مەملەكەت باسشىسى بالا قۇقىقتارىن قورعاۋ سالاسىنا اۋقىمدى وزگەرىستەر ەنگىزەتىن ««قۇقىق بۇزۋشىلىق پروفيلاكتيكاسى تۋرالى» قازاقستان رەسپۋبليكاسىنىڭ زاڭىنا قول قويدى. زاڭ كامەلەتكە تولماعاندار اراسىنداعى جانە ولارعا قارسى جاسالاتىن قۇقىق بۇزۋشىلىقتاردىڭ ۋاقىتىلى الدىن الۋدان باستاپ، شۇعىل كومەك ينفراقۇرىلىمىن قۇرۋعا، وڭىرلىك بالا قۇقىقتارىن قورعاۋ جونىندەگى باسقارمالارىن اشۋعا جانە بالا قۇقىقتارىن قورعاۋ سالاسىنداعى زاڭنامانى بۇزعانى ءۇشىن لاۋازىمدى تۇلعالاردىڭ دەربەس جاۋاپكەرشىلىگىن كۇشەيتۋگە ارنالعان.

بارلىق نەگىزگى نورمالار قر بالا قۇقىقتارى جونىندەگى ۋاكىلمەن جانە دەپۋتاتتىق كورپۋسپەن بىرلەسىپ ازىرلەندى.

زاڭ اياسىنداعى ماڭىزدى جاڭاشىلدىقتىڭ ءبىرى – ەلىمىزدە زورلىق-زومبىلىقتان زارداپ شەككەن بالالارعا كومەك كورسەتۋ كابينەتتەرىنىڭ اشىلۋى. مۇندا كامەلەتكە تولماعاندارعا «ءبىر تەرەزە» قاعيداتىمەن كەشەندى قولداۋ كورسەتىلەدى.

بالاعا قولايلى جاعدايدا العاشقى پسيحولوگيالىق كومەك ، سوت-مەديتسينالىق ساراپتاما جۇرگىزۋ، بەيىندى مامانداردىڭ قاتىسۋىمەن ساۋالناما الۋ سياقتى كەشەندى شارالار قاراستىرىلعان. بۇل بالانىڭ كوپتەگەن ۇيىمدارعا بارۋ قاجەتتىلىگىن جويىپ، ونىڭ پسيحولوگيالىق تۇرعىدان قايتا جاراقات الۋىنا جول بەرمەيدى.

سونىمەن بىرگە ءبىلىم بەرۋ ۇيىمدارىندا «باسا نازار اۋدارۋدى قاجەت ەتەتىن كامەلەتكە تولماعانداردى پەداگوگيكالىق سۇيەمەلدەۋ» ينستيتۋتى ەنگىزىلەدى. بۇل شارا قۇقىق بۇزۋشىلىقتاردىڭ ۋاقىتىلى الدىن الۋعا جانە بالالارعا دەر كەزىندە كومەك كورسەتۋگە ارنالعان.

سونداي-اق زاڭدا بالالاردىڭ قۇقىقتارى مەن زاڭدى مۇددەلەرىن قورعاۋدىڭ بىرىڭعاي ۆەرتيكالىن قۇرۋ ءۇشىن وڭىرلىك بالالاردىڭ قۇقىقتارىن قورعاۋ باسقارمالارىن اشۋ كوزدەلگەن. جاڭا قۇرىلىمدار ۇيلەستىرۋ جۇمىستارىنا، الدىن الۋ شارالارىنا، جەدەل قورعاۋعا جانە «تاۋەكەل توبىنداعى» بالالارعا كومەك كورسەتۋگە جاۋاپتى بولادى.

جاڭا نورمالاردى ىسكە اسىرۋ ماقساتىندا ءتيىستى قاعيدالار بەكىتىلەدى.

Abai.kz