بۇگىن ۇلىستىڭ ۇلى كۇنى وبلىس ورتالىعىندا كەڭ كولەمدە اتالىپ ءوتىلىپ جاتىر. تاڭەرتەڭ رەسپۋبليكا الاڭىندا قازاقتىڭ ۇلتتىق كيىمىن كيگەن 5201 دومبىراشى ءبىر مەزەتتە «اقبۇلاق» ءانىن ورىندادى.

ولاردىڭ ىشىندە ايماق باسشىسى نۇرىمبەت ساقتاعانوۆ تا بولدى. بۇل رەسمي تۇردە گيننەسستىڭ رەكوردتار كىتابىنا ەندى. الەمدىك رەكوردتى راستايتىن سەرتيفيكات وبلىس اكىمىنە سالتاناتتى تۇردە تابىستالدى.

جالپى ءاز ناۋرىزعا وراي ورتالىق الاڭدا 10 اقشاڭقان كيىز ءۇي تىگىلدى. قالا تۇرعىندارى مەن قوناقتارىنا ارنالعان مەرەكەلىك باعدارلاما مازمۇندى ءارى الۋان ءتۇرلى. كونتسەرت قويىلىپ، ۇلتتىق ويىندار ويناتىلىپ، جارمەڭكەلەر ۇيىمداستىرىلعان.

«بارشاڭىزدى ۇلىستىڭ ۇلى كۇنىمەن شىن جۇرەكتەن قۇتتىقتايمىن! ءاز-ناۋرىز - بەرەكە مەن بىرلىكتىڭ، ىرىس پەن ىنتىماقتىڭ باستاۋى، جاقسىلىقتىڭ جارشىسى. مەملەكەت باسشىسى قاسىم-جومارت كەمەلۇلى توقاەۆتىڭ باستاماسىمەن ءتول مەرەكەمىز جاڭا مازمۇندا، جاڭا سيپاتتا تويلانىپ كەلەدى. ءار شاڭىراققا قۇت-بەرەكە، شاتتىق پەن قۋانىش تىلەيمىن. ۇلىس وڭ بولسىن! اق مول بولسىن!»، - دەدى نۇرىمبەت ساقتاعانوۆ.

ايتا كەتەيىك، كۇندىزگى كونتسەرتتىك باعدارلاما اياسىندا «الاشۇلى»، Bayansulu جانە گۇلنۇر سالبانوۆا سىندى تانىمال انشىلەر مەن شىعارماشىلىق ۇجىمدار ساحنادا ونەر كورسەتەدى.

Abai.kz