قۇرمەتتى بەيبىت وكسىكبايۇلى! 

وتكەن جىلى الاكول اۋدانى، ىرعايتى اۋىلدىق وكرۋگىنىڭ ءبىر توپ تۇرعىنى حابارلاسىپ، وزدەرىنىڭ نەشە جۇزدەپ، الدى مىڭداپ مال ءوسىرىپ وتىرعانىن، بىراق ونداعان جىلدان بەرى قىتاۋ، جايلاۋلىق جەر تەلىمىنە زار بولىپ كەلە جاتقاندارىن ايتىپ، كومەك سۇراعان بولاتىن. ۇعىسا كەلسەم، ولاردىڭ بارىشەتتەن كوشىپ كەلىپ، وسى وڭىرگە قونىستانعان قانداستارىمىز ەكەن. ءبارى قازاقستان ازاماتتىعىن الىپ، ءوز جاندارىن وزدەرى باعىپ كەلە جاتقان ەڭبەكقور جاندار بولىپ شىقتى. 

ءيا، مەن جيىرما جىلدان استام ۋاقىتتان كوشى-قون ساياساتىمەن تىنباي اينالىسىپ كەلە جاتقان جىگىتپىن. كوشى-قون ءۇردىسىن رەتتەۋگە ارنالعان زاڭدار مەن نورماتيۆتىك قۇجاتتارعا ەلەۋلى وزگەرىستەر مەن تولىقتىرۋلار ەنۋىنە ىقپال ەتكەن تاجىريبەلى مامانمىن. ۇلى كوشتى ەكى رەتكى اۋىر قاتەردەن – 2013 تيمۋر قۇلىباەۆ پەن كارىم ءماسىموۆتىڭ، 2022 جىلى ايدا بالاەۆانىڭ قاستاندىعىنان امان الىپ قالعان بەلسەندىمىن.  

ءتىپتى، ءوزىم دە كەزىندە قىتايدان ورالعانمىن... 

مەن ەشقاشان وپپوزيونەر دە، وپپوزيتسيالىق توپتاردا دا بولعان ەمەسپىن.  

بىراق، ەكى بيلىك تۇسىندا دا اتقارۋشى بيلىك پەن زاڭ شىعارۋشى ورگانداردىڭ جىبەرگەن قاتەلىكتەرىن ايتىپ، ولاردى اياۋسىز سىنايتىنىم راس. 

مەن بۇل ارەكەتىمدى پرەزيدەنتىمىزگە جاساعان كومەگىم دەپ ەسەپتەيمىن. مەن قاسىم-جومارت كەمەلۇلىنىڭ بىردەن-ءبىر قولداۋشىسىمىن... 

سوندىقتان وتە جاقسى بىلەمىن، شەتتەن ورالعان اعايىندار، اسىرەسە قىتاي مەن ماڭعوليادان كەلگەن اعايىندارىمىز وتە ەڭبەكقور، ءوزىن-ءوزى جۇمىسپەن قامتۋعا جەتىلگەن. ولار قابلەتتەرىنە قاراي جۇمىس جاساپ، ەڭبەكتەرىنە قاراي اقى الۋ قايعيداسىن وتە جاقسى مەڭگەرگەن. بىرەۋگە قول جايۋجى، ۇكىمەتكە ماسىل بولدى بىلمەيدى.  

مەن ولاردىڭ مۇنداي جاقسى قاسيەتىن «نۇر وتان» پارتياسىنىڭ رەسپۋبليكالىق قوعامدىق قابىلداۋ بولمەسىندە كونسۋلتانت بولىپ التى جىل قىزمەت ەتكەن كەزىمدە ءتىپتى دە انىق بايقادىم. 

قازاقستاندا ولاردى قينايتىن ەكى-اق نارسە بار. 

ونىڭ ءبىرىنشىسى، قۇجاتتانۋداعى قولدان جاسالعان كەدەرگىلەر، ەكىنشىسى  شارۋاشىلىق جۇرگىزۋگە قاجەتتى جەر تەلىمدەرىنىڭ جەرگىلىكتى بيلىك جاعانان ءوز ۋاعىندا بەرىلمەۋى. 

