قازاقستان ۇلتتىق بانكىنىڭ اقشا-نەسيە ساياساتى جونىندەگى كوميتەتى بازالىق مولشەرلەمەنى 18% دەڭگەيىندە، ±1 پايىزدىق تارماق دالىزىمەن ساقتاۋ تۋرالى شەشىم قابىلدادى. بۇل تۋرالى قازاقستان ۇلتتىق بانكى ءباسپاسوز قىزمەتى ءمالىم ەتتى.

ۆەدومستۆو دەرەگىنشە، 2025 جىلدىڭ قورىتىندىسى بويىنشا ينفلياتسيا 12,3% بولدى (بولجام – 12–13%). ينفلياتسياعا ەڭ ۇلكەن ۇلەستى ازىق-تۇلىك باعاسىنىڭ ءوسۋى قوستى – 13,5%. اسىرەسە ەت پەن سارى ماي باعاسىنىڭ قىمباتتاۋى ءوندىرىس شىعىندارىنىڭ ارتۋىمەن جانە ەكسپورت كولەمىنىڭ جوعارى بولۋىمەن ءتۇسىندىرىلدى. ازىق-تۇلىككە جاتپايتىن تاۋارلار ينفلياتسياسى 11,1%، اقىلى قىزمەتتەر باعاسىنىڭ ءوسىمى 12% دەڭگەيىندە قالىپتاستى.

ۇلتتىق بانكتىڭ مالىمدەۋىنشە، ينفلياتسيا ءالى دە ىشكى سۇرانىستىڭ ۇسىنىس مۇمكىندىكتەرىنەن جوعارى بولۋ جاعدايىندا قالىپتاسۋدا. تاريفتىك رەفورما مەن جانار-جاعارماي نارىعىن ىرىقتاندىرۋدىڭ جاناما اسەرلەرى باعا مەن ينفلياتسيالىق كۇتۋلەرگە ىقپال ەتۋدى جالعاستىرىپ وتىر. حالىقتىڭ ءبىر جىل العا ينفلياتسيالىق كۇتۋلەرى 14,7%-عا دەيىن وسكەن، ال نارىقتىڭ كاسىبي قاتىسۋشىلارىنىڭ 2026 جىلعا بولجامى 10,8%-عا جەتكەن.

سونىمەن قاتار 2026 جىلدىڭ I توقسانىنىڭ سوڭىنا دەيىن (قاڭتار–ناۋرىز) كوممۋنالدىق تاريفتەردى بارلىق تۇتىنۋشىلار ءۇشىن كوتەرۋ ۋاقىتشا توقتاتىلدى. 2025 جىلعى 16 قازاننان بەرى اي-92 ماركالى بەنزين مەن ديزەل وتىنى باعاسىنىڭ وسۋىنە موراتوري ەنگىزىلگەن، ونى 1 ساۋىردە الىپ تاستاۋ جوسپارلانىپ وتىر.

ۇلتتىق بانكتىڭ كەلەسى جوسپارلى شەشىمى 6 ناۋرىزدا جاريالانادى.

Abai.kz