ءماجىلىس توراعاسى ەرلان قوشانوۆ ۇلتتىق كىتاپ كۇنى اياسىندا وتكەن «ۇلتتىق كىتاپ» بايقاۋى جەڭىمپازدارىن سالتاناتتى ماراپاتتاۋ راسىمىنە قاتىستى.

ۇلتتىق كىتاپ كۇنى قازاقستاندا بيىل العاش رەت وتكىزىلىپ جاتىر. مەملەكەت باسشىسى قاسىم-جومارت توقاەۆ اتىراۋدا وتكەن ۇلتتىق قۇرىلتاي وتىرىسىندا بىلىمگە قۇشتارلىقتى، وقۋعا دەگەن سۇيىسپەنشىلىكتى بىلدىرەتىن مەرەكەنى بەلگىلەۋدى تاپسىرعان بولاتىن. وسىعان وراي «ۇلتتىق كىتاپ» ۇلتتىق بايقاۋى ۇيىمداستىرىلىپ، وندا وتاندىق جازۋشىلار، كىتاپ شىعارۋشىلار، يلليۋستراتورلار مەن اۋدارماشىلار جەڭىمپاز اتاندى.

سۋرەت: ت. تانىباەۆ.

ەرلان قوشانوۆ ەڭ الدىمەن جاقىندا عانا دۇنيەدەن وزعان كورنەكتى قازاق جازۋشىسى، ادەبيەت مايتالمانى اكىم تارازيدى ەسكە الىپ، كوڭىل ايتتى.

ودان ءارى سالتاناتتى ءىس-شارانىڭ ءمان-ماڭىزىنا توقتالىپ، قازىرگى زاماندا اقپارات كوزدەرىنىڭ كوپتىگىنە قاراماستان، كىتاپتىڭ ورنى ەرەكشە ەكەنىن اتاپ ءوتتى.

سۋرەت: ت. تانىباەۆ.

– سان عاسىرلار وتسە دە، كىتاپتىڭ ادامزات ءۇشىن ماڭىزى وزگەرگەن جوق. بۇگىندە كىتاپ – زياتكەر ۇلت پەن سانالى قوعام قالىپتاستىرۋدىڭ نەگىزگى قۇرالىنا اينالدى. قازىرگى تاڭدا قولدانىپ جۇرگەن بارلىق تەحنولوگيا، مەديتسينا، ونەر ءبارى دە كىتاپ وقۋ ارقىلى دامىعان. سوندىقتان مەملەكەت باسشىسى ايتقانداي، كىتاپ ۇلتتىڭ رۋحاني قۇندىلىعىنا اينالۋى ءتيىس. ۇلتتىق كىتاپ كۇنىن اتاپ ءوتۋدىڭ باستى ماقساتى – وسى، – دەدى ءماجىلىس سپيكەرى.

ەرلان قوشانوۆ ءوز سوزىندە وتاندىق كىتاپ شىعارۋ سالاسىنداعى وزەكتى ماسەلەلەرگە دە توقتالدى. اتاپ ايتقاندا، سىرتقى نارىققا تاۋەلدىلىك، قازاق تىلىندەگى ادەبيەتتىڭ ۇلەسى از بولۋى جانە باسقا دا تۇيتكىلدى جايتتارعا نازار اۋداردى.

سۋرەت: ت. تانىباەۆ.

– پرەزيدەنت ۇلتتىق قۇرىلتايدا يدەولوگيا سالاسىنداعى باستى باعىتتاردىڭ ءبىرى – كىتاپ شىعارۋ ەكەنىن باسا ايتتى. قازىرگى تاڭدا مەملەكەت بۇل باعىتقا ەرەكشە كوڭىل ءبولىپ وتىر. مىسالى، پارلامەنتتە قىزۋ تالقىلانىپ جاتقان جاڭا سالىق كودەكسى جوباسىندا دەپۋتاتتار وتاندىق كىتاپ باسپالارىن قوسىلعان قۇن سالىعىنان بوساتۋ جونىندە ۇسىنىس ەنگىزدى. بۇل ماسەلەدە ۇكىمەتپەن ورتاق شەشىمگە كەلەمىز دەپ ۇمىتتەنەمىز، – دەدى ءماجىلىس توراعاسى.

سونىمەن قاتار مەملەكەت باسشىسىنىڭ قولداۋىمەن ەلىمىزدە كىتاپحانالار جۇيەسى جاڭعىرتىلىپ جاتقانى، كىتاپحاناشىلاردىڭ جالاقىسى كوتەرىلىپ، تسيفرلىق كىتاپحانالار دامىپ جاتقانى ايتىلدى. بۇل ءوز ناتيجەسىن بەرۋدە. بۇگىندە رەسپۋبليكادا شامامەن 4 مىڭ كىتاپحانا جۇمىس ىستەيدى، ولاردىڭ تۇراقتى پايدالانۋشىلارى 5 ميلليوننان اسا ادام، ونىڭ بەستەن ءبىرى – بالالار.

«AMANAT» پارتياسىنىڭ جەتەكشىسى رەتىندە ەرلان قوشانوۆ «KITAP – AMANAT» پارتيالىق جوباسىنىڭ ماڭىزدىلىعىنا دا توقتالدى. بۇل جوبا وتاندىق كىتاپتاردى كەڭىنەن ناسيحاتتاۋدى كوزدەيدى. قازىرگى تاڭدا بۇل جوبا اياسىندا ەلىمىزدىڭ بارلىق وڭىرىندەگى پارتيا فيليالدارى جانىنان 24 ورتالىق اشىلعان. وندا كىتاپ كورمەلەرى، اۆتورلارمەن كەزدەسۋلەر جانە وزگە دە ءىس-شارالار ۇيىمداستىرىلادى.

سالتاناتتى ءراسىم سوڭىندا ءماجىلىس سپيكەرى ۇلتتىق بايقاۋدىڭ باس جۇلدەسى – «جىل كىتابى» گران-ءپريىن تابىستادى. «ۇلتتىق كىتاپ» ۇلتتىق بايقاۋىندا «قازاقستاننىڭ تاريحي تۇلعالارى» سەرياسى ءۇشىن «الماتى كىتاپ» باسپاسىنىڭ پرەزيدەنتى گاۋحار سايماساەۆا ماراپاتقا يە بولدى.

سۋرەت: ت. تانىباەۆ.

ۇلتتىق بايقاۋ 10 نوميناتسيا بويىنشا وتكىزىلدى: «بالالارعا ارنالعان ۇزدىك كىتاپ»، «ۇزدىك كوميكس»، «نون-فيكشن جانرىنداعى ۇزدىك كىتاپ»، «دەتەكتيۆ جانرىنداعى ۇزدىك كىتاپ»، «ساتيرا جانرىنداعى ۇزدىك كىتاپ»، «يلليۋستراتسيالانعان ۇزدىك كىتاپ»، «اۋدارماداعى ۇزدىك كىتاپ»، «فانتاستيكا جانرىنداعى ۇزدىك كىتاپ»، «ۇزدىك باسپا ءۇيى» جانە «جىل كىتابى» گران-ءپريى.

ماراپاتتاۋ راسىمىنە مادەنيەت جانە اقپارات ءمينيسترى ايدا بالاەۆا، مادەنيەت قايراتكەرلەرى، قوعام بەلسەندىلەرى، پارلامەنت دەپۋتاتتارى قاتىستى.

Abai.kz