جەتىسۋ وبلىسىنىڭ ەكولوگيالىق ءتۋريزمىن دامىتۋدا باسىمدىق بەرىلەتىن باعىتتىڭ ءبىرى – «التىنەمەل» جانە «جوڭعار الاتاۋى» ۇلتتىق تابيعي پاركتەرى مەن جوڭعار الاتاۋى جوتالارى. بۇل رەتتە ينفراقۇرىلىمدى دامىتۋعا قاتىستى قولعا الىنعان شارالاردىڭ ناتيجەسىندە اتالعان ەكى پارككە كەلۋشىلەر سانى 2024 جىلى 27 مىڭ بولسا، وتكەن جىلى بۇل كورسەتكىش 39,5 مىڭعا جەتكەن، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

وبلىستىق تۋريزم باسقارماسىنىڭ مالىمەتىنە قاراعاندا، تۋريستەردى تارتۋ ماقساتىندا 2023 جىلى «التىنەمەل» ۇلتتىق پاركىندە جەكە ينۆەستيتسيالار ەسەبىنەن ۆيزيت-ورتالىق سالىندى. سول سياقتى بىلتىر اتالعان پاركتە تۋريستىك باعىتتارداعى اقپاراتتىق بەلگىلەر جاڭارتىلدى. «بەسشاتىر» ساق قورعاندارىنىڭ شاتىرىنا جوندەۋ جۇمىستارى جۇرگىزىلدى. «جاڭاتوعاي» جانە «تاڭبالىتاس» كوردوندارىندا الاۋ جاعۋعا ارنالعان ارنايى ورىندار جابدىقتالدى.

سول سياقتى سارقان اۋدانىنىڭ توپولەۆكا اۋىلىندا ۆيزيت-ورتالىق اشىلدى. «جوڭعار الاتاۋى» ۇلتتىق پاركى اۋماعىندا 4 دەمالىس ايماعى، 2 اۆتوتۇراق ورناتىلىپ، 22 اقپاراتتىق ستەند، 113 اقپاراتتىق تاقتايشا، 2 كىرەبەرىس اركا، سونداي-اق قوقىس جيناۋعا ارنالعان كونتەينەرلەر مەن سانيتارلىق توراپتار قويىلدى.

بۇگىنگى تاڭدا جاسىلكول كولىنە كولىكپەن قاتىناۋدى قامتاماسىز ەتۋ ءۇشىن «توپولەۆكا – جالاڭاش كوردونى» اۆتوموبيل جولىنىڭ 20 شاقىرىمىنا ورتاشا جوندەۋ جۇمىستارى جۇرگىزىلدى. جاسىلكولگە اپاراتىن جول قۇرىلىسى بيىل اياقتالادى.

ەلىمىزدەگى ەڭ بيىك بۇرقانبۇلاق سارقىراماسىنا (جوڭعار الاتاۋىنىڭ تاۋ جۇيەسى) دەيىنگى 31 كم اۆتوموبيل جولىن قايتا جاڭارتۋ جۇمىستارى جۇرگىزىلۋدە.

- ىشكى ءتۋريزمدى ناسيحاتتاۋ جانە جەتىسۋ وبلىسىنا كەلەتىن تۋريستەر سانىن ارتتىرۋ ماقساتىندا وبلىس اكىمىنىڭ تاپسىرماسىنا سايكەس  وڭىردە جىل سايىن يميدجدىك بۇقارالىق ءىس-شارالار وتكىزىپ كەلەمىز. ءبىزدىڭ وبلىستا ۇيىمداستىرىلاتىن «سيۆەرس الما اعاشىنىڭ گۇلدەنۋى»، «الاكول تولقىنى»، «التىنەمەل – قۇلاندار مەكەنى» فەستيۆالدارى تۋريزم جانە سپورت مينيسترلىگىنىڭ 2026 جىلعا ارنالعان مادەني-تۋريستىك وقيعالار كۇنتىزبەسىنە ەنگىزىلدى. جالپى، قابىلدانعان شارالاردىڭ ارقاسىندا 2025 جىلعى مونيتورينگ بويىنشا وڭىرگە كەلگەن تۋريستەر سانى 11%-عا، سونىڭ ىشىندە شەتەلدىك تۋريستەر سانى 60%-عا ارتتى، - دەدى وبلىستىق تۋريزم باسقارماسىنىڭ باسشىسى ساكەن تۇكىباەۆ.

اتاپ وتسەك، وبلىس اۋماعىندا ەكى ۇلتتىق پاركپەن قاتار الاكول مەملەكەتتىك تابيعي قورىعى ورنالاسقان.

Abai.kz