8 ءساۋىر كۇنى كوكشەتاۋ قالاسىندا «ۇلتتىق قۇرىلتاي شەشىمدەرىنىڭ جۇزەگە اسۋى: قوعامدىق قاتىسۋ جانە باقىلاۋ» تاقىرىبىندا كيسي GPS: Gylym. Pikir. Sayasat ۇلتتىق ساراپتامالىق الاڭىنىڭ وتىرىسى ءوتتى.

ءىس-شارا بارىسىندا ۇلتتىق قۇرىلتاي شەشىمدەرىن جۇزەگە اسىرۋ جولدارى تالقىلاندى. ازاماتتىق قوعامنىڭ قوعامدىق قاتىسۋ مەن باقىلاۋداعى رولىنە، سونداي-اق مەملەكەت پەن حالىق اراسىنداعى ءوزارا ءىس-قيمىل تەتىكتەرىنە ەرەكشە نازار اۋدارىلدى.

تالقىلاۋعا مەملەكەتتىك ورگانداردىڭ، ساراپتامالىق ورتالىقتاردىڭ، ۇكىمەتتىك ەمەس ۇيىمداردىڭ وكىلدەرى، سونداي-اق ءبىلىم بەرۋ، ازاماتتىق قوعام جانە وزگە دە سالالارداعى ساراپشىلار قاتىستى.

سۋرەت: kisi.kz سايتىنان الىندى.

وتىرىسقا قاتىسۋشىلارعا ونلاين فورماتتا قازاقستان رەسپۋبليكاسىنىڭ پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتىنىڭ ديرەكتورى ەركىن تۇقىموۆ سوز سويلەدى. قسزي باسشىسى ۇلتتىق قۇرىلتايدىڭ IV وتىرىسىنىڭ بۋرابايدا ءوتۋى وڭىرلەردىڭ ەلدىڭ ورنىقتى دامۋىنداعى ماڭىزدى ءرولىن كورسەتەتىنىن ايتىپ، پرەزيدەنتتىڭ: «كۇشتى وڭىرلەر – قۋاتتى ەل» دەگەن سوزدەرىن ەسكە سالدى.

ە. تۇقىموۆ وتكەن اپتادا ۇلتتىق قۇرىلتاي باستامالارىن جۇزەگە اسىرۋ جوسپارى بەكىتىلگەنىن اتاپ ءوتتى.

«بۇل – جۇيەلى وزگەرىستەرگە باعىتتالعان ناقتى قادام. الايدا ونىڭ تيىمدىلىگى قوعامنىڭ بەلسەندى قاتىسۋىنا تىكەلەي بايلانىستى. ازاماتتاردىڭ شەشىم قابىلداۋعا قاتىسۋى عانا ەمەس، ولاردى جۇزەگە اسىرۋ بويىنشا قوعامدىق باقىلاۋ مەن مونيتورينگ تەتىكتەرىن دامىتۋ دا ماڭىزدى. بۇگىن ءبىز وسى ماسەلەلەردى اشىق، كاسىبي ءارى سىندارلى تۇردە تالقىلاۋ ءۇشىن جينالىپ وتىرمىز. جەرگىلىكتى دەڭگەيدە حالىقتىڭ قاتىسۋىن قالاي كۇشەيتۋگە بولادى؟ قولدانىستاعى كەرى بايلانىس پەن باقىلاۋ قۇرالدارىندا قانداي كەدەرگىلەر بار؟ ازاماتتىق الەۋەت ايماق پەن بۇكىل ەلدىڭ يگىلىگىنە قالاي جۇمىس ىستەي الادى؟»، – دەدى قسزي ديرەكتورى.

سۋرەت: kisi.kz سايتىنان الىندى.

قر پرەزيدەنتى جانىنداعى قسزي ديرەكتورىنىڭ ورىنباسارى نۇرلان ساقۋوۆ وز سوزىندە وڭىرلەردى ورتالىقسىزداندىرۋ جانە ولاردىڭ بيۋدجەتتىك دەربەستىگىن ارتتىرۋ سوڭعى جىلدارداعى وڭىرلىك مەملەكەتتىك ساياساتتىڭ باستى باعىتتارىنىڭ ءبىرى بولعانىن اتاپ ءوتتى.

