پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆ قازاقستاننىڭ تولىققاندى تسيفرلىق ەلگە اينالۋى ءۇشىن بارلىق نەگىزگى باعىتتار قامتىلىپ جاتقانىن مالىمدەدى.

ونىڭ ايتۋىنشا، زاماناۋي تسيفرلىق ينفراقۇرىلىمدى دامىتۋ، كيبەرقاۋىپسىزدىكتى قامتاماسىز ەتۋ، سونداي-اق جاساندى ينتەللەكت تەحنولوگيالارىن ەنگىزۋ مەن اۋقىمىن كەڭەيتۋ بويىنشا جۇيەلى جۇمىستار جۇرگىزىلىپ جاتىر.

بۇگىنگى تاڭدا قازاقستاندا 6 مىڭنان استام اۋىلدىق ەلدى مەكەن بار. ونىڭ ىشىندە 3 مىڭنان استام اۋىل بيىل جانە كەلەسى جىلى تالشىقتى-وپتيكالىق بايلانىس ارقىلى جوعارى جىلدامدىقتى ينتەرنەتپەن قامتاماسىز ەتىلەدى، – دەدى ۆيتسە-پرەمەر.

ونىڭ ايتۋىنشا، وسى جۇمىستاردىڭ ناتيجەسىندە حالىقتىڭ 99 پايىزى جوعارى جىلدامدىقتى ينتەرنەتكە قول جەتكىزەدى. الايدا بۇل جوبالاردى ىسكە اسىرۋ ءۇشىن جەرگىلىكتى اتقارۋشى ورگاندار تاراپىنان جەر ۋچاسكەلەرىن ءبولۋ ماسەلەسىندە تولىق قولداۋ قاجەت.

سونىمەن قاتار اكىمدىكتەرگە ءوز وڭىرلەرىندە ينتەرنەت ساپاسىن مەملەكەتتىك باقىلاۋعا الۋ جانە ايىپپۇل سالۋ وكىلەتتىگى بەرىلگەن.

اۋىلدارعا ينتەرنەت تارتۋمەن قاتار، اۋىلداعى ءاربىر ۇيگە تالشىقتى-وپتيكالىق جەلى جۇرگىزۋ جۇمىستارى اتقارىلىپ جاتىر. بۇل “سوڭعى ميل” جوباسى دەپ اتالادى. وسى جوبا اياسىندا 400 مىڭعا دەيىن ءۇي شارۋاشىلىعىنا وپتيكا قۇرىلىسى كوزدەلىپ وتىر. قوسىمشا 2,5 ملن ادام قامتىلادى. اكىمدىكتەردەن وپتيكالىق كابەلدى ءىلۋ ءۇشىن ەلەكترمەن جابدىقتاۋ تىرەكتەرىنە قولجەتىمدىلىكتى ۇيىمداستىرۋ تالاپ ەتىلەدى، – دەدى جاسلان ماديەۆ.

سونداي-اق ۆيتسە-پرەمەردىڭ مالىمدەۋىنشە، ەكى جىل ىشىندە رەسپۋبليكالىق جانە وبلىستىق ماڭىزى بار 40 مىڭ شاقىرىم اۆتوجول ءموبيلدى بايلانىسپەن قامتىلادى.

قازىرگى تاڭدا 5G جەلىسى وبلىستىق جانە رەسپۋبليكالىق ماڭىزى بار 20 قالادا قولجەتىمدى. وسى قالالار اۋماعىنىڭ 75 پايىزىنا دەيىن قامتۋ ءۇشىن جاڭا 5G بازالىق ستانتسيالارىن ورناتۋ جۇمىستارى جالعاستىرىلادى. بۇل رەتتە اكىمدىكتەر بايلانىس ينفراقۇرىلىمىن ورناتۋ مۇمكىندىكتەرىن كەڭەيتۋ ءۇشىن ءموبيلدى وپەراتورلارعا جان-جاقتى قولداۋ كورسەتۋى ءتيىس.

ۆيتسە-پرەمەر اۆتوجولداردى ءموبيلدى بايلانىسپەن قامتۋ بويىنشا ارنايى جوبا ىسكە قوسىلعانىن اتاپ ءوتتى.

بۇل رەسپۋبليكالىق جانە وبلىستىق ماڭىزى بار 40 مىڭ شاقىرىم جولدى قامتيدى. جوبانى الداعى ەكى جىلدا اياقتاۋ جوسپارلانىپ وتىر. اكىمدىكتەردەن جەر ۋچاسكەلەرىن جەدەل ءبولۋ جانە ەلەكتر ەنەرگياسىنا قوسىلۋعا تەحنيكالىق جاعداي جاساۋ تالاپ ەتىلەدى، – دەدى جاسلان ماديەۆ.

Abai.kz