14 ناۋرىز كۇنى قازاقستاندا جالپىۇلتتىق ناۋرىزناما ونكۇندىگى باستالادى. بيىل ءمانى تەرەڭ ناۋرىز مەرەكەسى ەرەكشە اتالىپ وتەدى.

2024 جىلى مەملەكەت باسشىسى قاسىم-جومارت توقاەۆتىڭ باستاماسىمەن ناۋرىز مەيرامىن تويلاۋدىڭ جاڭا فورماتى – ناۋرىزناما ونكۇندىگى، سونداي-اق مەرەكەنىڭ جاڭا لوگوتيپى بەكىتىلدى.

«ناۋرىز» بىرىڭعاي لوگوتيپىندەگى ءۇش قىزعالداق – ۋاقىتتىڭ ءۇش كەزەڭىن، ياعني ەلىمىزدىڭ كەشەگى تاريحىن، قازىرگى دامۋىن جانە كەلەشەك باعدارىن بەينەلەيدى.

تاريحي تۇرعىدان، ناۋرىزناما – مىڭجىلدىقتاردان باستاۋ الاتىن حالقىمىزدىڭ مادەني مۇراسى.

سۋرەت: gov.kz سايتىنان الىندى.

قازاق مادەنيەتىندە ناۋرىزدى تويلاۋ ءداستۇرى ەشقاشان ءبىر كۇنمەن شەكتەلمەگەن. ەگەر ناۋرىز ورتالىق ازيادا، تاياۋ شىعىستا، كاۆكازدا، بالقان ەلدەرىندە حالىقارالىق دەڭگەيدە اتالىپ وتەتىن مەيرام بولسا، وندا ناۋرىزناما – كەمىندە 8 كۇنگە سوزىلاتىن ۇلى دالانىڭ حالىقتىق مەرەكەسى. بۇل تۋرالى كەزىندە اباي قۇنانبايۇلى، بەلگىلى ەتنوگراف-عالىم ءماشھۇر ءجۇسىپ كوپەيۇلى جازعان.

وسىلايشا، ناۋرىزناما – جاساندى جاڭاشىلدىق ەمەس، كەرىسىنشە، كوپكۇندىك مەرەكەلەۋ ارقىلى ونىڭ قىر-سىرىن اشىپ، ءداستۇرلى سيپاتىن دامىتۋعا باعىتتالعان.

سۋرەت: gov.kz سايتىنان الىندى.

2024 جىلى ونكۇندىك اياسىندا ەلىمىزدە 800-دەن استام ءىس-شارا، سونىڭ ىشىندە كورمەلەر، فەستيۆالدار، ادەبي-مۋزىكالىق كەشتەر، قايىرىمدىلىق اكتسيالارى، مادەني-سپورتتىق ءىس-شارالار ۇيىمداستىرىلدى.

بىرەگەي مەرەكە ءارتۇرلى جاستاعى جانە الەۋمەتتىك توپتاعى تۇرعىنداردى ۇلتتىق ءداستۇر توڭىرەگىنە بىرىكتىرىپ، ءوزارا تۇسىنىستىك پەن قۇرمەت اتموسفەراسىن قالىپتاستىرادى.

سۋرەت: gov.kz سايتىنان الىندى.

بەرەكە مەن بىرلىكتىڭ مەرەكەسى ناۋرىز – وتكەن مەن بۇگىننىڭ، قازاقستاننىڭ ءتۇرلى مادەنيەتتەرى مەن داستۇرلەرىنىڭ اراسىنداعى كوپىر. مەملەكەت باسشىسى قاسىم-جومارت توقاەۆ قازاقستاندىقتاردى ناۋرىز مەيرامىمەن قۇتتىقتاۋىندا ونىڭ ماڭىزىن ەرەكشە اتاپ ءوتتى.

«بابالارىمىز ەجەلگى زاماننان بەرى ۇلىس كۇنىن جىل باسى رەتىندە اتاپ وتكەن. قازىر ءاز ناۋرىز كۇللى حالىققا ورتاق جالپىۇلتتىق مەرەكەگە اينالدى. ونى ۇلتىنا، دىنىنە قاراماستان بارشا جۇرتىمىز ەرەكشە كۇتەدى، بىرگە اتاپ وتەدى»، – دەدى پرەزيدەنت.

سۋرەت: gov.kz سايتىنان الىندى.

