كەشە اقش پرەزيدەنتى ترامپتىڭ ۋكرايناعا شۇيلىگىپ، ۋكراينادا پرەزيدەنتتىك سايلاۋ وتكىزۋ كەرەكتىگىن ايتقان.

اقش پرەزيدەنتى Politico-عا سۇحبات بەرىپ، زەلەنسكيگە ابدەن شۇيلىكتى. قۇددى سوزدەرىن ۋشاكوۆ پەن پەسكوۆ جازىپ بەرگەندەي ەستىلەدى. مىنە، بىلاي دەيدى:

- ۋكراينانى ناتو-عا قابىلدامايدى. مۇنداي تۇسىنىك اۋەلدە بولعان. پۋتينگە دەيىن-اق، ۋكراينانىڭ ناتو-عا قابىلدانبايتىنى بەلگىلى دۇنيە ەدى. ال ولار مۇنى تالاپ ەتىپ وتىر، - دەيدى.

- زەلەنسكي پۋتينمەن العاشقى كەزدەسۋىندە مىنانى ايتقان: قىرىمدى قايتارۋ جانە ناتو-عا قوسىلۋ. جانە مۇنى توتەسىنەن ايتقان. ول تىرناقشانىڭ ىشىندە «مىقتى ساۋداگەر». بۇلاي بولمايدى، - دەيدى.

- مەنىڭشە ۋكراينادا سايلاۋ وتكىزەتىن ۋاقىت كەلدى. قازىر سايلاۋ ءۇشىن ەڭ قولايلى ۋاقىت. ولار سايلاۋ وتكىزبەۋ ءۇشىن سوعىستى سىلتاۋ ەتۋدە. ال ۋكراينا حالقىنىڭ تاڭداۋعا قۇقى بار. ءتىپتى، سايلاۋدا زەلەنسكي جەڭىپ كەتۋى دە مۇمكىن عوي. كىم جەڭەتىنىن مەن بىلمەيمىن. ولار دەموكراتيا تۋرالى ايتادى دا، وزدەرى ودان الشاقتايدى، - دەدى.

- مەنىڭشە ەۋروپا قازىر وتە ءالسىز. ولار وتە-موتە ساياسي ساۋاتتى بولعىسى كەلەدى. مەنىڭشە، ولار نە ىستەۋ كەرەكتىگىن بىلمەيدى. ال مەن ەۋروپارلامەنتتە سۇيىكتى كانديداتتارىمدى قولداپ كەلەم. ءتىپتى ولارعا ۇنامايتىن ۆيكتور وربان سەكىلدى ليدەرلەردى قولدادىم، - دەدى.

- بالكىم، زەلەنسكي ءبىز ۇسىنعان كەلىسىم جوباسىن ءبىر تۇندە وقىپ شىققان شىعار. وعان تاعى ءبىر قايتالاپ مۇقيات وقىپ، تانىسىپ شىعۋ كەرەك. بۇل جوسپار ونىڭ شەنەۋنىكتەرىنە، كەڭەسشىلەرىنە، جوعارعى لاۋازىمدى وكىلدەرىنە وتە ءواتتى ۇنادى. بىراق، ولار زەلەنسكيدىڭ بۇل جوسپارمەن ءالى تانىسپاعانىن ايتتى. زەلەنسكيگە ءبىزدىڭ جوسپارمەن تانىسىپ شىعۋ كەرەك، - دەيدى.

- زەلەنسكي مىقتى ساۋداگەر. مەن ونى پ.ت.بارنۋمعا تەڭەيمىن. بارنۋمنىڭ كىم ەكەنىن بىلەسىزدەر عوي؟ جەر بەتىندەگى ەڭ مىقتىلاردىڭ ءبىرى. ول كەز كەلگەن تاۋاردى كەز كەلگەن ۋاقىتتا ساتا الاتىن. بۇل شىندىق. زەلەنسكي بايدەن دەگەن الاياقتى 350 ملرد دوللار بەرۋگە كوندىردى. مۇنىڭ اقىرى نە بولدى؟ ول ەلىنىڭ 25 پايىزىنان ايىرىلىپ قالدى، - دەيدى.

وسىعان دەيىن Politico باسىلىمى: «اقش ۋكرايناعا قىسىم جاساپ، دونباسستان كەتۋگە يتەرمەلەۋدە. كيەۆ بۇعان ءۇزىلدى-كەسىلدى قارسى. زەلەنسكي بەيبىتشىلىك كرەملدىڭ قالاۋلارىنا ەمەس، قازىرگى مايدان سىزىعىنا نەگىزدەلىپ جاسالۋى كەرەك دەگەن پوزيتسيادا. ال اقش كەلىسسوزدەردى جىلدامداتۋ ءۇشىن، كيەۆكە قىسىمدى ارتتىرۋدا»، - دەپ جازعان ەدى.

