بيزنەستى مەملەكەتتىك ورگانداردىڭ نەگىزسىز ارالاسۋىنان قورعاۋ – پروكۋراتۋرا ورگاندارىنىڭ باسىم باعىتتارىنىڭ ءبىرى.

كاسىپكەرلەرگە قىسىم كورسەتۋگە جول بەرمەۋ جانە جازانىڭ بۇلتارتپاستىعى قاعيداتىن قامتاماسىز ەتۋ – پروكۋراتۋرا جۇيەلى تۇردە جۇزەگە اسىرىپ وتىرعان ماڭىزدى مىندەتتەر.

اعىمداعى جىلدىڭ باسىندا اكىمشىلىك قۇقىق بۇزۋشىلىق تۋرالى كودەكستىڭ 173-بابىنا كاسىپكەرلىك قىزمەتكە زاڭسىز ارالاسقانى ءۇشىن جاۋاپتىلىقتى كۇشەيتۋگە باعىتتالعان وزگەرىستەر ەنگىزىلدى.

ناۋرىز ايىندا كۇشىنە ەنگەن بۇل تۇزەتۋلەر جاۋاپتى تۇلعالار شەڭبەرىن كەڭەيتتى جانە بيزنەسكە زاڭدى تۇردە جۇمىس ىستەۋگە كەدەرگى كەلتىرەتىن ارەكەتتەر (ارەكەتسىزدىك) ءۇشىن جازالاۋ شارالارىن قاتاڭداتتى.

بۇل ورايدا پروكۋراتۋرا ورگاندارى وسى سالاداعى قۇقىق بۇزۋشىلىقتاردى انىقتاۋدى كۇشەيتتى. ەگەر وتكەن جىلدىڭ توعىز ايىندا 49 زاڭسىز ارالاسۋ فاكتىسى تىركەلسە، بيىلعى جىلدىڭ وسى كەزەڭىندە ولاردىڭ سانى 98-گە جەتتى. ونىڭ ىشىندە 92 اكىمشىلىك ءىس قارالىپ، كىنالى تۇلعالار جاۋاپقا تارتىلىپ، جالپى سوماسى 18 ملن تەڭگە ايىپپۇل سالىندى. مىسالى، ەلوردادا جەر قاتىناستارىنىڭ قىزمەتكەرى ءوز وكىلەتتىگىن اسىرا پايدالانىپ، كاسىپكەرگە وزىنە تيەسىلى قۇرىلىمداردى بۇزۋدى تاپسىرعان.

پاۆلودار وبلىسىندا اۋىل شارۋاشىلىعى باسقارماسىنىڭ باسشىسى اكىمدەرگە جەڭىلدەتىلگەن نەسيەلەۋ باعدارلاماسىندا كوزدەلمەگەن قۇجاتتاردى تالاپ ەتۋدى مىندەتتەگەن.

ماڭعىستاۋ وبلىسىندا مەملەكەتتىك كىرىستەر باسقارماسىنىڭ ينسپەكتورى كاسىپكەردى زاڭسىز تۇردە ققس تىركەۋ ەسەبىنەن الىپ تاستاعان.

اقتوبە وبلىسىندا جەر قاتىناستارى باسقارماسى باسشىسىنىڭ ورىنباسارى جەر قويناۋىن پايدالانۋشىعا كەلىسىمشارتقا سايكەس جەر ۋچاسكەسىن بەرۋدەن نەگىزسىز باس تارتقان.

جەتىسۋ وبلىسىندا اۋدان اكىمىنىڭ ورىنباسارى كاسىپكەردىڭ اۆتوۆوكزالىن قالادان تىس جەرگە كوشىرۋدى زاڭسىز تالاپ ەتكەن.

بارلىق فاكتىلەر بويىنشا كىنالى تۇلعالار اكىمشىلىك جاۋاپكەرشىلىككە تارتىلدى. بۇل باعىتتاعى جۇيەلى جۇمىس جالعاسۋدا جانە ەرەكشە باقىلاۋدا.

ەسكە سالامىز، ەگەر ءسىز كاسىپكەرلىك قىزمەتكە زاڭسىز ارالاسۋ فاكتىسىنە تاپ بولساڭىز، باس پروكۋراتۋرانىڭ Call-ورتالىعىنا حابارلاسىپ، كەڭەس پەن قۇقىقتىق كومەك الا الاسىز (تەل.: 8(7172) 30-17-93, 8-702-629-75-61).

Abai.kz