3-5 ناۋرىز ارالىعىندا تاشكەنتتە وزبەكستان رەسپۋبليكاسىنىڭ سۋ ۇنەمدەيتىن سۋارۋ جۇيەلەرىن دامىتۋ جانە ەنگىزۋ جونىندەگى تاجىريبەسىن زەردەلەۋ بويىنشا ترەنينگ وتۋدە. ءىس-شاراعا قازاقستاندىق سۋ شارۋاشىلىعى سالاسىنىڭ ماماندارى دا قاتىسىپ جاتىر.

قر سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ پەن وزبەكستاننىڭ سۋ شارۋاشىلىعى ءمينيسترى شاۆكات حامراەۆ قاڭتار ايىنىڭ سوڭىندا وتكەن ەكىجاقتى سۋ ىنتىماقتاستىعىن تەرەڭدەتۋ جونىندەگى بىرلەسكەن جۇمىس توبىنىڭ 12-ءشى وتىرىسىندا اتالعان ترەنينگتى وتكىزۋ تۋرالى كەلىسكەن بولاتىن.

سۋرەت: gov.kz سايتىنان الىندى.

ءىس-شارا اياسىندا وقىتۋ دارىستەرى، سەمينارلار، زاماناۋي سۋ ۇنەمدەۋ تەحنولوگيالار مەن سۋ ۇنەمدەۋ جۇيەلەرىنىڭ ەلەمەنتتەرىن جاساۋمەن اينالىساتىن كاسىپورىنداردىڭ جۇمىسىمەن تانىسۋ وتەدى. ترەنينگكە قاتىسۋشىلار سۋ ۇنەمدەۋ تەحنولوگيالارىنىڭ تيىمدىلىگىن ءىس جۇزىندە جۇزىندە باعالاي الادى.

«ءبىز ءوز ماماندارىمىزدىڭ بىلىكتىلىگىن ارتتىرۋ ماسەلەسى بويىنشا وزگە ەلدەرمەن بەلسەندى ىنتىماقتاستىق ورناتتىق. مىسالى، بيىل قازاقستاندىق 105 مامان قىتايدا تاجىريبە الماسادى. بۇدان بولەك، 1000-عا جۋىق مامان قايتا دايارلاۋ جانە بىلىكتىلىكتى ارتتىرۋ كۋرستارىنان وتەدى»، - دەدى عىلىم جانە يننوۆاتسيا دەپارتامەنتىنىڭ ديرەكتورى ءلاززات ءجۇسىپوۆا.

Abai.kz