جوعارعى سوت توراعاسى اسلامبەك مەرعاليەۆ ەلوردا سۋديالارىنا استانا قالالىق سوتىنىڭ جاڭا توراعاسى ايدار سماعۇلوۆتى تانىستىردى. بۇل قىزمەتكە تاعايىندالعانعا دەيىن ول اقتوبە وبلىستىق سوتىنىڭ توراعاسى قىزمەتىن اتقارعان.

كەزدەسۋگە استانا قالاسىنىڭ اكىمى جەڭىس قاسىمبەك، ەلوردا سوتتارىنىڭ سۋديالارى مەن قىزمەتكەرلەرى، سونداي-اق قۇقىق قورعاۋ جانە مەملەكەتتىك ورگانداردىڭ وكىلدەرى قاتىستى.

ءىس-شاراعا قاتىسۋشىلارعا ەلوردا سوتىنىڭ جاڭا توراعاسىن تانىستىرا وتىرىپ، ا.مەرعاليەۆ ونىڭ كاسىبي تاجىريبەسىن، باسقارۋشىلىق قابىلەتتەرىن جانە سۋديالار قاۋىمداستىعىنداعى بەدەلىن اتاپ ءوتتى.

جوعارعى سوت توراعاسى ەلوردا مەملەكەتىمىزدىڭ ءىرى ساياسي، اكىمشىلىك جانە ىسكەرلىك ورتالىعى ەكەنىن، مۇندا كۇردەلى ءارى قوعام ءۇشىن ماڭىزدى ىستەردىڭ ەداۋىر بولىگى قارالاتىنىن العا تارتتى.

وسىعان بايلانىستى ەلوردا سوتتارىنىڭ قىزمەتى جوعارى جاۋاپكەرشىلىكتى، كاسىبيلىكتى جانە سوت پراكتيكاسىنىڭ بىركەلكىلىگىن قامتاماسىز ەتۋدى تالاپ ەتەدى. استانا سۋديالار كورپۋسىنىڭ الدىنا قويىلعان نەگىزگى مىندەتتەردىڭ قاتارىندا سوت تورەلىگىن جۇزەگە اسىرۋ ساپاسىن ارتتىرۋ جانە قوعامنىڭ سوت جۇيەسىنە دەگەن سەنىمىن نىعايتۋ بار. ا.مەرعاليەۆ ا.سماعۇلوۆ سوتتاردىڭ ءتيىمدى جۇمىس ىستەۋىنە جانە ولاردىڭ ودان ءارى دامۋىنا ەلەۋلى ۇلەس قوساتىنىنا سەنىم ءبىلدىردى.

ايدار سماعۇلوۆ 1973 جىلى سولتۇستىك قازاقستان وبلىسى، بلاگوۆەششەنكا اۋىلىندا دۇنيەگە كەلگەن. 2001 جىلى قازاق مەملەكەتتىك زاڭ اكادەمياسىن تامامداعان.

2001-2004 جىلدار — سولتۇستىك قازاقستان وبلىسى سوتتارى اكىمشىلىگىنىڭ قۇرىلىمدىق بولىمشەلەرىندە قىزمەت اتقارعان;

2004-2010 جىلدار — پەتروپاۆل قالالىق سوتىنىڭ، پەتروپاۆل قالاسىنىڭ № 2 سوتىنىڭ سۋدياسى;

2010-2014 جىلدار — سولتۇستىك قازاقستان وبلىسى م.جۇماباەۆ اۋداندىق سوتىنىڭ توراعاسى;

2014-2017 جىلدار — سولتۇستىك قازاقستان وبلىستىق سوتىنىڭ سۋدياسى;

2017-2023 جىلدار — سولتۇستىك قازاقستان وبلىستىق سوتىنىڭ ازاماتتىق ىستەر جونىندەگى سوت القاسىنىڭ توراعاسى;

2023 جىلدان 2026 جىلعى 4 ناۋرىزعا دەيىن — اقتوبە وبلىستىق سوتىنىڭ توراعاسى.

Abai.kz