2025 جىلدىڭ 22 ساۋىرىندە قر پرەزيدەنتىنىڭ جانىنداعى  قر ۇلتتىق عىلىم اكادەمياسى مەن اباي اتىنداعى قازاق ۇلتتىق پەداگوگيكالىق ۋنيۆەرسيتەتى بىرلەسىپ كورنەكتى عالىم، مەملەكەت جانە قوعام قايراتكەرى، حيميا عىلىمىنىڭ الىبى، ۇلتتىق عىلىم اكادەمياسىنىڭ نەگىزىن قالاۋشىلاردىڭ ءبىرى – ەبىنەي ارىستانۇلى بوكەتوۆتىڭ تۋعانىنا 100 جىل تولۋىنا ارنالعان «جارقىن بەينە» اتتى تانىمدىق كەزدەسۋ وتكىزدى.

كەزدەسۋدىڭ باستى ماقساتى – ۇلى عالىمنىڭ باي عىلىمي مۇراسىن دارىپتەپ، ونى جاس ۇرپاققا ۇلگى ەتۋ.

اتالعان تانىمدىق كەزدەسۋگە عالىمنىڭ ۇرپاقتارى، بىرگە قىزمەت اتقارعان ارىپتەستەرى، شاكىرتتەرى، سونداي-اق ەۆنەي ارىستانۇلىنىڭ عىلىمي مۇراسىن زەرتتەپ جۇرگەن وتاندىق جانە شەتەلدىك عالىمدار قاتىستى.

كەزدەسۋدە ءسوز العان حيميا عىلىمدارىنىڭ دوكتورى، پروفەسسور بەكتەنوۆ نەسىپحان ءابجاپارۇلى – ەبىنەي ارىستانۇلى بوكەتوۆتىڭ عىلىم مەن بىلىمگە قوسقان ۇلكەن ۇلەسىن، ونىڭ عىلىمي ورتاداعى ورنى مەن تۇلعالىق ەرەكشەلىكتەرىن زور ىقىلاسپەن ەسكە الدى. عالىمنىڭ عىلىمعا دەگەن ادالدىعى مەن ادىلەتتىلىككە دەگەن تەرەڭ قۇرمەتى ارىپتەستەرىنە عانا ەمەس، شاكىرتتەرىنە دە ايقىن بايقالعان. ە.بوكەتوۆتىڭ زەرتتەۋشىلىك مادەنيەتى مەن ادىستەمەلىك جاڭاشىلدىعى ونىڭ ەڭبەك جولىندا ماڭىزدى ورىن العان. بەكتەنوۆ مىرزا ءوز ەستەلىكتەرىندە ەبىنەي ارىستانۇلىنىڭ كەز كەلگەن ماسەلەنى تەرەڭ ويلاپ، عىلىمي تۇرعىدان قاراعانىن جانە ارقاشان ءوز ۇستانىمىنان اينىماي، شىندىقتى ىزدەپ، عىلىمي تالداۋلار مەن شەشىمدەردە ادىلدىكتى باستى قاعيدا رەتىندە ۇستانعانىن اتاپ ءوتتى.

سونداي-اق، ەبىنەي ارىستانۇلىنىڭ قول استىندا ەڭبەك جولىن باستاعان پەداگوگيكا عىلىمدارىنىڭ دوكتورى، پروفەسسور دجۋسۋباليەۆا دينا مۋفتاحوۆنا – ەبىنەي ارىستانۇلى بوكەتوۆتىڭ تەك عالىم عانا ەمەس، جوعارى ادامگەرشىلىك قاسيەتتەرى بار تۇلعا ەكەنىن اتاپ ءوتتى. ونىڭ عىلىم مەن بىلىمگە دەگەن ادالدىعى مەن ىنتا-جىگەرى بوكەتوۆتى قۇرمەتتى عالىم عانا ەمەس، شاكىرتتەرى مەن ارىپتەستەرى اراسىندا ۇلكەن بەدەلگە يە ەتكەن.

دينا مۋفتاحوۆنا ءوز ەستەلىكتەرىندە ەبىنەي ارىستانۇلىنىڭ جاس عالىمدارعا قامقورلىق جاساپ، ءاردايىم باعىت-باعدار بەرىپ، عىلىمي كەڭەس ۇسىنعانىن ايتتى. عالىمنىڭ بۇل قاسيەتتەرى جاس زەرتتەۋشىلەرگە ۇلكەن ۇلگى بولىپ، عىلىم جولىندا تابىستى بولۋىنا جول اشتى. بوكەتوۆتىڭ ادامگەرشىلىك قاسيەتتەرى مەن عىلىمي بىلىكتىلىگى بۇگىنگى ۇرپاق ءۇشىن قۇندى مۇرا بولىپ قالدى.

ال عالىمنىڭ قىزى بوكەتوۆا اقسۇلۋ ەبىنەيقىزى –  اكەسى ەبىنەي ارىستانۇلى بوكەتوۆتىڭ وتباسى، وتان جانە عىلىم الدىنداعى جاۋاپكەرشىلىگىن تەرەڭ تەبىرەنىسپەن ەسكە الدى. ول اكەسىنىڭ وتباسى ءۇشىن ۇلكەن ۇلگى بولا وتىرىپ، عالىم رەتىندە دە، ادام رەتىندە دە وزىنە جۇكتەلگەن جاۋاپكەرشىلىكتى ءاردايىم جوعارى دەڭگەيدە ورىنداعانىن اتاپ ءوتتى. اقسۇلۋ ەبىنەيقىزى اكەسىنىڭ عىلىمعا دەگەن ادالدىعى مەن شەكسىز سۇيىسپەنشىلىگىن، سونداي-اق ءوز وتانىنا قىزمەت ەتۋگە دەگەن ۇمتىلىسىن ەرەكشە ماڭىزعا يە قاسيەت رەتىندە سيپاتتادى. اكەسىنىڭ ەڭبەگى مەن تۇلعالىق ەرەكشەلىكتەرى ونىڭ وتباسى مەن قوعام ءۇشىن ۇلكەن رۋحاني مۇرا بولىپ قالا بەرمەك.

كەزدەسۋگە جاس عالىمدار، ءبىلىم الۋشىلار، ۇستازدار مەن زەرتتەۋشى قاۋىم وكىلدەرى قاتىستى. بۇل – ۇلت عىلىمىنىڭ دارا تۇلعاسىن ۇلىقتاۋ عانا ەمەس، جاڭا بۋىنعا ۇلگى بولار رۋحاني ساباق بولدى.

ۇلى عالىمنىڭ ونەگەسى – جاس ۇرپاق ءۇشىن شامشىراق!

Abai.kz