قۇدايعا شۇكىر، تيمۋر قۇلىباەۆ پەن كارىم ءماسىموۆتىڭ ىقپالىمەن زاڭ ارقىلى جاسالعان قۇجاتتانۋداعى كەدەرگىلەر بۇرىنعىدان ازايدى. 

ال، جەر تەلىمىن الۋعا قاتىستى تۇيىندەر كوبەيمەسە، ازايماي تۇر. 

ءبىر وكىنىشتى جەرى، شەتتەن ورالعان اعايىنداردىڭ وسى ەڭبەكقورلىعى مەن پىسىقتىعىنىڭ ارقاسىندا جۇزدەپ، مىڭداپ مال وسىرگەنى، بايلىققا قول جەتكىزگەنى  كەيبىر جوعارى بيلىك وكىلدەرى مەن جەرگىلىكتى اكىم-قارالاردىڭ كوزىنە سۇيەل بولىپ قادالۋدا، كوكىرەگىنە شەمەن بولىپ بايلانۋدا ەكەنىن دە مەن جاقسى بىلەمىن. 

بۇل – ناعىز اقىماقتاردىڭ، ساناسىزداردىڭ ارەكەتى! 

اقىلدى باسشى بۇلاي بولمايدى! 

قايتا، ونداي ەڭبەكقور ازاماتتاردىڭ پروبلەماسىن ءبىرىنشى كەزەكتە شەشىپ، ولاردى حالىققا ۇلگى رەتىندە كورسەتىپ، دارىپتەپ وتىرۋعا ءتيىس قوي... 

ءسويتىپ، ىرعايتى اۋىلدىق وكرۋگى تۇرعىندارىنىڭ سول ءوتىنىشىن ايتىپ، الاكول اۋدانىنىڭ اكىمى الماس ابدينوۆتىڭ اتىنا ارنايى حات جازعام. الاكولگە دەمالۋ عا بارعاندا، جەرگە مۇقتاج بولىپ كەلە جاتقان اۋىل تۇرعىندارىنىڭ ءتورت-بەسەۋىن ەرتىپ بارىپ، الماس ساپارعاليۇلىنىڭ وزىمەن دە كەزدەسكەم. 

سوندا كوردىم، الماس ابدينوۆ الدىنا كەلگەن ادامدارمەن دۇرىستاپ سويلەسۋدىڭ ءوزىن بىلمەيتىن باسشى ەكەن. مەن ەرتىپ بارعان ازاماتتارعا داۋىس كوتەرىپ، ءتاپ ءبىر جاۋ كورگەندەي تىكسىنگەن بولاتىن. 

ودان دا سوراقىسى، جەرگە بايلانىستى كارتاسى وسىدان ون جىل بۇرىنعى كۇيىندە ەكەن. بيلىك اۋىسىپ، اتا زاڭ ەكى رەت وزگەرىپ، جەر كودەكسىنە ەلەۋلى وزگەرتۋلەر مەن تولىقتىرۋلار ەنگىزىلگەنىمەن، ىرعايتى اۋىلدىق وكرۋگىنىڭ جەر كارتاسى باياعى قالپىندا قالىپتى. 

ءسويتىپ، بۇل اۋداننىڭ اكىمىنەن ءتۇڭىلىپ قايتقان جايىم بار... 

مىنە، سودان بەرى ءبىر جىل ءوتتى، جۇزدەپ، مىڭداپ مال وسىرگەن سول ىرعايتى اۋىلدىق وكرۋگى تۇرعىندارىنىڭ جەر تەلىمى ءالى شەشىلگەن جوق! 

ەندى ول از بولعانداي، جاقىندا اقتۇبەك اۋىلىنىڭ ءبىر توپ ازاماتى حابارلاسىپ، وزدەرىنىڭ الاكول اۋداندىق جەر بولىمىندە وتكەن كونكرۋسقا قاتىسقانىن جەر تەلىمىن الۋ ءۇشىن قاتىسقاندارىن، كوميسسيا تاراپىنان ادىلەتسىزدىككە تاپ بولعاندارىن جەتكىزدى. 

