ارماندار ورىندالادى! الماتىلىق وقۋشىلار ەرنۇر ەرەجەپ مەن اسلان قابدۋللوۆ حالىقارالىق «Robotek Grand Tournament» چەمپيوناتىندا قازاقستان-بريتان تەحنيكالىق ۋنيۆەرسيتەتىنىڭ اقپاراتتىق تەحنولوگيالار جانە ينجەنەريا مەكتەبى گرانتىن جەڭىپ الدى.  بۇل – ءاربىر جاس تالاپكەر  وقۋعا ءتۇسۋدى ارماندايتىن بەدەلدى وقۋ ورنى. ال جارىسقا اباي وبلىسى ءۇرجار اۋدانىنان كەلگەن دميتري پولەجاەۆ الماتى ەنەرگەتيكا جانە بايلانىس ۋنيۆەرسيتەتىنىڭ بولاشاق ستۋدەنتى اتاندى. 

استانادا حالىقارالىق «Robotek Grand Tournament» چەمپيوناتى ءوز مارەسىنە جەتتى. چەمپيوناتتىڭ بارلىق رەگلامەنتتەرى – اۆتورلىق جانە وتاندىق زياتكەرلىك تەحنولوگيالارعا نەگىزدەلگەن. 

سۋرەت: instagram.com/robotek_grand_tournament سايتىنان الىندى.

«Robotek Grand Tournament» ءتۋرنيرىن تانىمال «Robotek» كومپانياسى «دارىن» رەسپۋبليكالىق عىلىمي-پراكتيكالىق ورتالىعى جانە  «استانا دارىنى» ۇيىمىنىڭ بىرلەسۋىمەن جۇزەگە اسىرىلىپ كەلەدى. 

بەدەلدى چەمپيونات الاڭىنا 17 ايماقتىڭ وبلىستىق تۋرنيرلەرىنىڭ جەڭىمپازدارى شىقتى. جالپى العاندا جارىستا 9 بەن 17 جاس ارالىعىنداعى بىرنەشە جاس توپتارىنداعى 350-دەن استام مەكتەپ وقۋشىسى جەتى سانات بويىنشا باق سىناستى.  

بيىل قازاقستاندىق تۋرنيرگە العاش رەت اقش دەلەگاتسياسى قاتىستى، سونىمەن قاتار استاناعا بولگاريا، ءازىربايجان، مولدوۆا، وزبەكستان، قىرعىزستان، تاجىكستاننىڭ ۇزدىك كوماندالارى (بارلىعى 25-تەن استام شەتەلدىك دەلەگاتسيا) ۇشىپ كەلەدى.  

سۋرەت: instagram.com/robotek_grand_tournament سايتىنان الىندى.

چەمپيوناتتىڭ باستى جۇلدەسى – «ەل كۋبوگى»  العاش رەت استانادا قالدى. «ەڭ ۇزدىك اۋىلدىق كوماندا» اتاعىن الماتى وبلىسى قاراساي اۋدانىنان كەلگەن ايگەرىم ءابۋحانوۆا مەن ەرسۇلتان قاسىم جەڭىپ الدى. «ەڭ ۇزدىك شەتەلدىك كوماندا» كۋبوگى ەكىنشى رەت وزبەكستاننىڭ شىرشىق قالاسىنا جول تارتتى. ال «ەڭ ۇزدىك ينجەنەرلىك شەشىم» اتالىمى بويىنشا استانادان ەركەجان حۋانداگ پەن ازامات ادايۇلى ۇزدىك دەپ تانىلدى. 

«Robotek Grand Tournament» چەمپيوناتى اياسىندا قازاقستاندىق شاڭىراقتىڭ استىندا الەمنىڭ ەڭ ۇزدىك روبوتوتەحنيكتەرى باس قوستى. استانادا «Robotek»-ءتىڭ جاڭا سەرىكتەستەرىمەن – بولگاريانىڭ ۆارنا قالاسىنداعى «Robotiks» ءبىلىم بەرۋ ورتالىعى جانە مولدوۆا استاناسىنداعى RobotX Academy ورتالىعىمەن ىنتىماقتاستىق تۋرالى مەموراندۋمدارعا قول قويىلدى. 

«Robotek Grand Tournament» جارىسى «Robotek»-ءتىڭ سەنىمدى سەرىكتەستەرى ارقاسىندا جۇزەگە استى. ولار ەلدەگى STEM-ءبىلىم بەرۋ مەن روبوتوتەحنيكا سالاسىنىڭ دامۋىنا اۋقىمدى قولداۋ كورسەتىپ، جاڭا ۇرپاقتىڭ ينجەنەرلىك ەليتاسىن قالىپتاستىرۋعا ناقتى ەڭبەك ەتۋدە: قازاقستاندىق ALLUR اۆتوكولىك كومپانياسى، Silkroad Innovation Hub, Arystan IT Group جانە بازيسنىي ماگازين. 

Abai.kz