سەناتتىڭ الەۋمەتتىك-مادەني دامۋ جانە عىلىم كوميتەتىنىڭ توراعاسى نۇرتورە ءجۇسىپ قازاقستان رەسپۋبليكاسىنداعى يزرايل مەملەكەتىنىڭ توتەنشە جانە وكىلەتتى ەلشىسى يواۆ بىستريتسكيمەن كەزدەسۋ وتكىزدى. كەزدەسۋ بارىسىندا قازاقستاندىق-يزرايلدىك ىنتىماقتاستىقتىڭ قازىرگى جاي-كۇيى مەن دامۋ پەرسپەكتيۆالارى، سونداي-اق ەكىجاقتى قاتىناستاردىڭ نەگىزگى باعىتتارى بويىنشا ءوزارا ءىس-قيمىلدى كەڭەيتۋ ماسەلەلەرى تالقىلاندى.

نۇرتورە ءجۇسىپ قازاقستان مەن يزرايل اراسىنداعى ءوزارا ءتيىمدى ىنتىماقتاستىقتىڭ ساۋدا-ەكونوميكالىق، ينۆەستيتسيالىق، اگرارلىق جانە ونەركاسىپتىك سالالاردا، سونداي-اق مادەني-گۋمانيتارلىق باعىتتا جۇيەلى تۇردە دامىپ كەلە جاتقانىن اتاپ ءوتتى. سونىمەن قاتار پارلامەنتارالىق ءوزارا ءىس-قيمىلعا ەرەكشە نازار اۋدارىلدى.

«2023 جىلى سەنات دەلەگاتسياسى يزرايلگە رەسمي ساپارمەن باردى. ال وتكەن جىلى يزرايل كنەسسەتىنىڭ سپيكەرى امير وحانانىڭ قازاقستانعا جاۋاپ ساپارى ءوتتى. ساپار اياسىندا امير وحانا سەنات توراعاسى ماۋلەن اشىمباەۆپەن مازمۇندى كەزدەسۋ وتكىزدى. كەلىسسوزدەر بارىسىندا پارلامەنتارالىق ىنتىماقتاستىقتى دامىتۋ، ساياسي ديالوگتى كەڭەيتۋ، سونداي-اق ساۋدا-ەكونوميكالىق، يننوۆاتسيالىق جانە گۋمانيتارلىق سالالارداعى ءوزارا ءىس-قيمىل ماسەلەلەرى تالقىلاندى. ارينە، بۇل ساپار قازاقستاندىق-يزرايلدىك ەكىجاقتى قاتىناستاردى دامىتۋداعى ماڭىزدى وقيعا بولدى. قالىپتاسقان قارقىندى ديالوگتى الداعى ۋاقىتتا دا جالعاستىراتىنىمىزعا سەنىمدىمىن», – دەدى نۇرتورە ءجۇسىپ.

يزرايل ەلشىسى يواۆ بىستريتسكي كەزدەسۋگە العىس بىلدىرە وتىرىپ، قازاقستاندا جۇرگىزىلىپ جاتقان ساياسي جانە ەكونوميكالىق رەفورمالاردى جوعارى باعالادى جانە ەكى ەل اراسىنداعى ىنتىماقتاستىقتى ودان ءارى نىعايتۋعا دايىن ەكەنىن جەتكىزدى. يزرايل تاراپى قازاقستانمەن ورنىقتى ءارى كوپۆەكتورلى ءوزارا ءىس-قيمىل قاعيداتتارىنا بەيىلدىلىگىن راستادى.

اڭگىمە بارىسىندا اۋىل شارۋاشىلىعى سالاسىنداعى ىنتىماقتاستىق، ونىڭ ىشىندە اگرارلىق سەكتوردا تسيفرلىق شەشىمدەردى دامىتۋ جانە سۋ قاۋىپسىزدىگى باعىتىنداعى ءوزارا ءىس-قيمىل ماسەلەلەرى دە قارالدى.

«قازاقستان ساپالى ورگانيكالىق اۋىل شارۋاشىلىعى ونىمدەرىن وندىرۋگە زور الەۋەتكە يە. ءبىزدىڭ ەلىمىز ەگىستىك جەرلەر مەن جايىلىمدار كولەمى بويىنشا الەمدە التىنشى ورىندا تۇر. ءبىز بيداي ەكسپورتتاۋشى ءىرى ون ەلدىڭ قاتارىنا كىرەمىز ءارى ۇن ەكسپورتى بويىنشا كوشباسشىلاردىڭ ءبىرىمىز. الەم بويىنشا ازىق-تۇلىك جەتكىزۋ تىزبەكتەرىندەگى تۇراقسىزدىقتىڭ ارتۋىن ەسكەرە وتىرىپ، يزرايلگە استىق پەن ازىق-تۇلىك ونىمدەرىن ەكسپورتتاۋدى جولعا قويۋعا بولادى. بۇل ءۇشىن ەلدەرىمىزدە قاجەتتى زاڭنامالىق بازا بار. ءوز كەزەگىندە يزرايل اگروونەركاسىپ كەشەنىن دامىتۋعا قاجەتتى وزىق تەحنولوگيالارعا يە. ءوزارا ىنتىماقتاستىعىمىزدىڭ ماڭىزدى باعىتى - سۋ رەسۋرستارىن باسقارۋ. سوڭعى جىلدارى قازاقستان سۋ تاپشىلىعىنا تاپ بولىپ، بۇل ماسەلەنى ءتيىمدى شەشۋدى قاجەت ەتۋدە. يزرايل وسى سالادا الەمدىك دەڭگەيدە مويىندالعان كوشباسشى. سۋدى تازارتۋ، تۇششىلاندىرۋ، قايتا پايدالانۋ جانە سۋ ينفراقۇرىلىمىن جاڭعىرتۋداعى جەتىستىكتەرىڭىز ەرەكشە اسەر قالدىرادى. وسى ماڭىزدى سالادا ىنتىماقتاستىعىمىزدىڭ كەڭەيگەنىنە قۋانىشتىمىز», - دەپ تۇيىندەدى سەناتور.

Abai.kz