«AMANAT» پارتياسى فراكتسياسىنىڭ مۇشەسى دۇيسەنباي تۇرعانوۆتىڭ پرەمەر-مينيستر ولجاس بەكتەنوۆكە قازاقستاندىق تاۋار وندىرۋشىلەردىڭ ءتىزىلىمى بويىنشا دەپۋتاتتىق ساۋال جولدادى.

دەپۋتاتتىق ساۋال

قۇرمەتتى ولجاس ابايۇلى!

وتكەن جىلى ءبىز، «AMANAT» پارتياسى فراكتسياسىنىڭ دەپۋتاتتارى، وتاندىق تاۋار وندىرۋشىلەردى قولداۋ، ونەركاسىپتى دامىتۋ جانە يمپورتقا تاۋەلدىلىكتى تومەندەتۋ ماقساتىندا تاۋارلاردىڭ شىعۋ تەگىن انىقتاۋ ماسەلەلەرىنە قاتىستى زاڭ جوباسىن باستاماشىلىق ەتكەن ەدىك.

اتالعان زاڭ نورمالارىنا سايكەس، 2026 جىلعى 1 قاڭتاردان باستاپ ست-KZ نىسانىنداعى سەرتيفيكاتتار مەن يندۋستريالىق سەرتيفيكاتتاردىڭ ورنىنا قازاقستاندىق تاۋار وندىرۋشىلەردىڭ بىرىڭعاي ءتىزىلىم ەنگىزىلمەك. بۇل باستاما زاماناۋي تەحنولوگيالاردى ەنگىزۋگە، اشىقتىقتى ارتتىرۋعا جانە ءوندىرىستى جەرگىلىكتى دەڭگەيدە دامىتۋعا باعىتتالعان.

بيزنەس قاۋىمداستىعى جۇيەنىڭ اشىق ءارى ءتيىمدى بولۋ  يدەياسىنىڭ ءوزىن قولدايدى، الايدا ونىڭ ىسكە قوسىلۋىنا قاتىستى بىرقاتار ەلەۋلى تاۋەكەلدەر مەن جۇيەنىڭ دايىن ەمەستىگىن اتاپ وتۋدە.

بۇگىنگى تاڭدا ءتىزىلىم تولىققاندى جۇمىس نۇسقاسى ۇسىنىلماعان، ءوتىنىم بەرۋ الگوريتمى جاريالانباعان، ال «Qazindustry» اكتسيونەرلىك قوعامى تاراپىنان ناقتى رەگلامەنت پەن ىسكە قوسۋ مەرزىمدەرى ءالى بەلگىلەنبەگەن. سونىڭ سالدارىنان قازىرگى جۇيەگە قاتىسىپ وتىرعان شاعىن جانە ورتا بيزنەس سۋبەكتىلەرى جاڭا فورماتقا كوشۋ ءتارتىبىن تۇسىنبەي وتىر.

رەەستر ەرەجەلەرىندە كوزدەلگەن تەحنيكالىق جانە قارجىلىق تۇرعىدان اۋىر تالاپتار، وندىرىستە بەينەباقىلاۋ ورناتۋ، ونلاين-قولجەتىمدىلىكتى قامتاماسىز ەتۋ، وندىرىستىك دەرەكتەردى اشۋ سياقتى شارتتار كوپتەگەن شاعىن كاسىپورىندار ءۇشىن ورىندالمايتىن دەڭگەيدە.

سونىمەن قاتار، وندىرىستىك پروتسەستەر مەن تەحنولوگيالارعا سىرتقى قولجەتىمدىلىك كوممەرتسيالىق اقپاراتتىڭ تارالۋى مەن ونەركاسىپتىك تىڭشىلىق قاۋپىن ارتتىرادى. بۇل، اسىرەسە يننوۆاتسيالىق شەشىمدەردى ەنگىزىپ وتىرعان كاسىپورىندار ءۇشىن ۇلكەن قاۋىپ توندىرەدى.

اتالعان تالاپتار ونەركاسىپتىك ساياساتتىڭ نەگىزگى ماقساتتارىنا، شاعىن جانە ورتا بيزنەستىڭ قاتىسۋ ۇلەسىن كەڭەيتۋ مەن ءوندىرىستى جەرگىلىكتەندىرۋدى دامىتۋ قاعيداتتارىنا قايشى كەلەدى.

