اپتا باسى ايشىقتى جاڭالىقپەن باستالدى. جەتىسۋ جەرىنەن ەل پرەزيدەنتى قاسىم-جومارت توقاەۆتىڭ ءداستۇرلى جولداۋىنا ارنايى دەلەگاتسيانىڭ قاتارىندا ەلورداعا كەلۋىم ەرەكشە ەستە قالعان كۇننىڭ ءبىرى بولدى.

بۇل مەملەكەت باسشىسىنىڭ بىلتىرعى جىلدى «جۇمىسشى ماماندىقتار جىلى» دەپ اتاپ، قاتارداعى ەڭبەك ادامىنىڭ بەدەلىن ارتتىرىپ، ءيميدجىن قالىپتاستىرۋعا باعىتتاعان جۇيەلى تاپسىرماسىنىڭ جەمىسى دەسەم ارتىق ايتقاندىعىم ەمەس. ءوزىم جازيرالى جاركەنت وڭىرىندە سۋ شارۋاشىلىعى سالاسىندا ەڭبەك ەتەمىن. جاسىراتىنى جوق مۇنداي ماڭىزدى جيىنعا ۇكىمەت ادامدارى، سەنات پەن ءماجىلىس دەپۋتاتتارى، مينيسترلىك وكىلدەرى مەن وبلىس اكىمدەرى عانا قاتىساتىنداي كورىنەتىن.

بىراق ەل پرەزيدەنتىنىڭ جولداۋى وتەتىن سالتاناتتى جيىندا ءوزىم سياقتى قاتارداعى ەڭبەك ادامدارىن كورگەندە ەرەكشە اسەرگە بولەندىم. مۇنىڭ ءوزى قاراپايىم ەڭبەككەرلەردىڭ قازىرگى تاڭداعى قوعامداعى ورنىن بەلگىلەپ بەردى. بۇل قولداۋ بىزگە دە ءوز پايداسىن تيگىزەدى دەپ ويلايمىن. جانە وسىنداي جيىنعا ءبىزدى قاتىستىرۋ قاراپايىم جۇمىسشىنىڭ تابان ەت، ماڭداي تەرىن باعالاۋ دەپ قابىلدادىم. سونىمەن بىرگە بيىلعى جولداۋىندا مەملەكەت باسشىسى سۋ ماسەلەسىنە دە ەرەكشە كوڭىل ءبولدى. بۇل جالپى ادامزاتتىق پروبلەمانىڭ ءبىر شەتى بىزگە تيەتىنىن كورسەتسە كەرەك. جوعارىدا ايتقانىمداي ءوزىم سۋ شارۋاشىلىعىنىڭ مامانى بولعاندىقتان وزىمە تىكەلەي قاتىسى بار سالانى قولداۋ تۋرالى ايتقانىن زور ىقىلاسپەن تىڭدادىم.

مەملەكەت باسشىسى ءوز سوزىندە ارال تەڭىزىن قايتا قالپىنا كەلتىرۋ باعىتىندا اتقارىلعان شارالارعا توقتالىپ، كاسپي تەڭىزىنىڭ تارتىلا باستاۋىنا الاڭداۋشىلىق ءبىلدىردى:

– سۋ ماسەلەسىن شەشۋ – الەۋمەتتىك تۇراقتىلىقتى ساقتاپ، ەكونوميكانى دامىتۋدىڭ كەپىلى. بۇل – ۇلتتىق قاۋىپسىزدىكتى قامتاماسىز ەتەتىن باستى فاكتوردىڭ ءبىرى. سوڭعى ەكى جىلدا وسى سالانىڭ ينستيتۋتسيونالدىق نەگىزى قالىپتاستى: سۋ كودەكسى قابىلدانىپ، ارنايى مينيسترلىك قۇرىلدى. بىراق مۇنىمەن شەكتەلمەي، جۇيەلى ءارى جان-جاقتى جۇمىس جۇرگىزۋ قاجەت. كاسىبي كادرلاردى دايارلاپ، سۋ ديپلوماتياسىمەن اينالىساتىن مامانداردى ازىرلەۋ ماڭىزدى، – دەپ اسا كۇردەلى ماسەلەگە توقتالدى.

