2025 جىلى ۇلى وتان سوعىسىنىڭ باستالعانىنا 80 جىل تولىپ وتىر. بۇل — تاريحتىڭ زۇلمات جىلدارىن، ميلليونداعان ادامنىڭ جانقيارلىق ەرلىگىن، حالقىمىزدىڭ تەڭدەسسىز ءتوزىمى مەن قاھارماندىعىن ەسكە الاتىن ەرەكشە كەزەڭ.

"ەشكىم دە، ەشنارسە دە ۇمىتىلمايدى" دەگەن ۇران — تەك ءسوز ەمەس، ول ۇرپاقتار جادىنا ماڭگىلىك قاشالعان قاسيەتتى امانات. ۇلى وتان سوعىسى 1941 جىلدىڭ 22 ماۋسىمىندا باستالدى. بۇل كۇنى فاشيستىك گەرمانيا كەڭەس وداعىنا تۇتقيىلدان شابۋىل جاساپ، بۇكىل حالىقتىڭ تاعدىرى كۇرت وزگەردى. قازاق جەرىنەن 1,2 ميلليوننان استام ادام مايدانعا اتتاندى. ولاردىڭ قاتارىندا قايسار جاۋىنگەرلەر، ارۋ قىزدار مەن ەرەن ەڭبەكتىڭ شەبەرلەرى بولدى. مايدان دالاسىندا قان توگىپ، تىلدا قاجىرلى ەڭبەك ەتكەن ءاربىر جاننىڭ ەرلىگى — بۇگىنگى بەيبىت ءومىرىمىزدىڭ نەگىزى.

قازاقستاندىق باتىرلار — باۋىرجان مومىشۇلى، ءاليا مولداعۇلوۆا، مانشۇك مامەتوۆا، تالعات بيگەلدينوۆ سىندى ەرجۇرەك تۇلعالار بۇكىل الەمگە قازاق حالقىنىڭ قاھارماندىق رۋحىن پاش ەتتى. ءبىزدىڭ ەلدىڭ مايدانعا قارۋ-جاراق پەن ازىق-تۇلىك جەتكىزىپ، جەڭىسكە ۇلەس قوسقانى دا تاريحتا التىن ارىپتەرمەن جازىلدى.

بۇگىنگى ۇرپاق ءۇشىن سوعىستىڭ قاسىرەتتى ساباعى — بەيبىت ءومىردىڭ قادىرىن ءتۇسىنۋ، ەلگە قىزمەت ەتۋدىڭ قاسيەتتى پارىز ەكەنىن ۇعىنۋ. 80 جىلدىق تاعزىم — وتكەننىڭ ەرلىگىن ۇمىتپاي، ءاردايىم جۇرەك تۇكپىرىندە ساقتاپ، بولاشاققا بەيبىت ءومىردى امانات ەتۋگە شاقىرادى. ءار جىلدىڭ 9 مامىرىندا ەل كولەمىندە ەسكەرتكىشتەرگە گۇل شوقتارىن قويۋ راسىمدەرى، ارداگەرلەرگە قۇرمەت كورسەتۋ — بارلىعى دا وسى ۇلى ەرلىكتى ۇلىقتاۋدىڭ كورىنىسى. ەلىمىزدە جاسالىپ جاتقان ءاربىر تاعزىم ءراسىمى — وتكەنگە دەگەن قۇرمەت پەن بولاشاققا سەنىمنىڭ جارقىن كورىنىسى. ءبىز، ۇرپاقتارى، سول سۇراپىل جىلداردىڭ جاۋىنگەرلەرىنە، تىلداعى ەڭبەك مايتالماندارىنا باس يەمىز. ولاردىڭ جاساعان ەرلىگى ماڭگى جادىمىزدا قالادى. ۇلى وتان سوعىسىنىڭ 80 جىلدىعى — تەك وتكەندى ەسكە الۋ ەمەس، ول — ەرلىك پەن بىرلىكتىڭ ۇلى ساباعى. ءبىز بۇگىنگى بەيبىت ءومىرىمىز ءۇشىن جانىن قيعان بوزداقتاردىڭ الدىندا ماڭگى قارىزدارمىز. ولاردىڭ باتىرلىعى — ءبىزدىڭ جۇرەگىمىزدە، تاريحىمىزدا، بولاشاعىمىزدا.بۇگىنگى ۇرپاق بەيبىت اسپان مەن تىنىش ءومىردىڭ قادىرىن ءبىلىپ، اتا-بابا اماناتىن كوزدىڭ قاراشىعىنداي قورعاۋى ءتيىس.

"ەشكىم دە، ەشنارسە دە ۇمىتىلمايدى" دەگەن ۇلى ۇران — ۇلتتىڭ رۋحىن ساقتايتىن، ۇرپاقتى ۇلى ماقساتتارعا جەتەلەيتىن ماڭگىلىك ۇندەۋ.

باعلان تاشيموۆ

Abai.kz