ول سونداي-اق بۋرابايدا وتكەن ۇلتتىق قۇرىلتاي وتىرىسىندا مەملەكەت باسشىسى ءار ءوڭىر ءۇشىن ءوسۋ نۇكتەلەرىن ايقىندايتىن وڭىرلىك ساياسات تۇجىرىمداماسىن ازىرلەۋدى تاپسىرعانىن ەسكە سالدى. اتاپ ايتقاندا، اقمولا ءوڭىرى مەكتەپتەردىڭ جەتكىلىكسىزدىگى، جول ساپاسىنىڭ تومەندىگى جانە جەلىلەردىڭ توزۋى سياقتى ماسەلەلەردى شەشۋى قاجەت.

«تۇجىرىمدامادا سالىقتاردىڭ ءبىر بولىگىن جەرگىلىكتى دەڭگەيگە بەرۋ ارقىلى وڭىرلەردىڭ ەكونوميكالىق جانە بيۋدجەتتىك دەربەستىگىن ودان ءارى ارتتىرۋ قاراستىرىلعان»، – دەدى قسزي ديرەكتورىنىڭ ورىنباسارى.

سۋرەت: kisi.kz سايتىنان الىندى.

قوعامدىق باقىلاۋ ينستيتۋتتارىن كۇشەيتۋ قاجەتتىگىنە توقتالعان ن. ساقۋوۆ ءماسليحاتتاردىڭ جەرگىلىكتى بيۋدجەتتەردى تالقىلاۋ مەن بەكىتۋ ۇدەرىسىندەگى ماڭىزدى ءرولىن اتاپ ءوتتى.

«مەنىڭ ويىمشا، ءماسليحاتتاردىڭ اپپاراتتارىن كۇشەيتىپ، ولاردى ساراپتامالىق رەسۋرستارمەن قامتاماسىز ەتۋ، اسىرەسە بيۋدجەت قابىلداۋ ۇدەرىسىندەگى اشىقتىقتى ارتتىرۋ قاجەت. مەملەكەت باسشىسى ۇسىنعان: «ىقپالدى پارلامەنت – ەسەپ بەرەتىن ۇكىمەت» فورمۋلاسىن وڭىرلىك دەڭگەيدە دە قولدانۋعا بولادى. بۇل اتقارۋشى ورگانداردىڭ جەرگىلىكتى وكىلدى ورگاندارعا ەسەپ بەرۋىن قامتاماسىز ەتەدى»، – دەدى ن. ساقۋوۆ.

«AMANAT» پارتياسىنىڭ اقمولا وبلىستىق فيليالىنىڭ اتقارۋشى حاتشىسىنىڭ ورىنباسارى اقمانات الىمبەتوۆا وڭىردەگى قوعامدىق مونيتورينگتەگى پارتيا ۇلەسى تۋرالى ايتىپ بەردى.

«قوعامدىق باقىلاۋ بەكەتتەرى ايقىندالعان. وبلىستىق فيليالدا سىبايلاس جەمقورلىققا قارسى ءىس-قيمىل جونىندەگى قوعامدىق كەڭەس جۇمىس ىستەيدى، ونىڭ مۇشەلەرى دە مونيتورينگ جۇرگىزەدى. الەۋمەتتىك جەلىلەردە حالىق وزەكتى ماسەلەلەردى كوتەرگەندە، پارتيا بەلسەندىلەرىنىڭ، ساراپشىلاردىڭ، ۇەۇ وكىلدەرىنىڭ قاتىسۋىمەن جەدەل ارەكەت ەتۋ تاجىريبەسى قالىپتاستى»، – دەدى ا. الىمبەتوۆا.

سۋرەت: kisi.kz سايتىنان الىندى.

«اقمولا وبلىسىنىڭ ازاماتتىق اليانسى» زاڭدى تۇلعالار بىرلەستىگىنىڭ توراعاسى يرينا تەرەنتەۆا قوعامدىق باقىلاۋدى كاسىبيلەندىرۋ قاجەتتىگىن اتاپ ءوتتى.

