قازاقستاندا مەملەكەت باسشىسىنىڭ تاپسىرماسىن ورىنداۋ ماقساتىندا پروكۋراتۋرا قۇقىق قورعاۋ جانە ارنايى ورگاندارمەن بىرلەسىپ، سينتەتيكالىق ەسىرتكى بيزنەسىنە قارسى كۇشەيتىلگەن ءىس-قيمىل جۇرگىزۋدە. بۇل تۋرالى باس پروكۋرور بەرىك اسىلوۆ مالىمدەدى.

ارنايى پروكۋرورلار ينتەرنەتتەگى ەسىرتكى بيزنەسىنە قاتىستى بىرقاتار ءىرى قىلمىستىق ىستەردى تەرگەپ-تەكسەرۋدى اياقتاپ، سوتقا جىبەردى. سونىڭ ءبىرى – شىمكەنتتە Telegram مەسسەندجەرى ارقىلى جۇمىس ىستەگەن حالىقارالىق ەسىرتكى جەلىسىن اشكەرەلەۋ. تەرگەۋ جۇمىستارىن باسقا قۇقىق قورعاۋ ورگاندارىمەن بىرلەسىپ جۇرگىزۋمەن قاتار، قازاقستان باستاماسىمەن جەدەل-تەرگەۋ توبىنا وسى سالادا تاجىريبەسى مول اقش-تىڭ DEA اگەنتتىگى تارتىلعان.

بەرىك اسىلوۆتىڭ سوزىنشە، قىلمىستىق سحەماعا 300-دەن استام ادام قاتىسقان. تەك ەكى ايىپتالۋشىعا قاتىستى ترانزاكتسيالار كولەمى 7 ميلليون اقش دوللارىنان اسقانى انىقتالعان. جالپى 24 ادام ۇستالىپ، ولاردىڭ اراسىندا رەسەي، وزبەكستان جانە اۋعانستان ازاماتتارى بار. 500 ميلليون تەڭگەدەن استام مۇلىك مەملەكەت كىرىسىنە تاركىلەندى. اقشالاي قاراجات «دروپپەر» قىزمەتىن پايدالانعان بانك كارتالارى جانە ليتسەنزيالانباعان كريپتوبيرجالار ارقىلى اينالىمعا تۇسكەن. كريپتوۆاليۋتالاردىڭ تۇپكىلىكتى الۋشىلارى – شەت ەل ازاماتتارى.

تەرگەۋ بارىسىندا شىمكەنت قالاسى اۋماعىنان ەكى ەسىرتكى زەرتحاناسى تابىلىپ، جويىلدى. وندا 6,1 كەلى دايىن مەفەدرون، 330 گرامم ساتۋعا ارنالعان ورالعان ەسىرتكى، 2,1 توننا پرەكۋرسور جانە ەسىرتكى وندىرۋگە ارنالعان زەرتحانالىق جابدىق تاركىلەندى. قىلمىستىق جەلى «كاربون»، «DDD_Shym» جانە وزگە دەTelegram ارنالارىن پايدالانىپ، ەسىرتكىنى تاراتىپ قانا قويماي، ونى ءوندىرۋ بويىنشا نۇسقاۋلىقتار دا بەرگەن. كەيبىر قاتىسۋشىلار پرەكۋرسورلار جەتكىزىلىمىن باقىلاعان نەگىزگى توپپەن بايلانىسىن ساقتاپ، ءوز ارنالارىن اشۋعا تىرىسقان، - دەپ باياندادى باس پروكۋرور.

مۇنداي تاسىلدەر ەلىمىزدىڭ باسقا وڭىرلەرىندە دە انىقتالىپ جاتىر. ۇلىتاۋ جانە ماڭعىستاۋ وبلىستارىنىڭ ارنايى پروكۋرورلارى سينتەتيكالىق ەسىرتكى ساۋداسىن الەۋمەتتىك جەلىلەر ارقىلى جۇرگىزگەن ەكى ءىرى جەلىنىڭ قىزمەتىن توقتاتتى. بۇل ىستەر دە سوتقا جىبەرىلدى.

ۇلىتاۋ وبلىسىندا «Kaef Mafia» Telegram ارناسى ارقىلى جۇمىس ىستەگەن ەسىرتكى دۇكەنى انىقتالىپ، 6 ايىپتالۋشى قاماۋعا الىندى. تسيفرلىق اكتيۆتەر مەن كريپتوۆاليۋتا ءامياندارىن قوسا ەسەپتەگەندە 3,2 ميلليارد تەڭگەدەن استام قاراجات مەملەكەت پايداسىنا اينالدىرىلدى.

اسىلوۆتىڭ دەرەگىنشە، ماڭعىستاۋ وبلىسىندا «Dune-Operator 24/7» دەپ اتالاتىن ەسىرتكى دۇكەنىنىڭ ارەكەتتەرى توقتاتىلدى. ەسىرتكى ساۋداسىنان تۇسكەن قولما-قول اقشانى بانككە تاپسىرۋ كەزىندە جەدەل وپەراتسيا جۇرگىزىلىپ، 1 ميلليارد 155 ميلليون تەڭگە جانە 176 مىڭ اقش دوللارى تاركىلەندى. بۇعان قوسا، ءبىر كاسىپكەردىڭ بانكتىك شوتىندا ەسىرتكى بيزنەسىنەن تۇسكەن 1 ميلليارد تەڭگەگە تىيىم سالىنىپ، 734 228 اقش دوللارى كولەمىندەگى (USDT) كريپتواكتيۆ بۇعاتتالدى.

باس پروكۋرور بەرىك اسىلوۆ بۇل وپەراتسيالاردىڭ ماڭىزىن اتاپ ءوتتى.

ەسىرتكى بيزنەسىنە قارسى كۇرەستەگى بۇل وپەراتسيالار قازاقستاننىڭ قۇقىق قورعاۋ جانە ارناۋلى ورگاندارى قىزمەتكەرلەرىنىڭ جارقىن، جۇيەلى جانە جانكەشتى جۇمىسىنىڭ ۇلگىسى بولىپ تابىلادى. مىڭداعان ادامدار، سونداي-اق ولاردىڭ وتباسىلارى وسى زاماننىڭ كەساپاتىنىڭ زياندى ىقپالىنان قورعالۋدا، - دەدى ول.

پروكۋراتۋرا ازاماتتاردىڭ قۇقىقتارى مەن قاۋىپسىزدىگىن قامتاماسىز ەتۋ باعىتىنداعى جۇمىستاردى جالعاستىرا بەرمەك.

Abai.kz