ەرلان قوجاعاپانوۆ 1 ملرد تەڭگە جىمقىرۋ ءىسى بويىنشا لاۋازىمدىق وكىلەتتىكتەرىن اسىرا پايدالاندى دەپ تانىلدى.

استانا قالاسىنىڭ قىلمىستىق ىستەر جونىندەگى سوتى بۇرىنعى سپورت ۆيتسە-ءمينيسترى ەرلان قوجاعاپانوۆتى ءۇش جىلعا باس بوستاندىعىنان ايىردى.

ەرلان قوجاعاپانوۆ قر قك 361-بابى، 4-بولىگى – "اۋىر زارداپتارعا اكەپ سوققان لاۋازىمدىق وكىلەتتىكتەرىن اسىرا پايدالانۋ" بابى بويىنشا كىنالى دەپ تانىلدى. ءىس 2018 جىلى قازاقستان مەن رەسەي اراسىنداعى وڭىرارالىق ىنتىماقتاستىق فورۋمىن ۇيىمداستىرۋعا بولىنگەن 1 ملرد تەڭگە كولەمىندەگى شىعىنمەن بايلانىستى.

ءىس بويىنشا ەكىنشى فيگۋرانت – فورۋمدى ۇيىمداستىرۋمەن اينالىسقان Success K كومپانياسىنىڭ باسشىسى لياززات كوككوزوۆا قر قك 190-بابى، 4-بولىگى – "الاياقتىق" بابى بويىنشا كىنالى دەپ تانىلىپ، 5 جىلعا باس بوستاندىعىنان ايىرىلدى.

ەرلان قوجاعاپانوۆتىڭ ءىسى بويىنشا سوت پروتسەسى 5 ايدان استام ۋاقىتقا سوزىلدى. ول تاعىلعان ايىپتاردى قولدان جاسالعان دەپ اتاپ، كۋاگەرلەرگە انتيكور تاراپىنان قىسىم كورسەتىلگەنىن ايتتى جانە ءىستى وبەكتيۆتى شەشۋ ءۇشىن نەيروجەلىگە بەرۋدى ۇسىنعان بولاتىن.

قازاقستان مەن رەسەي اراسىنداعى وڭىرارالىق ىنتىماقتاستىق فورۋمى 2018 جىلى پەتروپاۆل قالاسىندا ءوتتى. فورۋمعا نۇرسۇلتان نازارباەۆ پەن ۆلاديمير پۋتين قاتىسقان. ۇيىمداستىرۋ جۇمىستارىن Success كومپانياسى جۇرگىزگەن. ەرلان قوجاعاپانوۆ تەك 2024 جىلى – فورۋم وتكەننەن كەيىن 6 جىلدان سوڭ 1 ملرد تەڭگەنى جىمقىردى دەگەن كۇدىكپەن ۇستالدى.

Abai.kz