2025 جىلدىڭ مامىر-قىركۇيەك ايلارى ارالىعىندا قازاقستان بويىنشا 23,6 ملن توننا كومىر تاسىمالداندى، بۇل وتكەن جىلدىڭ سايكەس كەزەڭىمەن سالىستىرعاندا 1,2 ملن تونناعا (+5%) ارتىق. ونىڭ ىشىندە جىلۋ ەلەكتر ستانتسيالارى بويىنشا – 21,9 ملن توننا (+1,5 ملن توننا), حالىق قاجەتتىلىگىنە  – 1,7 ملن ​​توننا.

ەلەكتر جانە كوممۋنالدىق كومىردىڭ بارلىق جونەلتىلىمدەرى قاجەتتى ۆاگوندار سانىمەن قامتاماسىز ەتىلگەن. كومىر تيەلىمى مەن جەتكىزىلىمىنە  باقىلاۋدى «قتج» ۇك» اق جۇزەگە اسىرادى.

تاسىمالداۋدى ۇيلەستىرۋ ءۇشىن شتاب تاۋلىك بويى جۇمىس ىستەيدى، ونىڭ جۇمىسىنا ورتالىق اپپارات پەن ايماقتىق بولىمشەلەردەن 60-تان استام مامان جۇمىلدىرىلعان.

«قازتەمىرترانس» اق-نىڭ اشىق ۆاگوندار پاركى 29 مىڭ بىرلىكتەن تۇرادى، ونىڭ 18 مىڭى كومىر تاسىمالداۋعا پايدالانىلادى.

جازعى كەزەڭدە تۇتىنۋشىلاردى كومىرمەن ۋاقىتىلى قامتاماسىز ەتۋ ماسەلەلەرى بويىنشا قر يندۋستريا جانە قۇرىلىس مينيسترلىگىمەن، قر ەنەرگەتيكا مينيسترلىگىمەن، اكىمدىكتەرمەن جانە كومىر كاسىپورىندارىمەن كەزدەسۋلەر وتكىزىلدى.

10 قىركۇيەكتەن باستاپ تۇرعىنداردى كومىرمەن قامتاماسىز ەتۋدى جەدەل ۇيلەستىرۋ ماقساتىندا جەرگىلىكتى اتقارۋشى ورگاندارمەن كۇندەلىكتى كەزدەسۋلەر قايتا جانداندى.

«قتج» ۇك» اق كومىردى ۇزدىكسىز تاسىمالداۋدى قامتاماسىز ەتۋدى جالعاستىرۋدا جانە جىلۋ بەرۋ ماۋسىمىنىڭ باستالۋى جاعدايىندا وپەراتورلار مەن جۇك جونەلتۋشىلەردى تاسىمالداۋعا وتىنىمدەردى دەر كەزىندە بەرۋگە شاقىرادى.

Abai.kz