استانادا 2026 جىلى «حالىق قاتىساتىن بيۋدجەت» جوباسىن ىسكە اسىرۋ جالعاسىپ جاتىر. اتالعان جوبا اياسىندا تۇرعىندار ءوز اۋلالارىن اباتتاندىرۋعا جانە جاڭارتۋعا مۇمكىندىك الادى. قازىرگى ۋاقىتتا اۋداندىق اكىمدىكتەردە تۇرعىنداردان ءوتىنىم قابىلداۋ باستالدى، دەپ حابارلايدى استانا قالاسى اكىمدىگىنىڭ رەسمي سايتى.

«حالىق قاتىساتىن بيۋدجەت» جوباسى ازاماتتاردىڭ باستامالارىن قولداۋعا، اتاپ ايتقاندا اۋلالاردى كۇردەلى جوندەۋدەن وتكىزۋگە، گۇلزارلاردى، ساياباقتاردى جانە وزگە دە قوعامدىق كەڭىستىكتەردى قۇرۋعا باعىتتالعان. باعدارلاما 7 كەزەڭنەن تۇرادى: ساراپتامالىق كەڭەس قۇرۋ، ءوتىنىم قابىلداۋ، جوبالىق ۇسىنىستاردى تالداۋ، داۋىس بەرۋ، قورىتىندى شىعارۋ، جۇمىس جوسپارىن ازىرلەۋ جانە جوبالاردى ىسكە اسىرۋ.

بايقوڭىر اۋدانىنىڭ تۇرعىندارى وتىنىمدەرىن اۋدان اكىمدىگىنىڭ رەسمي ينتەرنەت-رەسۋرسى – www.baikonyr-astana.kz سايتىنىڭ «حالىق قاتىساتىن بيۋدجەت-2025» بولىمىنە جولداي الادى. ءوتىنىم قابىلداۋ 1 ناۋرىزعا دەيىن جالعاسادى. ءوتىنىم بەرۋ ءۇشىن جوبا اتاۋىن، سيپاتتاماسىن كورسەتۋ، ەسكيز بەن سمەتانى (شامامەن بولۋى مۇمكىن), اۋماقتىڭ قازىرگى جاعدايىن كورسەتەتىن فوتوسۋرەتتەردى تىركەۋ قاجەت. قالاۋى بويىنشا پرەزەنتاتسياسىن قوسا بەرۋگە بولادى. وسى بولىمدە جوبانىڭ ەرەجەلەرى، ۇلگىلىك جوبالىق ۇسىنىس، ءىس-شارالاردىڭ مەرزىمدەرى جانە ساراپتامالىق كەڭەس قۇرامى دا ورنالاستىرىلعان.

الماتى اۋدانىندا تۇرعىنداردان ءوتىنىم قابىلداۋ 5 قاڭتاردا اياقتالدى. قازىرگى ۋاقىتتا تۇسكەن ۇسىنىستاردى تالداۋ جانە تەكسەرۋ ءجۇرىپ جاتىر. داۋىس بەرۋ 25 قاڭتار مەن 16 اقپان ارالىعىندا وتەدى. ول ءۇشىن اۋدان اكىمدىگىنىڭ سايتىندا نەمەسە Egov Mobile قوسىمشاسىندا ەتسق ارقىلى اۆتوريزاتسيادان ءوتۋ قاجەت.
سارايشىق اۋدانىندا ءوتىنىم قابىلداۋ 20 قاڭتاردا باستالادى. ءوتىنىم قابىلداۋ كەزەڭىندە قاتىسۋشىلار ناقتى وزگەرىستەر مەن بيۋدجەتتىك ەسەپتى كورسەتە وتىرىپ، اباتتاندىرۋ جوسپارىن ازىرلەۋى ءتيىس. دايىن جوبالار اۋدان اكىمدىگىنىڭ رەسمي سايتىنداعى «پايدالى سىلتەمەلەر» بولىمىندە ورنالاسقان «حالىق قاتىساتىن بيۋدجەت-2025» بولىمىنە جۇكتەلەدى. تەحنيكالىق تالداۋ مەن تەكسەرۋدەن كەيىن جوبالار داۋىس بەرۋ كەزەڭىنە وتەدى. جوبا بۇل اۋداندا 2025 جىلدان بەرى جۇزەگە اسىرىلىپ كەلەدى. وتكەن جىلى 17 اۋلا جاڭارتىلدى. ءبىر تۇرعىن تەك ءبىر جوباعا عانا داۋىس بەرە الادى. جەڭىمپازدار ءۇش سانات بويىنشا انىقتالادى: 40 پاتەرگە دەيىن، 100 پاتەرگە دەيىن جانە 100 پاتەردەن كوپ ۇيلەردىڭ اۋلالارى.

سارىارقا اۋدانىندا دا ءوتىنىم قابىلداۋ 20 قاڭتاردا باستالادى. «حالىق قاتىساتىن بيۋدجەت» جوباسى بۇل اۋداندا 2019 جىلدان بەرى تابىستى ىسكە اسىرىلىپ كەلەدى. وسى ۋاقىت ىشىندە تۇرعىنداردىڭ 157 باستاماسى جۇزەگە اسىرىلدى. تەك وتكەن جىلدىڭ وزىندە 52 اۋلا جاڭارتىلىپ، ونىڭ 36 جوباسى تۇرعىنداردىڭ تىكەلەي قاتىسۋىمەن ىسكە اسقان.

نۇرا اۋدانىنىڭ تۇرعىندارىنان ءوتىنىم قابىلداۋ دا قاڭتار ايىندا باستالادى. جوبا اياسىندا استانادا جىل سايىن 100-دەن استام اۋلا جاڭارتىلادى. تۇرعىندار باعدارلاماعا قاتىسۋ ارقىلى ءوز اۋلالارىن جاقسارتۋعا باعىتتالعان جەكە ۇسىنىستارىن ۇسىنا الادى.

ەسىل اۋدانىندا «حالىق قاتىساتىن بيۋدجەت» جوباسى بويىنشا ءوتىنىم قابىلداۋ 2026 جىلعى 23 قاڭتار مەن 1 ناۋرىز ارالىعىندا جۇرگىزىلەدى. وسى كەزەڭدە تۇرعىندار اباتتاندىرۋعا قاتىستى ناقتى ۇسىنىستارىن جانە قاجەتتى بيۋدجەت ەسەبىن كورسەتىپ، باستامالارىن جولداۋى ءتيىس. جوبالار اۋدان اكىمدىگىنىڭ رەسمي سايتىنداعى «حالىق قاتىساتىن بيۋدجەت-2026» ءبولىمى ارقىلى قابىلدانادى. ءوتىنىم قابىلداۋ اياقتالعاننان كەيىن 5 ساۋىرگە دەيىن تەحنيكالىق تەكسەرۋ جانە تالداۋ جۇرگىزىلىپ، كەلەسى كەزەڭگە وتەتىن جوبالار انىقتالادى. داۋىس بەرۋ 6-24 ءساۋىر ارالىعىندا وتسە، 24-29 ساۋىردە قورىتىندىسى شىعارىلادى.

ال 4 مامىرعا دەيىن ساراپتامالىق كەڭەس ىرىكتەلگەن باستامالاردى ىسكە اسىرۋدىڭ باسىمدىقتارىن ايقىندايدى. تۇرعىندار قولداعان جوبالاردى ىسكە اسىرۋ 2025 جىلعى 4 مامىر مەن 15 قىركۇيەك ارالىعىنا جوسپارلانىپ وتىر.

Abai.kz