ولاردىڭ ايتۋىنشا، 2025 جىلعى  28 ءساۋىر، ساعات 10:00-دە كوميسسيا جەرگە قاتىستى كونكۋرس وتكىزگەن. 

ناتيجەسىندە،  تەك، «اlakol-Press» اۋداندىق قوعامدىق -ساياسي گازەتىنىڭ باس رەداكتورى المات ەسەنبەكوۆ ءاربىرىن ءجۇز مىڭ تەڭگەدەن جاساعان بيزنەس-جوسپارلارىنىڭ يەلەرى عانا اتالعان كونكۋرستا كونكۋرس وتكىزگەن كوميسسيانىڭ 100% قولداۋىنا يە بولىپ، جەڭىسكە جەتىپتى. 

ال، قالعان 25, 50 مىڭ تەڭگەگە وزگە مامانعا جاساتقان جانە كونكۋرسقا قاتىسۋشى ۇمىتكەرلەردىڭ وزدەرى دايىنداعان بيزنەس-جوسپارلارىرىنىڭ بارلىعى وتپەي قالىپتى.  

كونكۋرس وتەردىڭ الدىندا اقتۇبەك اۋىلىنىڭ اكىمى مۇرات احمەتوۆ ۇگىت-ءناسيحات جۇرگىزىپ، الاكول اۋداندىق قوعامدىق -ساياسي گازەتىنىڭ باس رەداكتورى -الماس ەسەنبەكوۆكە ءاربىرىن ءجۇز مىڭ تەڭگەدەن جاساعان بيزنەس-جوسپارى بار ۇمىتكەرلەردىڭ كونكۋرستان سۇرىنبەي وتەتىنىن ايتقان كورىنەدى. ءتىپتى، ادامدارىن جىبەرىپ، ايتپەسە كونكۋرستان ۇتپايسىڭدار دەپ، قورقىتقان سەكىلدى. 

بۇل كەلەڭسىزدىك تۋرالى ماعان سول كونكۋرستان وتپەي قالعان ازاماتتاردىڭ وزدەرى ايتتى. 

ال، ادىلەتسىزدىككە ۇشىرادىق دەگەن اقتۇبەك اۋىلى تۇرعىندارىنىڭ بيزنەس-جوسپارلارىن ارزان باعاعا جاساپ بەرگەن ارنۇر توقانۇلى دەگەن ازاماتپەن دە سويلەستىم. 

ارنۇر توقانۇلى وسىعان دەيىن «اتا مەكەن» كاسىپكەرلەر پالاتاسىندا سەگىز جىل بويى بيزنەس-جوسپارلار جاساپ كەلگەن تاجىريبەلى مامان بولىپ شىقتى. قازىر ءوزى جەكە جۇمىس جاساپ ءجۇر ەكەن. «مەنىڭ جاساعان ەشبىر بيزنەس-جوسپارلارىم قايتقان ەمەس، ءبارى ءوتتى، كلەنتتەرىم رەنجىگەن ەمەس، ناتيجەلەرى جاقسى...» دەيدى. 

ەگەر، اقتۇبەك اۋىلىنىڭ اكىمى مۇرات احمەتوۆ دارىپتەگەن «اlakol-Press» اۋداندىق قوعامدىق -ساياسي گازەتىنىڭ باس رەداكتورى المات ەسەنبەكوۆ ءاربىرىن ءجۇز مىڭ تەڭگەدەن جاساعان بيزنەس-جوسپارلارىنىڭ يەلەرى عانا اتالعان كونكۋرستا جەڭىسكە جەتىپ، وزگە مامانعا بيزنەس-جوسپار جاساتقان ازاماتتار كونكۋرستا وتپەي قالسا، وندا بۇل – بىرىنشىدەن، نارىق زاڭىنا قايشى، ەكىنشىدەن مىنىڭ استارىندا سىبايلاسقان جەمقورلىق ارەكەتى بولۋى مۇمكىن! 

