندە ءبىلىم بەرەتىن مەكتەپتەر اشىلعان.

سوندىقتان 140 ۇلت پەن ۇلىس دەگەن كەڭەستىك ءميفتى "وزگە ءتىلدى ۇلتتىق ازشىلىق" پەن "مەملەكەتتىك ءتىلدى ۇلتتىق كوپشىلىك" دەگەن ۇعىمدارمەن الماستىرۋىمىز كەرەك! وزگە تىلدىلەر ناسىلىنە، دىنىنە ءھام ۇلتىنا قاراماي مەملەكەتتىك قىزمەتكە تۇرۋعا تولىق قاقىلى. ولاي بولسا، ولاردان قازاق تىلىندە سويلەپ، قازاق تىلىندە جازا الاتىن ساۋاتتىلىقتى تالاپ ەتەتىن زاڭ كەرەك. قازاق ءتىلىن مەمقىزمەتتە اۋدارماشى جالداپ العا سۇيرەيمىز دەۋ ەندىگى جەردە ۇيات. ول - تۇتاس ۇلتتى قورلاۋ. وسى ارادا اششى دا بولسا، ايتا كەتەيىن، ورىس ءتىلدى قازاق تا وزگەتىلدى الەۋمەتتىك توپتىڭ وكىلى بولىپ تابىلادى. نەگە؟

ويتكەنى ولارعا قازقتىڭ ۇلتتىق پروبلەمالارى بەش تيىن ەكەنىن تۇسىنەتىن كەز كەلدى. مەملەكەتتىك قىزمەت ءتىلى قازاقتانباي ەش نارسە ونبەيدى. ءۇش ءتىل بىلەتىن قانشاما قازاق ءتىلدى باۋىر-قارىنداستارىمىز مەملەكەتتىك قىزمەتكە باس سۇعا الماي ءجۇر. بۇل دا ۇلكەن پروبلەما. بيلىك پەن بيزنەس قازاقتانباي ەش نارسە ونبەيدى. ولارعا قۇجاتتاردى قازاق تىلىندە جۇرگىزۋدى تالاپ ەتۋ زامان تالابى. بۇل سونداي-اق، دەموكراتيا تابيعاتىنىڭ دا تالابى: ازشىلىق كوپشىلىكپەن كەلىسۋگە ءتيىس.

Abai.kz