«جاستار وزگەرىستەر باستاۋىندا: بولاشاق ديالوگى»

تۇران ۋنيۆەرسيتەتىندە بىرىككەن ۇلتتار ۇيىمىنىڭ نەگىزگى وكىلدەرىنىڭ ءبىرى – بۇۇ باس حاتشىسىنىڭ جاستار ءىسى جونىندەگى كومەكشىسى فەليپە پاۋلەر الماتى قالاسىنىڭ بەلسەندى جاستارىمەن كەزدەستى.

كەزدەسۋگە قالامىزدىڭ تۇران، نارحوز، AlmaU ۋنيۆەرسيتەتتەرىنىڭ بەلسەندى جاستارى مەن پروفەسسور-وقىتۋشىلار قۇرامى قاتىستى.

شارانىڭ باستى ماقساتى – 2024 جىلى بولاشاق سامميتىندە قابىلدانعان بۇۇ-نىڭ «Youth 2030» ستراتەگياسى اياسىندا جاستاردىڭ شەشىم قابىلداۋ ۇدەرىستەرىنە قاتىسۋىنا، ادام قۇقىقتارىن ىلگەرىلەتۋگە، سونداي-اق تۇراقتى دامۋ، بەيبىتشىلىك پەن قاۋىپسىزدىككە بەلسەندى ارالاسۋىنا ىقپال ەتۋ.

تۇران ۋنيۆەرسيتەتى قابىرعاسىندا وتكەن بۇل ىرگەلى جيىنعا 200-دەن استام جاس كوشباسشى، ستۋدەنت، ديپلومات، باق جانە حالىقارالىق ۇيىمداردىڭ وكىلدەرى قاتىستى.

بۇۇ-نىڭ باس وفيسىنەن كەلگەن ارنايى وكىل فەليپە پاۋلەر جاستارعا قاراتا بىلاي دەدى: «ءبىزدىڭ الماتىعا كەلۋ سەبەبىمىز – جاستارمەن، كوشباسشىلارمەن بىرگە جارقىن بولاشاقتىڭ ارحيتەكتۋراسىن تالقىلاۋ. جاستار – بۇل تەك بولاشاق قانا ەمەس، بۇگىنگى كۇننىڭ دە ءبىر بولىگى، ولار – يننوۆاتسيالىق يدەيالاردىڭ باستاماشىلارى. سوندىقتان قالا جاستارىنىڭ وكىلدەرىمەن جۇزدەسۋ – ءبىز ءۇشىن ۇلكەن مارتەبە».

كەزدەسۋدە جاستار قالامىزداعى الەۋمەتتىك جوبالارعا قاتىسۋ، قوعامدىق جاۋاپكەرشىلىكتى سەزىنۋ، ادىلەتتى ءارى ينكليۋزيۆتى قوعام قالىپتاستىرۋ تاقىرىپتارىن كەڭىنەن تالقىلادى.

كەزدەسۋدە جاستار اراسىنان ەرەكشە قىزىعۋشىلىق تانىتىلىپ، تسيفرلىق ساۋاتتىلىق، دەنساۋلىق ساقتاۋ، ءبىلىم بەرۋ سالالارىنداعى جاھاندىق جوبالاردىڭ جۇزەگە اسۋ ەرەكشەلىكتەرى قىزۋ تالقىلاندى. جيىن بارىسىندا جاستار جاھاندىق دەڭگەيدە قابىلدانعان شەشىمدەردىڭ جەرگىلىكتى دەڭگەيدە ىسكە اسۋى مەن ونىڭ جاستارعا اسەرى تۋرالى ءوز ويلارىمەن ءبولىستى. كەزدەسۋ سوڭىندا جاستاردىڭ الەۋمەتتىك جاۋاپكەرشىلىگى، قوعامداعى ءرولى مەن جاھاندىق باستامالاردى ءساتتى جۇزەگە اسىرۋداعى مۇمكىندىكتەرى بويىنشا بىرلەسكەن حارتيا قابىلداندى.

جوبانى ۇيىمداستىرۋشىلاردىڭ ءبىرى – تۇران ۋنيۆەرسيتەتىنىڭ حالىقارالىق قاتىناستار جانە ديپلوماتيا جوعارى مەكتەبىنىڭ ديرەكتورى مۇحامەدياروۆا التىناي تولەۋقىزىنىڭ پىكىرىنشە، بۇۇ-نىڭ جاھاندىق كوممۋنيكاتسيالار دەپارتامەنتىنىڭ باستاماسىمەن جۇزەگە اسىرىلعان بۇل مارتەبەلى شارا الماتى جاستارىنىڭ ازاماتتىق بەلسەندىلىگىن ارتتىرىپ، بۇۇ اياسىنداعى جوبالارعا بەلسەندى قاتىسۋىنا جول اشادى. الماتى قالاسىندا جاستاردىڭ بەلسەندىلىگى مەن قوعام ومىرىنە قوسىپ جاتقان ۇلەسىن ەسكەرسەك، بولاشاقتا مۇنداي اۋقىمدى جوبالاردىڭ جالعاسىن تاباتىنى ءسوزسىز.

بۇل كەزدەسۋدىڭ ماڭىزدىلىعى — حالىقارالىق ينستيتۋتتار مەن جاستار اراسىنداعى تىكەلەي بايلانىس ورناتۋ ارقىلى سەنىمدى ارىپتەستىك قۇرۋ. مۇنداي ديالوگ الاڭدارى جاستاردىڭ عالامدىق ماسەلەلەرگە قاتىستى تانىم كوكجيەگىن كەڭەيتىپ قانا قويماي، ولاردىڭ ناقتى شەشىمدەر ۇسىنۋ قابىلەتتەرىن دامىتادى. سونىمەن قاتار، بۇل تاجىريبە بولاشاق كوشباسشىلاردى قالىپتاستىرۋدا جانە ولاردى جاھاندىق باسقارۋ جۇيەسىنە جۇمىلدىرۋدا ۇلكەن ءرول اتقارادى.

نۇربولات نىشانباەۆ

Abai.kz