"زاڭ مەن ءتارتىپ" قاعيداسىن ىسكە اسىرۋ اياسىندا ىشكى ىستەر مينيسترلىگى ەسىرتكىنىڭ زاڭسىز اينالىمىنا بايلانىستى قىلمىستاردى انىقتاۋ جانە جولىن كەسۋ بويىنشا بەلسەندى جۇمىستاردى جالعاستىرىپ جاتىر، دەپ حابارلايدى BAQ.KZ.

جاسوسپىرىمدەر مەن جاستار اراسىنداعى جۇمىستارعا ەرەكشە نازار اۋدارىلىپ، كامەلەتكە تولماعانداردى ەسىرتكى ورتاسىنا تارتۋ فاكتىلەرىن ازايتۋعا باعىتتالعان شارالار جۇزەگە اسىرىلۋدا. وسى باعىتتا شامامەن 17 مىڭعا جۋىق ەسىرتكىگە قارسى ءىس-شارا وتكىزىلدى، بۇل شارالار 2 ميلليوننان استام ءجاسوسپىرىم مەن جاستاردى قامتىدى. قابىلدانىپ جاتقان شارالارعا قاراماستان، ەسىرتكى قۇرالدارىن تاراتۋ كەزىندە ۇستالعان كامەلەتكە تولماعانداردىڭ سانى وسكەنى بايقالادى.

مىسالى، اباي وبلىسىندا پوليتسيا قىزمەتكەرلەرى كوللەدجدىڭ ءبىرىنشى كۋرس ستۋدەنتى، كامەلەتكە تولماعان قىزدى پسيحوتروپتىق زاتتاردى اسا ءىرى كولەمدە زاڭسىز ساقتاعانى ءۇشىن ۇستادى. ءتىنتۋ بارىسىندا ودان 16 گرامم سينتەتيكالىق ەسىرتكى تابىلىپ، تاركىلەندى.

شىعىس قازاقستان وبلىسىندا تاعى ءبىر كامەلەتكە تولماعان جاس جىگىت ۇستالدى. ول الماتى قالاسىندا تۇرىپ، وسكەمەن قالاسىنا ۇشىپ بارىپ، ءبىر اي بويى ينتەرنەت-دۇكەن ارقىلى تىيىم سالىنعان زاتتاردى جەتكىزۋشى رەتىندە جۇمىس ىستەگەن. ۇستاۋ كەزىندە ودان α-PVP توبىنا جاتاتىن 3 گرامم سينتەتيكالىق ەسىرتكى الىندى.

بۇگىنگى كۇنى رەسپۋبليكا بويىنشا ەسىرتكىنىڭ زاڭسىز اينالىمىنا تارتىلعان 60-تان استام كامەلەتكە تولماعان ءجاسوسپىرىم ۇستالدى. ىشكى ىستەر مينيسترلىگى اتا-انالاردى ءوز بالالارىنىڭ كىممەن ارالاساتىنىنا، قانداي الەۋمەتتىك جەلىلەر مەن مەسسەندجەرلەردى پايدالاناتىنىنا ەرەكشە نازار اۋدارۋعا شاقىرادى. كەي جاعدايلاردا مۇنداي رەسۋرستار "قاشىقتان جۇمىس" نەمەسە "جەڭىل تابىس" تۇرىندە ۇسىنىلىپ، شىن مانىندە زاڭسىز ارەكەتتەرگە تارتۋدىڭ قۇرالىنا اينالىپ وتىر.

ءىىم ەسكە سالادى: - ەسىرتكى جانە پسيحوتروپتىق زاتتاردى ساتۋمەن اينالىسقاندارعا قىلمىستىق جاۋاپكەرشىلىك قاراستىرىلعان، ول ءتىپتى ءومىر بويىنا باس بوستاندىعىنان ايىرۋ جازاسىن قامتۋى مۇمكىن; - الداعى ۋاقىتتا كامەلەتكە تولماعانداردىڭ قۇقىق بۇزۋشىلىق ارەكەتتەرىنە اتا-انالاردىڭ سالعىرت قاراۋى اسەر ەتكەنى انىقتالعان جاعدايدا، اتا-انالىق مىندەتتەرىن تيىسىنشە ورىنداماعانى ءۇشىن جاۋاپكەرشىلىكتى قاتاڭداتۋ جوسپارلانۋدا.

ىشكى ىستەر مينيسترلىگى ازاماتتاردىڭ، اسىرەسە كامەلەتكە تولماعانداردىڭ ءومىرى مەن دەنساۋلىعىن قورعاۋعا باعىتتالعان "زاڭ مەن ءتارتىپ" قاعيداسىن دايەكتى تۇردە جۇزەگە اسىرۋدى جالعاستىرادى. جاسوسپىرىمدەردى ەسىرتكى بيزنەسىنە تارتۋدىڭ ءاربىر فاكتىسى ەرەكشە باقىلاۋدا. مينيسترلىك مۇنداي قىلمىستاردىڭ الدىن الۋ مەن جولىن كەسۋدى جالعاستىرادى.

Abai.kz