ءارتۇرلى دەرەكتەر بويىنشا: قازىر ۋكراينا تۇتاس دونباسستىڭ 20 پايىزىن باقىلاۋدا ۇستاپ وتىر. سونىڭ ىشىندە كراماتورسك پەن سلاۆيانسك ۋكراينا باقىلاۋىندا.

زەلەنسكي شۇعىل مالىمدەمە جاساپ، ترامپقا جاۋاپ بەردى:

- ەرتەڭ ترامپقا جاڭارتىلعان كەلىسىم جوباسىن ۇسىنامىز. قازىر ەۋروپالىق ارىپتەستەرىمىزبەن بىرگە ازىرلەپ جاتىرمىز، - دەدى.

- ۋكراينا رەسەيمەن تىكەلەي كەلىسسوز جۇرگىزىپ جاتقان جوق. وعان رەسەي قۇلىقسىز، - دەدى.

- ەگەر رەسەي كەلىسسە، ءبىز ەنەرگەتيكالىق سەكتورعا شابۋىلداماۋ تۋرالى ءبىتىم جاساسۋعا ءازىرمىز، - دەدى.

- ۋكراينا قازىر ءوز قارۋلارىن، سونىڭ ىشىندە باليستيكالىق زىمىراندى «ساپساندى»، جاڭارتىلعان «نەپتۋندى»، «پاليانيتسانى»، «فلامينگولاردى» قولدانۋدا، - دەدى.

- مەن سايلاۋ وتكىزۋگە دايىنمىن. سايلاۋ ماسەلەسىن ۋكراينا حالقى انىقتايدى. مەن ەرتەڭ ۋكراينادا بولامىن. سول ساتتە ءبىزدىڭ سەرىكتەستەردەن، دەپۋتاتتاردان اسكەري جاعدايدا سايلاۋ وتكىزۋ تۋرالى ۇسىنىس كۇتەمىن. ول ءۇشىن زاڭنامالىق وزگەرىستەر كەرەك بولماق. ال قازىر اقش-تان جانە ەۋروپالىق ارىپتەستەردەن سايلاۋدى وتكىزۋ ءۇشىن قاۋىپسىزدىكتى قامتاماسىز ەتۋدى سۇرايمىن. سوندا ءبىز الداعى 60-90 كۇندە سايلاۋ وتكىزە الامىز، - دەدى.

- مەن رەاليستپىن. ءبىزدىڭ ناتو-عا قوسىلعىمىز كەلەدى. بۇل - ادىلەتتى. بىراق، اقش تا، وزگە بىرنەشە ەل دە ءبىزدى ناتو-دا كورمەيدى. رەسەي ەكىباستان قارسى. سوندىقتان، بۇل قازىر مۇمكىن ەمەس، - دەدى.

- قىرىمدى قايتارۋعا كۇشىمىز كەلمەيدى. جاعدايعا شىنايى كوزبەن قاراۋ كەرەك. بىزگە لايىقتى قولداۋ دا جوق، - دەدى.

- بۇل سوعىستى باستاۋشى ءبىر عانا ەل. ول - رەسەي. مۇنى الەم جۇرتى بىلەدى. سوندىقتان قىسىمدى قورعانىپ جاتقان كيەۆكە ەمەس، باسقىنشى رەسەيگە جاساۋ ادىلەتتى بولماق، - دەدى.

تۇزدىق: ترامپ سۇحبات بەرىپ، زەلەنسكيدىڭ سايلاۋ وتكىزۋى ءتيىس ەكەنىن، قىرىمدى قايتارا المايتىنىن، ناتو-عا مۇشە بولمايتىنىن جانە اقش جوسپارىن قابىلداۋى ءتيىس ەكەنىن ايتىپ شۇيلىككەن.

ال زەلەنسكي وسىنشا ءنوپىر قىسىمنىڭ استىندا بولا تۇرا، تىعىرىقتان شىعۋدىڭ بار امالىن جاساپ باعۋدا…

«سايلاۋعا دا ماقۇلمىز، ناتو-عا دا كوندىك، قىرىمعا دا قول بۇلعايمىز. بىراق، قاۋىپسىزدىك كەپىلدىگى مەن دونباسس ماسەلەسىندە، سۋمسكى مەن حاركوۆتەگى باسقىنشى اسكەرى كىرگەن جەرلەر بويىنشا، زاپوروج اەس-ءى بويىنشا ءبىزدىڭ دە تالاپ-شارتتارىمىز ەسكەرىلۋى ءتيىس»، - دەگەن پوزيتسياسىن بىلدىرۋدە…

Abai.kz