ادىلەتسىزدىككە ۇشىردىق دەگەن اقتۇبەك اۋىلى تۇرعىندارى پرەزيدەنتىمىز قاسىم-جومارت توقاەۆتان كومەك سۇراپ تۇسىرگەن ۆيديومالىمدەمەسىن مەنىڭ الەۋمەتتىك جەلىدەگى پاراقشاما جۇكتەپ قويۋىمدى وتىنگەن سوڭ، ولاردىڭ بۇل قايىرلۋىن ءوزىمنىڭ  «TikTok» جەلىسىندەگى پاراقشاما ءىلىپ قويدىم https://vm.tiktok.com/ZMSLbo1AQ/ . 

سول  ۆيديومالىمدەمەنىڭ استىنا جازىلعان پىكىرلەرگە قاراپ وتىرسام، پىكىر قالدىرعان ازاماتتاردىڭ تۇگەلگە جۋىعى ادىلەتسىزدىككە ۇشىردىق دەگەن اقتۇبەك اۋىلى تۇرعىندارىن قولداپ،  كونكۋرستىڭ ءادىل وتپەگەنىن ايتىپ وتىر. سول پىكىرلەردىڭ اراسىنان «@Sanshar: كونكۋرس ءادىل وتپەدى.جەڭىمپاز كونكۋرس حاتشىسىنىڭ اعاسى،اۋىل اكىمىنىڭ اناسى،تۋىستارىمەن ءبولىپ الدى...» دەگەن ءسوزدى دە كوزىم شالدى. 

بۇل ەندى انىقتاۋدى تالاپ ەتەتىن ءسوز! 

ايتپاقشى، وسى الاكول اۋدانى اكىمدىگىنىڭ جەر ءبولىمى وتكىزگەن كونكۋرستىڭ ءبىر ۆيديوسى قولىما كەلىپ ءتۇستى. ناقتىلاپ ايتسام، بۇل ۆيديونى سول ادىلەتسىزدىككە ۇشىردىق دەگەن اقتۇبەك اۋىلى تۇرعىندارى جىبەردى https://vm.tiktok.com/ZMSLbtCyv/ . 

ادىلەتسىزدىككە ۇشىردىق دەگەن اقتۇبەك اۋىلى تۇرعىندارىنىڭ ايتۋىنا قاراعاندا، بۇل ۆيديودا كونكۋرس وتكىزىپ جاتقان كوميسسيا مۇشەلەرىنىڭ ورتاسىندا اقتۇبەك اۋىلىنىڭ اكىمى مۇرات احمەتوۆتىڭ ءوزى دە وتىرعان كورىنەدى. «جاي وتىرعان جوق، كونكۋرسقا قاتىسقان ءبىر ازاماتتىڭ 8 ناۋرىزدا اۋىلعا كومەككە التى ءجۇز مىڭ تەڭگەدەي سىيلىق جاساعانىن ايتادى. كوميسسيا حاتشىسى ول جىگىتتىڭ ءوتىنىشىن داۋىسقا سالعاندا، 8 ناۋرىزدا اۋىلعا كومەككە التى ءجۇز مىڭ تەڭگەدەي سىيلىق جاساعان سول ازامات سەگىز داۋىسپەن جەڭىمپاز بولىپ جەڭىسكە جەتتى...»،-دەيدى ادىلەتسىزدىككە ۇشىردىق دەگەن اقتۇبەك اۋىلى تۇرعىندارىنىڭ وكىلى مۋرات كاليەۆ. 

اتالعان ۆيديوداعى جاعدايلار شىن بولسا، وندا اۋداندىق جەر ءبولىمى وتكىزگەن كونكۋرس كەزىندە كوميسسيا قۇرامىندا اۋىل اكىمى نەگە ءجۇر! 

«اۋىلعا اقشالاي سىيلىق بەرگەن ازامات كونكۋرس جەڭىمپازى بولادى» دەگەن نورما قاي زاڭنىڭ نەشىنشى بابىندا جازىلعا؟! 

8 ناۋرىزدا اۋىلعا كومەككە التى ءجۇز مىڭ تەڭگەدەي سىيلىق جاساعان ازاماتتىڭ ول اقشاسىن اۋىل اكىمى قان زاڭنىڭ اياسىندا قانداي قور ارقالى قابىلدادى؟!! 

