NU جانىنداعى ۇلتتىق تالداۋ ورتالىعىندا (ۇتو) «وندىرىستەن سۇرانىسقا دەيىن: وتاندىق وڭدەۋ ءوندىرىسىنىڭ دامۋى» تاقىرىبىندا وتكەن دارىستە قازاقستاندا وڭدەۋ ونەركاسىبىنىڭ 2021-2025 جىلدارداعى دامۋ سەرپىنىنە ارنالعان اناليتيكالىق شولۋ ۇسىنىلدى. تالقىلاۋعا قازاقستان رەسپۋبليكاسى ونەركاسىپ جانە قۇرىلىس مينيسترلىگىنىڭ باسشىلىعى قاتىستى.

زەرتتەۋ ناتيجەسىنە سايكەس، قازاقستانداعى ءوندىرىس كولەمى تۇراقتى ءوسىپ كەلەدى، يمپورتتىڭ ءوسۋ قارقىنى باياۋلاعان، ال وڭدەۋ ونەركاسىبىنىڭ قۇرىلىمى ءارتاراپتانىپ، تەحنولوگيالىق تۇرعىدان جەتىلدىرىلۋدە. ۇتو-نىڭ باعالاۋىنشا، كەيىنگى 5 جىلدا وڭدەۋ ونەركاسىبىنىڭ نەگىزگى سەكتورلارىنداعى ءوندىرىستىڭ ورتاشا جىلدىق ءوسىمى اقش دوللارى بالاماسىندا 11,2%-دى قۇراعان. ال 2025 جىلى جىلدىق ءوسىم قارقىنى 12,1%-عا دەيىن جەدەلدەگەن. سونىمەن قاتار ەلىمىزدەگى جوعارى تەحنولوگيالىق وندىرىستەردىڭ ۇلەسى 20,7%-دان 27,6%-عا دەيىن ءوستى.

يمپورتتىڭ ورتاشا جىلدىق ءوسىمى 2021-2023 جىلدارداعى 23,9%-دان 2023-2025 جىلدارى 2,9%-عا دەيىن تومەندەدى. تالداۋ ءۇشىن ماشينا جاساۋ، مەتاللۋرگيا، حيميا، جەڭىل ونەركاسىپ جانە باسقا دا سالالار بويىنشا يمپورتتالاتىن 9 تاۋار توبى تاڭدالدى، ولار وڭدەۋ ونەركاسىبى ءوندىرىسىنىڭ شامامەن 88%-ىن قامتىدى.

«وڭدەۋ ونەركاسىبىن دامىتۋ – بۇل ءوندىرىس كولەمىنىڭ ارتۋى عانا ەمەس، سونىمەن قاتار ەكونوميكانىڭ تەحنولوگيالىق دەڭگەيى مەن باسەكەگە قابىلەتتىلىگىن ارتتىرۋ. مەملەكەتتىك ساياسات وتاندىق وندىرۋشىلەردى قولداۋعا، جاڭا ينۆەستيتسيالىق جوبالاردى ىسكە اسىرۋعا، تەرەڭ وڭدەۋدى كەڭەيتۋگە جانە قوسىلعان قۇنى جوعارى ءونىم شىعارۋعا قولايلى جاعداي جاساۋعا باعىتتالعان»، – دەدى قازاقستان رەسپۋبليكاسى ونەركاسىپ جانە قۇرىلىس ۆيتسە-ءمينيسترى ولجاس ساپاربەكوۆ.

دارىسكە قاتىسۋشىلار وڭدەۋ ونەركاسىبىنىڭ دامۋى ىشكى وندىرىستىك بازانىڭ كەڭەيگەنىن، يمپورتقا تاۋەلدىلىكتىڭ ازايعانىن جانە قازاقستاننىڭ شيكىزاتتىق ەمەس ەكسپورتتىق الەۋەتىنىڭ نىعايىپ كەلە جاتقانىن اتاپ ءوتتى.

Abai.kz