ناۋرىزنامانىڭ ءاربىر كۇنى قوعام ءومىرىنىڭ جەكەلەگەن اسپەكتىنە ارنالعان. بۇل مەرەكەنىڭ ماعىناسى مەن ءمانىن تەرەڭدەتۋگە مۇمكىندىك بەرەدى. جاڭارۋ جەكە قارىم-قاتىناستاردان باستاپ قوعامدىق قۇندىلىقتارعا دەيىنگى بارلىق سالالاردى قامتۋى ءتيىس.

«كورىسۋ – امال مەرەكەسى» (امان-ساۋلىق سۇراسىپ، اعايىنمەن كەزدەسۋلەر جانە يگى تىلەكتەر كۇنى), «قايىرىمدىلىق» (قايىرىمدى ىستەر كۇنى), «مادەنيەت جانە ۇلتتىق سالت-ءداستۇر» (ۇلتتىق سالت-ءداستۇر مەن مادەنيەت كۇنى), «شاڭىراق» (وتباسى كۇنى), «ۇلتتىق كيىم» كۇنى، «جاڭارۋ» كۇنى، «ۇلتتىق سپورت» كۇنى، «ىنتىماق» (بىرلىك پەن ىنتىماق كۇنى), «جىل باسى» جانە «تازارۋ» كۇنى سياقتى تاقىرىپتىق كۇندەر قازاقستاندىق مادەنيەت پەن قۇندىلىقتاردىڭ ماڭىزىن ايشىقتايدى.

سۋرەت: gov.kz سايتىنان الىندى.

ناۋرىزناما – ەل بىرلىگىن نىعايتۋدىڭ ماڭىزدى ىشكى فاكتورى عانا ەمەس، سونىمەن قاتار قازاقستاننىڭ سىرتقى ساياساتتاعى ۇستانىمىن بەكىتۋدىڭ ماڭىزدى ەلەمەنتى.

باي تاريحى بار، جاڭارۋ مەن بىرلىكتىڭ سيمۆولىنا اينالعان ناۋرىزناما ريو-دە-جانەيرو كارناۆالىنا، جاپونياداعى ساكۋرا گۇلدەۋى مەرەكەسىنە، ۇندىستانداعى حولي فەستيۆالىنە، گەرمانياداعى وكتوبەرفەستكە، يسپانياداعى سان-فەرمين نەمەسە توماتينا فەستيۆالدەرىنە ۇقساس قازاقستاننىڭ نەگىزگى تۋريستىك برەندى بولا الادى.

سۋرەت: gov.kz سايتىنان الىندى.

مەرەكەنىڭ ونكۇندىك فورماتى فەستيۆال تسيكلىن قۇرۋعا مۇمكىندىك بەرەدى، وندا كۇن سايىن تۋريستەرگە قازاقتىڭ سالت-ءداستۇرىن، ۇلتتىق تاعامدارىن، ويىندارىن، مۋزىكاسىن، قولونەرى مەن زاماناۋي ونەرىن تانىستىراتىن جاڭا قىزىقتى ءىس-شارالار ۇسىنۋعا بولادى.

بيىل ناۋرىزناما ونكۇندىگى اياسىندا ەلىمىز بويىنشا حالىقتىڭ داستۇرلەرىن، مادەنيەتى مەن تاريحىن ناسيحاتتاۋعا باعىتتالعان 1,5 مىڭنان استام ءىس-شارا وتكىزۋ جوسپارلانعان.

سۋرەت: gov.kz سايتىنان الىندى.

اتاپ ايتقاندا، استانا قالاسىندا «قاماجاي» فلەشموبى، اقمولا وبلىسىندا كرەاتيۆتى يندۋستريا وكىلدەرى مەن قولدانبالى ونەر شەبەرلەرىنىڭ قاتىسۋىمەن «ناۋرىز – اربات» جوباسى، كوكشەتاۋدا مىڭنان استام ايەل قاتىساتىن «كيمەشەكتەر شەرۋى»، اقتوبەدە «ۇلتتىق كيىم – ۇلت بەينەسى» اتتى ۇلتتىق كيىمدەر شەرۋى، حالىقتىڭ ۇلتتىق مادەنيەتكە دەگەن قىزىعۋشىلىعىن وياتۋعا باعىتتالعان باسقا دا كوپتەگەن اۋقىمدى ءىس-شارالار وتەدى.

Abai.kz