ۋاشيڭتونداعى اق ۇيگە ۋكراينا جانە ەۋروپا باسشىلارى باردى. سولاردىڭ ىشىندەگى ەڭ ماڭىزدى قوناق - ۋكراينا پرەزيدەنتى زەلەنسكي.

ءبارىنىڭ تالقىلايتىن تاقىرىبى دا بىرەۋ. ول - ۋكراينا تاعدىرى.

اق ۇيگە ناتو حاتشىسى ريۋتتە باستاپ، ەۋروكوميسسيا باسشىسى فون دەر لياەن قوشتاپ، ۇلىبريتانيا پرەمەرى ستارمەر، گەرمانيا كانتسلەرى مەرتس، فرانتسيا پرەزيدەنتى ماكرون، يتاليا پرەمەرى مەلوني، فين باسشىسى ستۋبب باردى.

ءبارى اق ۇيدە. بىراق، ترامپ تەك زەلەنسكيدى ءوزى شىعىپ قارسى الدى. قۇرمەت قاراۋىلى ساپ تۇزەدى. ءارى قاراي جاريا اڭگىمە باستالدى.

دوعال بولمەنىڭ اۋا-رايى بۇل جولى باسقاشا. اقپانداعى ايقاي-شۋدان كەيىن الەم جۇرتى «وسى جولى قالاي بولار ەكەن» دەپ ەلەڭدەگەن. جوق، تاراپتار ءبىر-بىرىنە قاتتى سويلەگەن جوق.

پرەزيدەنت زەلەنسكيمەن بىرگە كەلىسسوزگە قاتىسقان ۋكراينا دەلەگاتسياسى:

1) پك باسشىسى ەرماك،

2) ەلشى ماركاروۆا،

3) ۋۇقق باسشىسى ۋمەروۆ،

4) ءسىم ورىنباسارى كيسليتسا،

5) پك ورىنباسارى پاليسا.

پرەزيدەنت ترامپپەن بىرگە كەلىسسوزگە قاتىسقان اقش وكىلدەرى:

1) ۆيتسە-پرەزيدەنت ۆەنس،

2) مەمحاتشى رۋبيو،

3) ارنايى وكىل ۋيتكوفف،

4) ارنايى وكىل كەللوگ،

5) اق ءۇيدىڭ اپپارات باسشىسى.

ترامپ:

- بۇگىن ءبارى ءساتتى وتسە، اقش-ۋكراينا-رەسەي باسشىلارىنىڭ ۇشجاقتى كەلىسسوزى وتەدى. ۇشجاقتى كەزدەسۋ وتپەسە، سوعىس جالعاسادى، - دەدى.

ترامپ:

- ۋكراينا ناتو-عا كىرە المايدى. بىراق وعان مىقتى قاۋىپسىزدىك كەپىلدىگى بەرىلەدى. وتە جاقسى، وتە سەنىمدى قاۋىپسىزدىك كەپىلدىگى جايلى ايتىپ وتىرمىن، - دەدى.

ترامپ:

- ۋكرايناعا ەۋروپا ەلدەرى كەپىلدىك بەرمەك. ءبىز دە كومەكتەسەمىز، - دەدى.

زەلەنسكي:

- ءبىزدىڭ ماقساتىمىز - سوعىستى ادىلەتتى اياقتاۋ، - دەدى.

زەلەنسكي:

- ۋكراينادا سايلاۋ وتكىزۋ مۇمكىندىگى بار. بىراق، ول ءۇشىن سوعىس توقتاۋى كەرەك. سوعىس جاعدايىندا سايلاۋ وتكىزۋ مۇمكىن ەمەس، - دەدى.

قوسىمشا:

زەلەنسكيدىڭ ايەلى ترامپتىڭ ايەلىنە ءۇشبۋ حات جازىپ جىبەرىپتى. سونى تاپسىردى. ترامپ زەلەنسكيدىڭ درەسس-كودىن ماقتادى.

بولجام: ترامپ ايتقان ۋكرايناعا بەرىلۋى مۇمكىن «قاۋىپسىزدىك كەپىلدىگى» - ەۋروپا مەن ناتو ەلدەرىنىڭ اسكەري كونتينگەنتىن ۋكراينا اۋماعىنا ورنالاستىرۋ بولۋى كەرەك.

وسىدان بىرنەشە اي بۇرىن بۇل تاقىرىپ قىزۋ تالقىلانعان. سوندا ۇلىبريتانيا، فرانتسيا باستاعان ەلدەر جيىنى 30 مىڭعا جۋىق اسكەر شىعارىپ، ۋكرايناعا بىتىمگەرلىك ميسسيامەن اتتاندىرۋدى تالقى ەتكەن.

ولار مايداننىڭ ارتقى شەبىنە ورنالاستىرىلاتىنى، اتىستى توقتاتۋ رەجىمىنىڭ ساقتالۋىن ء(بىتىمنىڭ) قامتاماسىز ەتىلەدى دەگەن.

ترامپ ۋكراينانىڭ ناتو-عا قوسىلۋىن جوققا شىعارعانىمەن، ناتو ەلدەرى تاراپىنان ۋكرايناعا قاۋىپسىزدىك كەپىلدىگىن بەرۋ مۇمكىندىگىن تەرىستەگەن جوق…

ايتپاقشى، ۋكراينا تەرريتوريالىق شەگىنىسكە كەلىسە مە، جوق پا، ول دا باسى اشىق كۇيدە قالىپ وتىر…

ۋكراينا رەسەي تاراپىنان وككۋپاتسيالانعان، اننەكتسيالانعان اۋماقتارىن حالىقارالىق قاۋىمداستىق الدىندا دە-يۋرە ەمەس، ءتىپتى دە-فاكتو مويىنداعاننىڭ ءوزى قاۋىپتى! رەسەيدىڭ باسقىنشىلىعى زاڭ-قۇجات جۇزىندە ەمەس، جاي عانا ءسوز جۇزىندە مويىندالاتىن بولسا، الەم ءۇشىن جالعىز “قاۋىپسىزدىك كەپىلدىگى” قالاتىن بولادى. ول - يادرولىق قارۋ.

Abai.kz