مامىلەلەردى جۇزەگە اسىرۋعا مۇمكىندىك بەرەتىن ارنايى ليتسەنزيا قارجى مينيسترلىگىنىڭ سايتىندا جاريالاندى.

اقش 11 ساۋىرگە دەيىن رەسەي مۇنايى مەن مۇناي ونىمدەرىن ساتۋعا قاتىستى سانكتسيالاردى ۋاقىتشا جەڭىلدەتتى. بۇل 12 ناۋرىزعا دەيىن تانكەرلەرگە تيەلگەن قارا التىنعا قاتىستى بولماق، دەپ ءحابارلايدى شەتەلدىك باق.

اقش قارجى مينيسترلىگىنىڭ باسشىسى سكوتت بەسسەنتتىڭ سوزىنشە، مۇنداي شەشىمدى پرەزيدەنت دونالد ترامپ قابىلداعان. وسىلايشا الەمدىك ەنەرگەتيكالىق نارىقتاعى تۇراقتىلىقتى ساقتاۋ جانە مۇناي باعاسىنىڭ كۇرت قىمباتتاۋىنا جول بەرمەۋ كوزدەلىپ وتىر.

مينيستر X الەۋمەتتىك جەلىسىندەگى جازباسىندا بۇل "ناقتى ءارى قىسقا مەرزىمدى شارا" ەكەنىن مالىمدەدى. بەسسەنت ءتيىستى قادام ماسكەۋگە قارجىلىق تۇرعىدان ايتارلىقتاي پايدا اكەلمەيدى دەپ وتىر. سەبەبى رەسەيدىڭ مۇناي-گاز سالاسىنان تۇسەتىن نەگىزگى تابىسى ءوندىرىس ورىندارىندا الىناتىن سالىقتار ارقىلى قالىپتاسادى. سونىمەن قاتار ول مۇناي باعاسىنىڭ ءوسۋىن قىسقا مەرزىمدى جانە ۋاقىتشا قۇبىلىس دەپ باعالادى. اقش قارجى ءمينيسترىنىڭ سوزىنشە، ۇزاق مەرزىمدە بۇل جاعداي ۆاشينگتون ءۇشىن ءتيىمدى بولۋى مۇمكىن.

Fox News تەلەارناسىنىڭ حابارلاۋىنشا، 12 ناۋرىزداعى جاعداي بويىنشا الەمنىڭ 30 ءتۇرلى نۇكتەسىندە تۇرعان تانكەرلەردە رەسەيگە تيەسىلى 124 ميلليونعا جۋىق باررەل مۇناي بار. تەلەارنا دەرەگىنە سايكەس، ورمۋز بۇعازىنداعى جاعدايدى ەسكەرگەندە بۇل كولەم 5-6 كۇندىك مۇناي جەتكىزىلىمىنە عانا جەتۋى مۇمكىن.

Abai.kz