بەرىك ءۋالي پرەزيدەنتكە ءوڭىردىڭ الەۋمەتتىك-ەكونوميكالىق جاعدايى تۋرالى ەسەپ بەرىپ، الداعى كەزەڭگە ارنالعان دامۋ جوسپارىن تانىستىردى.

سونداي-اق جەرگىلىكتى بيۋدجەتتىڭ شىعىس جانە كىرىس بولىگىنە جان-جاقتى تالداۋ جۇرگىزىلگەنىن جەتكىزدى. سونىڭ ناتيجەسىندە قارجىلاندىرۋدىڭ باسىم باعىتتارى انىقتالدى. ال ۇنەمدەلگەن قاراجات وزەكتى ماسەلەلەردى شەشۋگە جۇمسالادى.

قاسىم-جومارت توقاەۆقا 2028 جىلعا دەيىن جۇزەگە اسىرىلاتىن 24 ينۆەستيتسيالىق جوبانىڭ ءتىزىمى جاساقتالعانى تۋرالى باياندالدى. جالپى قۇنى 2,2 تريلليون تەڭگە بولاتىن بۇل باستامالار 8 مىڭنان استام جۇمىس ورنىن اشۋعا مۇمكىندىك بەرەدى. ونىڭ ىشىندە التى جوبا بيىل ىسكە قوسىلادى.

بەرىك ءۋالي وبلىستاعى الەۋمەتتىك نىسانداردىڭ جانە كوممۋنالدىق ينفراقۇرىلىمنىڭ جاي-كۇيى جونىندە مالىمەت بەردى. اتاپ ايتقاندا، تۇرعىنداردىڭ سۇرانىسىنا ساي مەكتەپتەر مەن بالاباقشالار سالۋ، مادەنيەت جانە دەنساۋلىق ساقتاۋ نىساندارىن جاڭعىرتۋ جوسپارلانىپ وتىر.

بۇدان بولەك، كوممۋنالدىق شارۋاشىلىق سالاسىنداعى قوردالانعان پروبلەمالاردى، اسىرەسە سەمەي قالاسىنىڭ وسى باعىتتاعى ماسەلەلەرىن شەشۋ وتە وزەكتى.

«جايلى مەكتەپ» ۇلتتىق جوباسى اياسىندا 5 نىساننىڭ جانە وقۋشىلار سارايىنىڭ قۇرىلىسى قولعا الىندى. وبلىس ورتالىعىنداعى اسپالى كوپىردى رەكونسترۋكتسيالاۋدىڭ جوبالىق-سمەتالىق قۇجاتتاماسى ازىرلەنىپ، ەرتىس وزەنى ارقىلى وتەتىن تاعى ءبىر كوپىر سالىنىپ جاتىر. وسى رەتتە اسپالى كوپىردىڭ جۇكتەمەسىن ازايتىپ، كولىك ءنوپىرىن رەتتەۋ ماقساتىندا سەمەي قالاسىندا اينالما جول سالۋ ماسەلەسى پىسىقتالۋدا.

مەملەكەت باسشىسى ايماقتاعى الەۋمەتتىك-ەكونوميكالىق ماسەلەلەردىڭ شەشىلۋى تۇرعىنداردىڭ تۇرمىس دەڭگەيىن ارتتىرۋعا ىقپال ەتەتىنىن اتاپ ءوتتى. سونداي-اق وبلىس اكىمىنە ۇكىمەتپەن بىرگە ءوڭىردى قارقىندى دامىتۋ جولدارىن قاراستىرىپ، وزەكتى ماسەلەلەردى كەزەڭ-كەزەڭىمەن شەشۋدى تاپسىردى.

قاسىم-جومارت توقاەۆ وڭدەۋ ونەركاسىبىن وركەندەتۋ، جاڭادان تۇراقتى جۇمىس ورىندارىن اشۋ، وبلىس ورتالىعىن اباتتاندىرۋ جانە ينفراقۇرىلىمدى دامىتۋ باعىتىندا شارالار قابىلداۋ قاجەت ەكەنىنە توقتالدى.

سونىمەن قاتار ابايدىڭ 180 جىلدىعىنا ارنالعان مەرەيتويلىق ءىس-شارالاردى لايىقتى دەڭگەيدە ۇيىمداستىرۋدىڭ ماڭىزىنا نازار اۋداردى.

Abai.kz