قازاقستان ۇلتتىق وليمپيادالىق كوميتەتىنىڭ پرەزيدەنتى گەننادي گولوۆكين شۆەيتساريانىڭ لوزاننا قالاسىنداعى وليمپيادالىق ۇيدە وتكەن Olympism 365 كوميسسياسىنىڭ وتىرىسىنا قاتىستى.

بۇل شارا حالىقارالىق وليمپيادالىق كوميتەتتىڭ (حوك) كوميسسيا اپتالىعى مەن Fit for the Future (F4F) اتتى كەڭەس بەرۋ كەزدەسۋلەرى اياسىندا ءوتتى. F4F - وليمپيادالىق قوزعالىستىڭ ساياساتىن جاڭارتۋ جانە باسقارۋ جۇيەسىن جەتىلدىرۋ ماقساتىندا حوك پرەزيدەنتى كيرستي كوۆەنتريدىڭ باستاماسىمەن قولعا الىنعان باعىت.

وتىرىستا قازاقستان ۇوك پرەزيدەنتى شاعىن تالقىلاۋ توپتارىنىڭ جۇمىسىنا قاتىسىپ، Olympism 365 تۇجىرىمداماسى تۇرعىسىنان نەگىزگى تاقىرىپتاردى تالقىلادى. اتاپ ايتقاندا، سپورتشىلاردى دامىتۋ، وليمپيادا ويىندارىن ۇيىمداستىرۋ، وليمپيادالىق قوزعالىستىڭ تۇراقتىلىعى، سپورتتىڭ كىرشىكسىز الەم قالىپتاستىرۋداعى ءرولى، سونداي-اق، اۋديتوريانى كەڭەيتۋ مەن تۇراقتى قارجىلاندىرۋ ماسەلەلەرى قارالدى.

كەزدەسۋ فورماتى ارقايسىسى شامامەن 45 مينۋتقا سوزىلاتىن تاقىرىپتىق سەسسيالاردان تۇردى. ءار سەسسيادان كەيىن قاتىسۋشىلار باسقا توپتارعا اۋىسىپ وتىردى.

«سپورتتىڭ الەمدى وزگەرتۋدەگى ءرولi» تاقىرىبىنداعى پىكىرتالاس بارىسىندا گەننادي گولوۆكين سپورتتى ءبىلىم، دەنساۋلىق پەن كوشباسشىلىقتىڭ ءتيىمدى قۇرالى رەتىندە قاراستىرۋدىڭ ماڭىزىن اتاپ ءوتتى. ول اسىرەسە جاستار، بوسقىندار جانە الەۋمەتتىك وسال توپتار ءۇشىن سپورتتىڭ الەۋەتىن كۇشەيتۋ قاجەت ەكەنىن ايتتى.

سونداي-اق حالىقارالىق ۇيىمدارمەن، مەملەكەتتىك قۇرىلىمدارمەن جانە ازاماتتىق قوعاممەن سەرىكتەستىك ورناتۋعا دايىن ەكەنىن جەتكىزدى.

سونىمەن قاتار ۇوك باسشىسى Olympism 365 جانە وليمپيادالىق ىنتىماقتاستىق باستامالارى اياسىندا ءاربىر باعدارلامانىڭ ناتيجەسىنە نازار اۋدارۋ قاجەت ەكەنىن اتاپ ءوتتى. بۇل - ينكليۋزيا، كليمات، تەڭدىك نەمەسە تۇراقتىلىق سەكىلدى باعىتتاردى قامتيدى.

"قازىرگى وليمپيادالىق قوزعالىس ۇنەمى جاڭارىپ، اشىق ديالوگتى تالاپ ەتەدى. Fit for the Future كەڭەس بەرۋ فورماتى ءتۇرلى ەلدىڭ وكىلدەرىن بىرىكتىرىپ، سپورتتى تۇراقتى دامىتۋ مەن ونىڭ قۇندىلىقتارىن نىعايتۋ جولىندا ورتاق شەشىم ىزدەۋگە مۇمكىندىك بەرەدى", - دەدى قازاقستان ۇوك پرەزيدەنتى گەننادي گولوۆكين.

Abai.kz