شىنىندا پرەزيدەنت ايتقانداي، ەلىمىزدەگى سۋ رەسۋرستارىنىڭ ناقتى كولەمى جونىندە تولىق مالىمەت جوقتىڭ قاسى. كەي وڭىرلەردە سۋدىڭ 50-60 پايىزى ىسىراپ بولىپ جاتىر. سۋدى ەسەپكە الۋ تەحنولوگياسىنىڭ توزىعى جەتكەن، ءبولۋ جانە تاراتۋ ورىندارىندا قۇرىلعىلار ەسكىرگەن. وسىلاي دەگەن مەملەكەت باسشىسى حالىقتى اۋىز سۋمەن جانە ەگىستىكتى سۋارۋ ماسەلەلەرىن اياقسىز قالدىرماۋدى ەرەكشە اتاپ ءوتتى.

پرەزيدەنتتى مۇقيات تىڭداي وتىرىپ، نەگىزگى شۇعىلداناتىن كاسىبىم سۋ شارۋاشىلىعى بولعاندىقتان كوكتەمگى، جازعى ەگىن سۋارۋ ناۋقانى كەزىندەگى قيىندىقتاردى ەسكە الدىم. الاڭداتاتىنى جىلدان-جىلعا جاركەنت وڭىرىندەگى وزەن سۋلارى ازايىپ بارادى. سوعان بايلانىستى شارۋالار ەگىن ەگىپ، داقىل باپتايتىن كەزەڭدە سۋ بولۋدە كوپتەگەن قيىندىقتارعا تاپ بولامىز. ويتكەنى، شارۋا قوجالىقتارىنا تيەسىلى ەگىستىكتەردىڭ ءبارىن قاجەتتى مول سۋمەن تولىق قامتاماسىز ەتۋ مۇمكىن ەمەس. كۇن-تۇندەمەي سۋدىڭ كوزىن كۇزەتىپ، شارۋالاردىڭ ارقايسىسىنا كەزەكپەن سۋ بەرەتىن مۇراپتار ەگىلگەن ءونىمنىڭ قانىق سۋارىلىپ، ۋاقىتىمەن ءوسىپ جەتىلۋى ءۇشىن كوپ كۇش جۇمسايدى. سوعان قاراماستان اۋدان ديقاندارىنىڭ سۋدان تارىقپاۋىنا ۇلەس قوسىپ كەلەمىز.

ءبىزدىڭ تىشقان سۋ ءبولۋ بولىمشەسىندە 19 مۇراپ ەڭبەك ەتىپ، جاز بويى 6 مىڭ گەكتارعا جۋىق ەگىن القابىن سۋمەن قامتاماسىز ەتەدى. تىشقان وزەنىنىڭ بويىندا 10 ميلليون تەكشەمەتر سۋ ساقتايتىن قويما سالىنادى دەگەن حاباردى ەستىپ قۋانىپ ءجۇرمىز. اقجولتاي جاڭالىق ۋاقىتىندا ورىندالىپ، سۋ قويماسى سالىنسا، تاۋدان كەلەتىن قار سۋىنا قاراپ وتىرماي، ەگىنشىلەرگە قاجەتىنشە سۋ ءبولۋ مۇمكىندىگىنە يە بولار ەدىك. پرەزيدەنتتىڭ بيىلعى جولداۋىندا وسى ماسەلەگە ەرەكشە ءمان بەرىلۋى ءۇمىتىمىزدى ۇكىلەپ، تىرشىلىكتىڭ تىرەگىنە جان كىرگىزگەندەي اسەر ەتتى. سەبەبى، سۋسىز تىرشىلىكتىڭ ءسانى دە، ءمانى دە بولمايدى.

توقتاسىن ساتىپالديەۆ،

«قازسۋشار» مەكەمەسىنىڭ تىشقان سۋ ءبولۋ بولىمشەسىنىڭ باسشىسى

پانفيلوۆ اۋدانى

Abai.kz