مەنشە، ادىلەتسىزدىككە ۇشىردىق دەگەن اقتۇبەك اۋىلى تۇرعىندارى ايتقان جوعارىداعى ءۋاج بەن مىنا ۆيديوداعى جاعداي شىن بولسا، الاكول اۋداندىق جەر ءبولىمى جانىنداعى كوميسسيا وتكىزگەن كونكرۋستىڭ ادىلەتسىز وتكەنىن، كونكۋرس بارىسىندا اقتۇبەك اۋىلى تۇرعىندارىنىڭ قۇقىعىنىڭ تاپتالعانىن دالەلدەۋگە وسى ەكى فاكتى-اق جەتكىلىكتى دەپ ويلايمىن! 

قۇرمەتتى  بەيبىت وكسىكبايۇلى! 

ءوزىڭىز جاقسى بىلەسىز، پرەزيدەنتىمىز قاسىم-جومارت توقاەۆ وتكەن جولداۋلارىنىڭ بىرىندە: «ەلدە قالىپتاسقان «لاتيفۋنديستەردىڭ» تۇتاس توبى جەردى پايدالانباي، «ءشوپ قورىعان يت» ءتارىزدى ۇستاپ وتىر»,- دەگەن بولاتىن. 

الاكولدە بولىپ جاتقان جاعدايلارعا قارعاندا، ەلدە قالىپتاسقان «لاتيفۋنديستەردى» بىلاي قويعاندا، ءوزى باسقارىپ وتىرعان اۋداننىڭ حالقىنا الاقانداي جەر تەلىمىن ادىلەتتى جولمەن دۇرىس ءبولىپ بەرۋگە  ورەسى جەتپەيتىن «ءشوپ قورىعان يت» ءتارىزدى اكىمدەر دە بار ەكەن. 

ولاردىڭ ءسىز باسقارىپ وتىرعان جەتىسۋ وبلىسىنان توبە كورسەتكەنى وتە وكىنىشتى بولىپ تۇر. 

قۇرمەتتى  بەيبىت وكسىكبايۇلى! 

وسىعان بايلانىستى، سىزدەن جوعارىداعى ايتىلعان ماسەلەلەر مەن سۇراقتاردى ءوز نازارىڭىزعا الىپ، ءبىرىنشى، الاكول اۋداندىق جەر ءبولىمى كوميسسياسى وتكىزگەن كونكۋستى ارنايى كوميسسيا جىبەرىپ تەكسەرتۋڭىزدى; 

ەكىنشى، كونكۋرستا جەڭىمپاز بولعان ازاماتتاردىڭ وسىعان دەيىن قانشا جەر تەلىمى بولعانىن انىقتاتۋىڭىزدى; 

ءۇشىنشى، كونكۋرس بارىسىندا زاڭ بۇزۋشىلىقتار انىقتالسا، جاۋاپتى تۇلعالاردى جاۋاپقا تارتۋىڭىزدى، مىنا كونكۋرس شەشىمىنىڭ كۇشىن جويىپ، كونكۋرستى قايتا وتكىزۋگە پارمەن بەرۋىڭىزدى; 

ءتورتىنشى، ادىلەتسىزدىككە ۇشىردىق دەگەن اقتۇبەك اۋىلى تۇرعىندارىن تالدىقورعانعا الدىرىپ، ورىنباسارلارىڭىز ەمەس، ءوزىڭىز جەكە قابىلداۋىڭىزدى، ولاردىڭ ۋاجدەرىن ءوز اۋىزدارىن ەستۋىڭىزدى; 

بەسىنشى، الاكول اۋداندىق جەر ءبولىمى جانىنان قۇرىلعان كوميسسيانىڭ قۇرامىن قايتا قاراپ، كوميسسيا قۇرمىنا اۋىل تۇرعىندارىنىڭ وزدەرى سايلاعان ازاماتتارمەن قايتا جاساقتاۋعا ىقپال ەتۋڭىزدى سۇرايمىن. 

ەسكەرتۋ: «اشىق حات» باق-قا دا جولداندى. 

اۋىت مۇقيبەك

Abai.kz