قاسىم-جومارت توقاەۆ ەلورداداعى "اتامەكەن" ەتنومەموريالدى كەشەنىندە وتكەن مەملەكەتتىك تۋ كوتەرۋ راسىمىنە قاتىستى. قۇرمەت قاراۋىلىنىڭ باستىعى سالتاناتتى ءىس-شاراعا دايىندىعى تۋرالى پرەزيدەنتكە راپورت بەردى. سودان كەيىن ەلىمىزدىڭ ءانۇرانى شىرقالىپ، كوك بايراعىمىز كوتەرىلدى.

قاسىم-جومارت توقاەۆ جيىنعا قاتىسۋشىلاردى مەملەكەتتىك رامىزدەر كۇنىمەن قۇتتىقتاپ، بۇل ەلىمىز ءۇشىن ءمان-ماڭىزى ايرىقشا مەرەكە ەكەنىنە توقتالدى.

«ۇلت رامىزدەرى – تاۋەلسىزدىگىمىزدىڭ كيەلى بويتۇمارى. ەلتاڭبا، تۋ جانە ءانۇران – مىزعىماس مەملەكەتتىگىمىزدىڭ بەلگىسى. قاستەرلى نىشاندارىمىز قازاقستاننىڭ ەگەمەن ەل، ەڭسەلى جۇرت ەكەنىن جەر جۇزىنە ايگىلەيدى. بايراعى بيىك ەلدىڭ رۋحى اسقاق بولادى. سوندىقتان ءبىز وسى مەيرامعا وراي جىل سايىن كوك تۋىمىزدى بيىككە كوتەرەمىز. بابالارىمىز "تۋىڭدى تىك ۇستا!" دەپ وسيەت قالدىردى. وسى اماناتقا ادال بولۋ – بارشاعا ورتاق پارىز. بۇگىندە كوك بايراعىمىز قاستەرلى وتانىمىز – قازاقستاننىڭ بەيبىت اسپانىندا جەلبىرەپ تۇر. ونى كەيىنگى ۇرپاققا تابىستاۋ – قاسيەتتى بورىش», – دەدى پرەزيدەنت.

مەملەكەت باسشىسىنىڭ ايتۋىنشا، قازىر كوك تۋىمىزدىڭ بەدەلىن بۇكىل الەم مويىندايدى. بايراعىمىز بىرىككەن ۇلتتار ۇيىمىنىڭ تورىندە تۇر. ونى الپينيستەرىمىز جەر شارىنداعى ەڭ بيىك شىڭدارعا كوتەردى. سپورتشىلارىمىز تالاي مارتە جەڭىس تۇعىرىنا شىعاردى.

«بيىل جاۋىنگەرلەرىمىز بىتىمگەرلىك ميسسياسىن كوك بايراقتىڭ استىندا تۇڭعىش رەت دەربەس ورىنداپ كەلدى. ازاماتتارىمىزدىڭ، مەملەكەتىمىزدىڭ وسىنداي جەتىستىكتەرى قازاقستاننىڭ قۋاتتى ءارى جاسامپاز ەل ەكەنىن كورسەتەدى. مەملەكەتتىك رامىزدەر – ەل ماقتانىشى. ەلتاڭبامىز، كوك تۋىمىز بەن ءانۇرانىمىز ءار ازاماتتىڭ جۇرەگىنەن ەرەكشە ورىن الادى. بۇل – ناعىز وتانشىلدىق بەلگىسى. ۇلت نىشاندارى – حالقىمىزدىڭ بولمىس-ءبىتىمىنىڭ ايناسى، جارقىن بولاشاعىمىزدىڭ كەپىلى», – دەپ جالعادى ءسوزىن مەملەكەت باسشىسى.

سونىمەن بىرگە مەملەكەتتىلىگىمىزدىڭ بەرىك تىرەگى – اتا زاڭىمىزدىڭ قابىلدانعانىنا 30 جىل تولاتىنىن ەسكە سالدى.

«نەگىزگى زاڭ ءبىزدىڭ قوعام ارقا سۇيەيتىن باستى قاعيداتتاردان تۇرادى. كونستيتۋتسيا ارقىلى زاڭ مەن ءتارتىپتىڭ ۇستەمدىگىن قامتاماسىز ەتىپ، اۋقىمدى وزگەرىستەردى كەزەڭ-كەزەڭىمەن قولعا الىپ جاتىرمىز. قازاقستاننىڭ ءوسىپ-وركەندەۋىنە ارقايسىسىمىز ۇلەس قوسىپ كەلەمىز. ءبىزدى كوك پاسپورتىمىز، رەفورمالاردىڭ جاسامپاز قۋاتىنا دەگەن ورتاق ماقسات پەن مىزعىماس سەنىم بىرىكتىرەدى. قازاقتا "تۋى ءبىردىڭ – ءتۇبى ءبىر، جولى ءبىردىڭ – جۇگى ءبىر" دەگەن ءسوز بار. ەلىمىزدەگى ءتۇرلى ەتنوس وكىلدەرى كوك بايراقتىڭ استىندا تۇتاسىپ، تاتۋ-ءتاتتى ءومىر ءسۇرىپ جاتىر. ءبىزدىڭ مۇددەمىز دە، جولىمىز دا، مۇراتىمىز دا – ورتاق. بۇل – ادىلەتتى، قاۋىپسىز ءارى تازا قازاقستاندى قۇرۋ. وسى بەرەكە-بىرلىگىمىزدى ساقتاپ، نىعايتا بەرسەك، كەز كەلگەن بيىكتى باعىندىرامىز», – دەدى قاسىم-جومارت توقاەۆ.

سودان كەيىن پرەزيدەنت وقۋىن ۇزدىك بىتىرگەن كۋرسانتتارعا تۋ تۇبىندە شەن تاپسىرۋ جاقسى داستۇرگە اينالعانىن ايتا كەلىپ، جاس ساربازدارعا ءسوز ارنادى.

«كوك بايراق جاۋىنگەرلەرگە ايرىقشا كۇش-جىگەر بەرەدى، وتانشىلدىق رۋحىن كوتەرەدى. وسىنداي ساتتەردە ءار ازامات تۋعان ەلگە قىزمەت ەتۋ پەرزەنتتىك پارىزى ەكەنىن تەرەڭ ۇعىنادى. "تۇلپار ءمىنىپ، تۋ العان" جاۋجۇرەك باتىرلاردىڭ ۇرپاعى ەكەنىن سەزىنەدى. وتان كۇزەتىندە تۇرعان ۇلاندارىمىزدى ءباھادۇر بابالاردىڭ بۇگىنگى ءىزباسارى دەۋگە بولادى. قاستەرلى تۋىمىزدى ءاردايىم تىك ۇستاڭىزدار! مەن بۇعان كامىل سەنەمىن! بايراعىمىز بيىكتە جەلبىرەسىن! ەلىمىز امان، جۇرتىمىز تىنىش بولسىن!», – دەدى مەملەكەت باسشىسى.

تۋ كوتەرۋ راسىمىنە مەملەكەتتىك ورگانداردىڭ باسشىلارى، پارلامەنت دەپۋتاتتارى، ۇلتتىق قۇرىلتاي مۇشەلەرى، "حالىق قاھارمانى" مەن "قازاقستاننىڭ ەڭبەك ەرى" اتاعىنىڭ يەگەرلەرى، جوعارى اسكەري وقۋ ورىندارىنىڭ كۋرسانتتارى مەن ولاردىڭ تۋىستارى قاتىستى.

Abai.kz