ترامپتىڭ اق ۇيگە قايتا ورالعانىنا 4 اي تولدى. ول سايلاۋالدى ۋادەسىندە گازا قاقتىعىسى، رەسەي-ۋكراينا سوعىسى، يران ماسەلەسىن رەتتەۋگە ۋادە بەرگەن ەدى. بىراق حاماس پەن يزرايل، رەسەي مەن ۋكراينا اراسىندا كەلىسسوزدەر جۇرگەنمەن ماسەلە وڭدى شەشىلگەن جوق. يران دا اتوم وندىرىسىنە بايلانىستى اقش ۇسىنعان كەلىسىم شارتتى قابىلدامادى. ءۇندىستان مەن پاكىستان اراسى قايتا ۋشىقتى. سوعىسىپ بارىپ توقتادى.

ساياسي ساراپشىلار "مەن پرەزيدەنت بولعاندا، سوعىس بولماۋشى ەدى" دەيتىن ترامپتى "بەيبىتشىلىك ورناتۋشى" دەپ باعالاۋعا ءالى ەرتە دەپ سانايدى. ونىڭ "امەريكا مۇددەسى الدىنعى ورىندا" دەگەن ۇستانىمى سىرت كوزگە الەمنەن بولەكتەنۋ بولىپ كورىنگەنىمەن، ءىس جۇزىندە استارىندا قالىپتاسقان ءداستۇرلى گەوساياسي قاتىناستاردى بۇزۋ ماقساتى جاتىر ەكەن.

ۋاقىت وزعان سايىن، ونىڭ بەرگەن ۋادەلەرى ورىندالماي، ءسوزى مەن ءىسى قابىسپاي، باستاعان باستامالارى سيىرقۇيمىشاقتانىپ بارا جاتقانداي كورىنەدى. ونىڭ باستى سەبەبى ءار ءشوپتىڭ باسىن ءبىر شالىپ، ءبىر ماسەلەگە تىياناقتى قاراماي، ءوز پوزيتسياسىن مىڭ قۇبىلتۋىندا ەكەن. ساياسي تۇلعالارعا كوزقاراسى دا ۋاقىت سايىن وزگەرىپ وتىرعان. ولاردىڭ قاتارىندا رەسەي باسشىسى پۋتينگە، قىتاي باسشىسى سيگە، يزرايل باسشىسى نەتانياحۋگە، ۋكراينا پرەزيدەنتى زەلەنسكيگە كوزقاراستارى بار.

ول ءوزىن "الەمگە بەيبىتشىلىك ورناتۋشى" رەتىندە كورسەتۋ ءۇشىن سوعىسۋشى تاراپتاردى كەلىسىم شارتقا وتىرعىزۋ ءۇشىن عانا كەلىسىم ازىرلەپ، ءىس جۇزىندە مازمۇنىنا ءمان بەرمەگەن. بۇل تاكتيكاسى سىرت كوزگە ۇلكەن ناتيجە بولىپ كورىنگەنمەن، شىندىق كەرىسىنشە بولىپ شىعۋدا.

ترامپ سونداي-اق، الەمدىك ىقپالدى "جۇمساق كۇش" ارقىلى جۇرگىزۋ جولىنان باس تارتىپ (USAID ۇيىمىن جابۋ) ەسكى زاماندارداعى تەرريتوريا كەڭەيتۋ ستراتەگياسىن قايتا تىرىلتكەن. ونىڭ پاناما مەن گرەلانديانى اقش-قا قوسۋ، كانادانى امەريكانىڭ 51-ءشى شتاتىنا اينالدىرۋ جوسپارى سونىڭ كورىنىسى.

ترامپ الەم ءتارتىبىن بۇزۋشى ما، تۇزەۋشى مە دەگەن سۇراققا كەلسەك، ول ەڭ الدىمەن ساۋداگەر. ونىڭ پارسى شىعاناعىنداعى ءۇش باي ەلگە ساپارى سونى ايگىلەدى. ول بەيبىتشىلىككە دە پايدا كوزىمەن قارايدى. ۋكراينانىڭ سيرەك مەتالل قورىنا كوز سالۋى، ناتو مۇشەلەرىنەن قورعانىس قارجىسىن كوبەيتۋدى تالاپ ەتۋى - سونىڭ ايعاعى. ونىڭ ارىپتەستەرى دە بەيبىتشىلىكتىڭ تەگىن كەلمەيتىنىن، ۇلكەن بوداۋ بەرۋدى تالاپ ەتەتىنىن تۇسىنە باستاعانداي.

قورىتا كەلگەندە، ترامپتىڭ كوزدەگەنى ءوز وبرازى، امەريكانىڭ ابرويى ەمەس، ءوزىنىڭ بايلىعى، بيلىگى، اق ءۇيدىڭ قۇزىرەتى. باسقاشا سيپاتتاساق، ەگەر ول نوبەل سىيلىعىن الۋعا ۇمتىلسا، ول سىيلىقتىڭ الەمدىك بەدەلىنە ەمەس، 1 ميلليون سىياقىسىنا قىزىققان بولىپ شىعادى.

Abai.kz