بۇدان بولەك، جۇمىستار مەن قىزمەتتەردىڭ شىعۋ تەگىن راستاۋ ءتارتىبى دە ءالى ناقتى ايقىندالماعان، بۇل قۇقىقتىق ولقىلىقتار مەن وتاندىق جەتكىزۋشىلەردىڭ مەملەكەتتىك قولداۋ باعدارلامالارىنان شەتتەتىلۋ قاۋپىن تۋعىزادى.

جۇيەلى سيپاتتاعى نەگىزگى ماسەلەلەردىڭ قاتارىندا مىنالار بار:

- اقپاراتتىق جۇيەنىڭ مەملەكەتتىك ساتىپ الۋ پورتالدارىمەن ينتەگراتسياسىنىڭ بولماۋى;

- تسيفرلىق ۆەريفيكاتسيا كريتەريلەرىنىڭ اشىق ەمەستىگى جانە كوميسسيالاردىڭ جۇمىس الگوريتمدەرى مەن مۇددەلەر قاقتىعىسىن بولدىرماۋ نورمالارىنىڭ جەتكىلىكسىزدىگى، سونىمەن بىرگە مىندەتتى بەينەجازبا جۇرگىزۋ كەزىندە تەحنولوگيالىق دەرەكتەردىڭ سىرتقا تارالۋ قاۋپى.

مەملەكەت باسشىسى بىرنەشە رەت اتاپ وتكەن بولاتىن: «ونەركاسىپتىك ساياسات وتاندىق ءوندىرىستى دامىتۋعا باعىتتالۋى ءتيىس، جاڭا كەدەرگىلەر تۋعىزباۋى قاجەت». الايدا بۇگىندە كاسىپكەرلەر تاراپىنان بەلگىسىزدىك، الاڭداۋشىلىق جانە مەملەكەتتىك ورگاندارمەن ءتيىمدى ديالوگتىڭ جوقتىعى بايقالادى.

وسىعان بايلانىستى ءبىز قتو ءتىزىلىمىنىڭ اقپاراتتىق جۇيەسىن ۋاقتىلى ىسكە قوسۋ جانە تولىققاندى تەستىلەۋدەن وتكىزۋ; ەگەر جۇيە 2026 جىلعى 1 قاڭتارعا دەيىن تولىق دايىن بولماسا، ست-KZ جانە يندۋستريالىق سەرتيفيكاتتاردىڭ قولدانىلۋ مەرزىمىن پلاتفورمانىڭ تولىق ىسكە قوسىلعانىنا دەيىن ۇزارتۋدى قاجەت دەپ سانايمىز. سونىمەن بىرگە بيزنەس جانە سالالىق قاۋىمداستىقتار ءۇشىن قتو ءتىزىلىمىنىڭ اشىق تانىستىرىلىمىن وتكىزۋ كەرەك.

سوڭعىسى، ءتىزىلىم ەرەجەلەرىن قايتا قاراپ، شاعىن جانە ورتا بيزنەسكە ارتىق اكىمشىلىك جانە تەحنيكالىق اۋىرتپالىقتار تۋعىزاتىن تالاپتاردى الىپ تاستاۋ جانە «Qazindustry» اق-نا رەەستردى ەنگىزۋدىڭ ەگجەي-تەگجەيلى جوسپار-گرافيگىن، ينتەرفەيستەردىڭ سيپاتتاماسىن جانە ءوتىنىم بەرۋشىلەرگە قويىلاتىن تالاپتاردى ۇسىنۋدى مىندەتتەۋ قاجەت.

بۇگىنگى وتاندىق تاۋار وندىرۋشىلەر – بۇل ەلىمىزدىڭ ناقتى ەكونوميكاسىن قالىپتاستىرىپ وتىرعان، جۇمىس ورىندارىن اشاتىن جانە سالىق تولەيتىن ازاماتتار.

قازاقستاندىق تاۋار وندىرۋشىلەردىڭ بىرىڭعاي ءتىزىلىمى مەملەكەت پەن بيزنەس اراسىنداعى سەنىم مەن ارىپتەستىكتى نىعايتاتىن ءتيىمدى قۇرالعا اينالۋى ءتيىس. جانە دە ول كاسىپكەرلەردىڭ دامۋىن تەجەيتىن بيۋروكراتيالىق كەدەرگى بولماۋى قاجەت.

قۇرمەتپەن، «AMANAT» پارتياسى فراكتسياسىنىڭ مۇشەلەرى

Abai.kz