"قۇقىق بۇزۋشىلىق پروفيلاكتيكاسى تۋرالى" زاڭعا قوعامدىق ورىنداردا بەت-الپەتتى جاسىراتىن كيىمدەر كيۋگە بولمايدى دەگەن وزگەرىس ەنگىزىلگەنى بەلگىلى. ءدىنتانۋشى ءال-فارابي بولاتجان بۇل زاڭ قانداي دا ءبىر ءدىني سەنىمگە قارسى باعىتتالماعانىن ايتتى.

ءبىر زاڭنامالىق اكت اياسىندا 23 زاڭعا وزگەرىس ەنگىزىلگەن. سونىڭ ىشىندە "قۇقىق بۇزۋشىلىق پروفيلاكتيكاسى تۋرالى" زاڭعا دا وزگەرىستەر ەندى. اتاپ ايتقاندا، قوعامدىق ورىنداردا بەتتى تولىقتاي جاباتىن، ياعني ادامنىڭ ءتۇر-سيپاتىن تانۋعا مۇمكىندىك بەرمەيتىن كيىم كيۋگە تىيىم سالىندى. بۇل – بەتپەردە، بالاكلاۆا، نيقاب جانە سوعان ۇقساس ەلەمەنتتەرگە قاتىستى، - دەيدى ءدىنتانۋشى.

ول زاڭعا وزگەرىستىڭ نەگىزگى ماقساتى قوعامدىق قاۋىپسىزدىكتى قامتاماسىز ەتۋ ەكەنىن العا تارتتى.

قىلمىستاردىڭ كەيبىرى بەتپەردە ارقىلى جاسالادى. قازىرگى زاماناۋي بەينەباقىلاۋ جۇيەلەرى ادامنىڭ بەت-الپەتى ارقىلى قىلمىسكەردى انىقتايدى. بىراق بەت تولىق جابىلعان بولسا، تەرگەۋ قيىنعا سوعادى. سول سەبەپتى بۇل وزگەرىستەر قىلمىستىڭ الدىن الۋ ءۇشىن قاجەت، - دەدى مامان.

ءال-فارابي بولاتجان كەيبىر پىكىرلەردە اتالعان زاڭ ايەلدەردىڭ قۇقىقتارىن شەكتەيدى نەمەسە ءدىني سەنىم بوستاندىعىنا قارسى دەلىنەتىنىن ايتتى. الايدا ءدىنتانۋشى زاڭ ماتىنىندە ەشقانداي ناقتى ءدىني باعىت نەمەسە جىنىس كورسەتىلمەگەنىن اتادى.

زاڭدا تەك ايەلدەر نەمەسە ءدىني سەنىمدەگىلەر تۋرالى ناقتى ايتىلمايدى. جالپىلاما تۇردە "بەت-الپەتتى تۇمشالاپ كيۋ" تۋرالى جازىلعان. ياعني، ول ەر ادام، ايەل ادام، ءتىپتى اتەيست بولسىن بارىنە ورتاق تالاپ. مىسالى، ءبىر ەر ادام نيقاب كيىپ جۇرسە، بۇل دا زاڭبۇزۋشىلىق بولىپ ەسەپتەلەدى، - دەدى ول.

مامان يسلامدا ايەل ادامنىڭ بەتى مەن قولى اۋرەتكە جاتپايتىنىن ايتىپ، قاجىلىقتا دا بەتتى جابۋعا رۇقسات بەرىلمەيتىنىن جەتكىزدى.

مىسالى، قاجىلىق كەزىندە ايەل ادام بەتى مەن قولىن اشۋى ءتيىس دەگەن حاديس بار. بۇل "ساحيح ءال-بۇحاريدا" كەلتىرىلگەن. سوندىقتان نيقاب ءدىني مىندەت ەمەس، كەيبىر داستۇرلەر مەن تۇسىنىكتەردىڭ نەگىزىندە كيىلەدى، - دەدى ول.

Abai.kz