قىسقى وليمپيا ويىندارىندا تۋ ۇستاپ شىققان وتاندىق سپورتشىلار كەلەسى جىلى يتاليانىڭ ميلان جانە كورتينا-د’امپەتستسو قالالارىندا XXV قىسقى وليمپيا ويىندارى وتەدى.

ءتورت جىلدىڭ باستى دوداسى 2026 جىلدىڭ 6-22 اقپان كۇندەرىنە جوسپارلانعان. اق قار مەن كوك مۇز ۇستىندەگى بايراقتى باسەكەگە قازاقستان قۇراماسىنىڭ سپورتشىلارى دا قاتىسادى. بۇگىن نازارلارىڭىزعا قازاقستان تاۋەلسىز ەل رەتىندە قاتىسقان قىسقى وليمپيادالاردا ەلىمىزدىڭ كوك تۋىن ۇستاپ شىققان سپورتشىلار تۋرالى اقپارات ۇسىنامىز. ءتورت جىلدىقتىڭ باستى دوداسىنا قاتىسۋ كەز كەلگەن سپورتشىنىڭ ارمانى بولسا، بۇل دودادا تۋ ۇستاپ شىعۋ – ءار سپورتشىعا بۇيىرا بەرمەيتىن اتاق جانە ۇلكەن جاۋاپكەرشىلىك.

1994 جىلى نورۆەگيانىڭ ليللەحاممەر قالاسىندا وتكەن قىسقى وليمپيادادا قازاقستاننىڭ تۋىن ترامپليننەن سەكىرۋشى، ەلىمىزدىڭ ءتورت دۇركىن چەمپيونى، تمد ەلدەرى كۋبوگىنىڭ يەگەرى قايرات بيەكەنوۆ ۇستاپ شىقتى. وليمپيادادا ول 90 مەترلىك ترامپليننەن سەكىرۋدە 48-ورىننان (157,5 ۇپاي), ال 120 مەترلىك ترامپليننەن سەكىرۋدە 58-ورىننان كورىندى (35,2 ۇپاي).

1998 جىلى جاپونيانىڭ ناگانو قالاسىنداعى قىسقى وليمپيادادا كوك تۋدى ۇستاۋ مارتەبەسى ليللەحاممەردە قازاقستان قورجىنىنا ءۇش جۇلدە سالعان شاڭعىشى ۆلاديمير سميرنوۆقا بۇيىردى. ۆلاديمير سميرنوۆ ناگانودا دا جۇلدەگەرلەر قاتارىنان كورىنىپ، وليمپيادانىڭ قولا جۇلدەسىن يەلەندى.

2002 جىلى اقش-تىڭ سولت-لەيك-سيتي قالاسىندا ۇيىمداستىرىلعان XIX قىسقى وليمپيا ويىندارىندا قازاقستان بايراعىن كونكيمەن جۇگىرۋ وكىلى راديك بيكچەنتاەۆ ۇستاپ شىقتى. راديك بيكچەنتاەۆ سول كەزدەگى قۇراماداعى ەكى وليمپياداعا قاتىسقان (1994, 1998) تاجىريبەلى سپورتشىلاردىڭ ءبىرى ەدى. 1 500 جانە 5 000 مەترگە جارىستا وتانداسىمىز 19-ورىننان كورىندى.

2006 جىلى يتاليانىڭ تۋرين قالاسىنداعى وليمپيادادا ەلىمىزدىڭ كوك تۋىن حوككەيشى الەكساندر كورەشكوۆ ۇستادى. تۋريندەگى شايبالى حوككەي باسەكەسىندە قازاقستان قۇراماسى ىرىكتەۋ كەزەڭىندە «ۆ» توبىندا سىنعا ءتۇسىپ، التى قۇرامانىڭ ىشىندە ەكى ۇپايمەن بەسىنشى ورىن الدى. ال وليمپيادانى 9-ورىنمەن قورىتىندىلادى.

2010 جىلى كانادانىڭ ۆانكۋۆەر قالاسىندا وتكەن قىسقى وليمپيادادا قازاقستاننىڭ تۋىن بياتلونشى دياس كەنەشەۆ الىپ شىقتى. ەستافەتا سايىسىندا قۇرامىندا دياس كەنەشەۆ بار قازاقستان كومانداسى مارەگە 18-ءشى بولىپ جەتتى.

2014 جىلى سوچي وليمپياداسىندا كوك تۋدى شاڭعىشى ەردوس احماديەۆ ۇستاپ شىقتى. تۋ ۇستاعان سپورتشىمىز 50 شاقىرىمدىق قاشىقتىقتا سىنعا ءتۇسىپ، مارەگە 48-ءشى بولىپ كەلدى.

2018 جىلعى پحەنچحان وليمپياداسىندا قازاقستاننىڭ كوك تۋى شورت-ترەكشى ابزال اجىعاليەۆكە تابىستالدى. اجىعاليەۆ وڭتۇستىك كورەياداعى ويىنداردا 500 مەترگە جارىستا مارەگە 9-شى بولىپ جەتتى.

2022 جىلى بەيجىڭدەگى قىسقى وليمپيادادا قازاقستاننىڭ بايراعىن شورت-ترەكتەن الەم كۋبوگى كەزەڭدەرىنىڭ جەڭىمپازى ءارى جۇلدەگەرى ابزال اجىعاليەۆ جانە كونكيمەن جۇگىرۋدەن ءتورت قۇرلىق چەمپيونى ەكاتەرينا ايدوۆا ۇستادى. قىتايداعى دودادا ابزال 500 مەترگە جارىستا 4-ورىن العان ەدى. ال ەكاتەرينا ايدوۆا 1 500 مەتر جارىستا 18-ورىننان كورىندى.

دەرەككوزى: قر تۋريزم جانە سپورت مينيسترلىگى

Abai.kz