«حالىق ۇنىنە قۇلاق اساتىن مەملەكەت» قاعيداتىن جۇزەگە اسىرۋ ءۇشىن قوعامدىق بەلسەندىلەرگە ءتيىستى ءبىلىم مەن قۇزىرەتتەر قاجەت: مەملەكەتتىك ورگاندارعا قالاي حات جولداۋ كەرەك، نەنى ەسكەرۋ قاجەت، قوعامدىق باقىلاۋ دەگەن نە، ءارتۇرلى ۇەۇ-نىڭ وكىلەتتىكتەرى قانداي؟ مەملەكەت پەن ۇكىمەتتىك ەمەس سەكتور اراسىندا ءوزارا قوزعالىس بولۋى ءتيىس. ۋاقىت وتە كەلە بۇل ازاماتتىق سەكتوردىڭ دامۋىنا ىقپال ەتەدى. سوندا عانا قوعامدىق باقىلاۋدىڭ كاسىبيلەنۋى تۋرالى ايتا الامىز»، – دەدى ي. تەرەنتەۆا.

اقمولا وبلىستىق ارداگەرلەر كەڭەسى توراعاسىنىڭ ورىنباسارى شياپ اليەۆ جاستاردىڭ الەۋەتىن ەل دامۋىنا جۇمىلدىرۋ قاجەت ەكەنىن ايتىپ، جۇمىسشى ماماندىقتار جىلى جاريالانعانىن قۇپتادى.

سۋرەت: kisi.kz سايتىنان الىندى.

اقمولا وبلىسىنىڭ كاسىپكەرلەر قۇقىعىن قورعاۋ جانە سىبايلاس جەمقورلىققا قارسى ءىس قيمىل كەڭەسىنىڭ ءتورايىمى ۆالەنتينا گەراششەنكو سالىق رەفورماسىن تالقىلاۋعا كاسىپكەرلەردى تارتۋ ماڭىزدى ەكەنىن ايتتى.

«بۇگىندە ءبىز كاسىپكەرلەردىڭ كەڭ اۋقىمىن پالاتا جانىنداعى جەتى سالالىق كەڭەستىڭ جۇمىسىنا تارتۋعا مۇددەلىمىز. كەڭەستەر جاڭا ەكونوميكالىق ساياسات پەن سالىق رەفورماسىن تالقىلاۋ الاڭىنا اينالىپ وتىر. بۇل بيزنەس قاۋىمداستىعىنا مەملەكەتتىك ورگاندارمەن ءوزارا ءتيىمدى ارەكەتتەسۋگە مۇمكىندىك بەرەدى. كەڭەستەر جۇمىسىنا وبلىس اكىمىنىڭ ورىنباسارلارى، اۋدان اكىمدەرى مەن ورىنباسارلارى، وبلىستىق باسقارما باسشىلارى، سوت پەن پروكۋراتۋرا وكىلدەرى، انتيكوررۋپتسيالىق قىزمەت پەن دەپۋتاتتار قاتىسادى»، – دەپ ناقتىلادى ۆ. گەراششەنكو.

اقمولا وبلىسى تسيفرلاندىرۋ جانە ارحيۆتەر باسقارماسىنىڭ «Smart Aqmola» ءبولىمىنىڭ باسشىسى گۇلىم بەگالينا وز سوزىندە تسيفرلىق ساۋاتتىلىق پەن قاۋىپسىزدىك ماسەلەلەرىنە توقتالىپ، ولاردىڭ ازاماتتىق باستامالار مەن قوعامدىق باقىلاۋدىڭ دامۋىنا اسەر ەتەتىنىن ايتتى.

تالقىلاۋدى قورىتىندىلاي كەلە، قسزي ديرەكتورىنىڭ ورىنباسارى، الاڭ مودەراتورى الۋا جولدىبالينا قوعامدىق مونيتورينگ پەن باقىلاۋ جوبالاردىڭ ساپالى ورىندالۋىن، باستاپقى جوسپارعا سايكەستىگىن جانە بيۋدجەتتىك قاراجاتتىڭ ءتيىمدى جۇمسالۋىن باعالاۋعا مۇمكىندىك بەرەتىنىن اتاپ ءوتتى. كيسي GPS الاڭىنىڭ قاتىسۋشىلارى بۇل ۇدەرىس مەملەكەت باستامالارىن باقىلاۋدى كۇشەيتۋگە، پروبلەمالاردى انىقتاۋعا جانە شەشۋ جولدارىن ۇسىنۋعا مۇمكىندىك بەرەتىنىن ايتتى.

Abai.kz