2025 جىلى 28 قاراشادا الماتى قالاسى اكىمدىگىنىڭ قولداۋىمەن جانە «الاتاۋ» ءداستۇرلى ونەر تەاترىنىڭ ۇيىمداستىرۋىمەن قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى، فيلولوگيا عىلىمدارىنىڭ دوكتورى، پروفەسسور، تۇركى الەمىنە تانىمال تۇلعا، قازاقستاننىڭ ەڭبەك سىڭىرگەن عىلىم قايراتكەرى شورا شامعاليۇلى سارىباەۆتىڭ تۋعانىنا 100 جىل تولۋىنا ارنالعان مەرەكەلىك كونتسەرت ءوتتى.

مەرەيتوي اياسىندا اكادەميكتىڭ عىلىمي مۇراسى مەن تۇلعالىق بولمىسىنا قاتىستى قۇندى پىكىرلەر مەن ەستەلىكتەر ورتاعا سالىندى. شاراعا پروفەسسور جامال ايتقاليقىزى مانكەەۆا، فيلولوگيا عىلىمدارىنىڭ كانديداتى مايرا شوراقىزى، ساياساتتانۋشى جانۇزاق اكىم، سونىمەن قاتار، قر ەڭبەك سىڭىرگەن قايراتكەرى، ءانشى، تەلەجۇرگىزۋشى، «الاتاۋ» ءداستۇرلى ونەر تەاترىنىڭ “دامۋ جانە باق”بولىمىنىڭ ورىنباسارى،  قاراگوز سۇلەيمەنوۆا شورا شامعاليۇلى سارىباەۆتىڭ قازاق ءتىل بىلىمىنە قوسقان ولشەۋسىز ۇلەسىن، ونىڭ ۇلتتىق عىلىمدى دامىتۋ جولىنداعى ەڭبەگىن ەرەكشە اتاپ ءوتتى.

احمەت بايتۇرسىنۇلى اتىنداعى ءتىل ءبىلىمى ينستيتۋتىنىڭ باس عىلىمي قىزمەتكەرى، فيلولوگيا عىلىمدارىنىڭ دوكتورى، پروفەسسور جامال ايتقاليقىزى مانكەەۆا اكادەميكتىڭ عىلىمي مۇراسىن سارالاپ، ونىڭ تۇركى الەمىندەگى بەدەلى مەن ەڭبەكتەرىنىڭ ماڭىزىن اتاپ ءوتتى. عالىمنىڭ ديالەكتولوگيا عىلىمىن قالىپتاستىرۋداعى ءرولى، ايماقتىق ءتىل ەرەكشەلىكتەرىن جۇيەلەۋ ارقىلى قازاق ءتىلىنىڭ تاريحي دامۋىن تەرەڭ زەرتتەگەنى كەڭىنەن ايتىلدى. سونىمەن بىرگە شورا شامعاليۇلىنىڭ ونەرگە جاقىندىعى، ەرەكشە ورىنداۋشىلىق قابىلەتى مەن ادامگەرشىلىك بولمىسى دا ەسكە الىندى.

ساياساتتانۋشى، «ادام» حالىقارالىق ينستيتۋتىنىڭ پرەزيدەنتى جانۇزاق اكىم ش. سارىباەۆتىڭ قازاق زيالىلارىنىڭ مۇراسىن ساقتاۋ باعىتىندا اتقارعان اۋقىمدى ەڭبەگىن اتاپ ءوتتى. اسىرەسە، حح عاسىر باسىنداعى قازاق قايراتكەرلەرىنىڭ ەڭبەكتەرىنە ارنالعان ەكى تومدىق بيبليوگرافيانى قۇراستىرۋ بارىسىندا اكادەميكتىڭ ازاماتتىق ۇستانىمى مەن قايسارلىعى ايرىقشا كورىنىس بەرگەنى تۋرالى پىكىر ءبىلدىردى. سونىمەن قاتار، ونىڭ قازاق مۋزىكا مادەنيەتىنىڭ زەرتتەلۋىنە قوسقان ۇلەسى دە ايتىلدى.

ايتا كەتۋ كەرەك، 1964 جىلى «قايرات» كومانداسى قۇرىلدى, جانە وسى كوماندانىڭ اتىن قويعاندا دا شورا شامعاليۇلى سارىباەۆتىڭ ءرولى وراسان زور بولدى. عالىم شىعارماشىلىق توپتىڭ دامۋىنا، ۇلتتىق ونەردىڭ ىلگەرىلەۋىنە قوسقان ۇلەسىمەن تاريحتا قالدى.

عالىمنىڭ قىزى، فيلولوگيا عىلىمدارىنىڭ كانديداتى مايرا شوراقىزى اكەسىنىڭ عىلىم جولىنداعى ۇستانىمدارى مەن مۇراسىنىڭ بۇگىنگى ۇرپاققا بەرەر تاعىلىمى جونىندە جىلى لەبىزىن ءبىلدىردى. ول شورا شامعاليۇلىنىڭ ومىردەن وتكەننەن كەيىن ونىڭ جەكە ءارحيۆىن جيناقتاپ، جۇيەلەۋ جۇمىستارىن قولعا العانىن، وسى ماتەريالدار نەگىزىندە بىرقاتار ەڭبەكتەر جارىق كورگەنىن اتاپ ءوتتى. سونىمەن قاتار 2021 جىلى استاناداعى ۇلتتىق اكادەميالىق كىتاپحانادان «شورا شامعاليۇلى سارىباەۆ اتىنداعى وقۋ زالىنىڭ» اشىلۋى عالىم مۇراسىنىڭ ۇرپاققا قالدىرعان ۇلكەن قازىنا ەكەنىن جەتكىزدى.

مەرەكەلىك شارا بارىسىندا اكادەميكتىڭ عىلىمي مۇراسى عانا ەمەس، ونىڭ ۇلتتىق مادەنيەتتى دامىتۋداعى ءرولى دە جان-جاقتى كورسەتىلدى. شورا سارىباەۆتىڭ ءومىرى مەن عىلىمي جولىن ايعاقتايتىن پورترەتتەر، فوتوسۋرەتتەر، ەڭبەكتەرىنەن ۇزىندىلەر، ارحيۆ ماتەريالدارى قويىلعان ەكسپوزيتسيا كوپشىلىك نازارىنا ۇسىنىلدى. كورمە عالىمنىڭ حالىقارالىق كونفەرەنتسيالار مەن قوعامدىق ءىس-شارالارداعى قىزمەتىن دە قامتىدى. كەش سوڭىندا شورا شامعاليۇلى سارىباەۆتىڭ اعارتۋشىلىق رۋحىنا ارنالعان كونتسەرتتىك باعدارلاما ۇسىنىلدى. كونتسەرتكە ەلىمىزدىڭ بەلگىلى ونەر شەبەرلەرى قاتىسىپ، «الاتاۋ» ءداستۇرلى ونەر تەاترىنىڭ ءانسامبلى دە ءوز ونەرىن كورەرمەنگە تارتۋ ەتتى. كونتسەرتتە قازاقتىڭ ءداستۇرلى ءان-كۇيلەرى، ۇلتتىق ورىنداۋشىلىق ونەردىڭ كورىنىستەرى پاش ەتىلدى.

Abai.kz