قازاقستان 2,4 ميلليارد دوللارلىق ءۇش ستانسا جوباسىنا وڭتۇستىك كورەيا مەن قىتاي سەرىكتەستەرىن تارتۋدى قاراستىرۋدا.

قازاقستان ءۇش جاڭا جىلۋ ەلەكتر ستانساسىن سالۋ جوباسىندا رەسەيدى وڭتۇستىك كورەيا مەن قىتاي كومپانيالارىمەن الماستىرۋى مۇمكىن، دەپ حابارلايدى بىرقاتار شەتەلدىك باق.

رەسەيلىك «ينتەرفاكس» اگەنتتىگى 9 شىلدەدە «قازاقستاندا ءۇش جىلۋ ەلەكتر ستانساسىن سالۋ جوباسىنا وڭتۇستىك كورەيا مەن قىتاي كومپانيالارى قاتىسۋى مۇمكىن، بۇل باعىتتا بارلىق ىقتيمال مەردىگەرلەرمەن كەلىسسوزدەر ءجۇرىپ جاتىر» دەپ حابارلادى.

اگەنتتىك قازاقستان ەنەرگەتيكا ۆيتسە-ءمينيسترى باقىتجان ءىلياستىڭ سوزىنە سىلتەمە جاساي وتىرىپ: «كەلىسسوزدەر “سامۇرىق-ەنەرگو” ارقىلى جۇرگىزىلۋدە، جانە قورشاعان ورتا تالاپتارى مەن زاماناۋي ەنەرگيا ۇنەمدەۋ ستاندارتتارىنا ساي كەلەتىن باسقا دا الەۋەتتى ازىرلەۋشىلەرمەن بايلانىس ورناتىلعان» دەدى.

حابارلامادا «كانديداتتار قاتارىندا وڭتۇستىك كورەيا مەن قىتايدىڭ ەنەرگەتيكالىق كومپانيالارى بار جانە بىرنەشە نۇسقا قاراستىرىلۋدا» دەلىنگەن.

بۇعان دەيىن، ءساۋىر ايىندا، قازاقستان ۇكىمەتى سەمەي (360 مۆت), وسكەمەن (360 مۆت) جانە كوكشەتاۋ (240 مۆت) قالالارىندا ءۇش جاڭا جىلۋ ەلەكتر ستانساسىن سالۋ جوسپارىن جاريالاعان بولاتىن. جوبانىڭ جالپى قۇنى — 2,4 ميلليارد دوللار (شامامەن 3,29 ترلن ۆون). العاشقىدا بۇل جوبانى رەسەيدىڭ مەملەكەتتىك «ينتەر راو» كومپانياسى ىسكە اسىرادى دەپ جوسپارلانعان ەدى، كرەمل جوباعا قارجىلىق قولداۋ كورسەتۋگە ۋادە بەرگەن بولاتىن.

الايدا، رەسەي تاراپىنان جوباعا قاجەتتى جابدىقتى ەكسپورتتاۋعا قاتىستى قارجىلاندىرۋ ماسەلەلەرى تۋىنداعان سوڭ، قازاقستان ۇكىمەتى وڭتۇستىك كورەيا مەن قىتايدان بالاما سەرىكتەستەردى قاراستىرا باستادى.

مامىر ايىندا قازاقستان پرەمەر-ءمينيسترىنىڭ ورىنباسارى رومان سكليار: «جىلۋ ەلەكتر ستانسالارىن سالۋ مەن ىسكە قوسۋعا قاجەتتى جابدىقتى قارجىلاندىرۋدا رەسەي تاراپىنان قيىندىقتار بولدى»، — دەپ مالىمدەپ، «قازاقستان جاڭا ينۆەستورلاردى تارتۋعا نيەتتى» ەكەنىن ايتقان ەدى.

قازىر قازاقستانداعى ەلەكتر ەنەرگياسىنىڭ 80%-ى جىلۋ ەلەكتر ستانسالارىنان وندىرىلەدى. الايدا وسى نىسانداردىڭ جارتىسىنان كوبى 30 جىلدان استام ۋاقىت بۇرىن سالىنعان، بۇل ەل ەنەرگەتيكاسىنىڭ جاڭارتۋدى اسا قاجەت ەتەتىنىن كورسەتەدى.

ساراپشىلاردىڭ پىكىرىنشە، قازاقستان ۇكىمەتى بۇل جوبالاردى ۋاقىتىلى اياقتاۋعا نيەتتى بولىپ وتىرعاندىقتان، وڭتۇستىك كورەيا مەن قىتاي ءۇشىن بۇل جاقسى مۇمكىندىك بولۋى مۇمكىن.

وڭتۇستىك كورەيانىڭ Doosan Enerbility كومپانياسى العاشقى ۇمىتكەر رەتىندە قاراستىرىلۋدا. اتالعان كومپانيا 2020 جىلى قاراباتانداعى بىرىككەن تسيكلدى ەلەكتر ستانساسىن ءساتتى اياقتاعان، سونداي-اق بىلتىر شىمكەنتتە ۇقساس ستانسانى سالۋعا 1,15 ترلن ۆوندىق كەلىسىمشارتقا قول قويعان بولاتىن.

بيىل ماۋسىم ايىندا Doosan كومپانياسى قازاقستاننىڭ مەملەكەتتىك «سامۇرىق-قازىنا» (قارجى) جانە «سامۇرىق-ەنەرگو» (ەنەرگەتيكا) قۇرىلىمدارىمەن ەسكى ەكى ستانسانىڭ جانە جاڭا ءۇش ستانسانىڭ ەكولوگيالىق جۇيەلەرىن جەتكىزۋ جونىندە ءوزارا تۇسىنىستىك تۋرالى مەموراندۋمعا (موۋ) قول قويدى.

Abai.kz