ەلىمىزدە تابيعي مونوپوليا سۋبەكتىلەرى كوممۋنالدىق تاريفتەردى ءوسىرۋ بويىنشا ءوتىنىم بەرە باستادى. قۇزىرلى ورگان بۇل وتىنىمدەردى 30 كۇننەن 90 كۇنگە دەيىنگى ارالىقتا قاراپ، شەشىم قابىلدايدى. تاريف ءار وڭىردە ءار قالاي كوتەرىلۋى مۇمكىن. بۇل تۋرالى قر ۇلتتىق ەكونوميكا مينيسترلىگى تابيعي مونوپوليالاردى رەتتەۋ كوميتەتى توراعاسىنىڭ ورىنباسارى نۇرلان بولاتباەۆ «24KZ» تەلەارناسىنداعى «ءتۇيىن» باعدارلاماسىنا بەرگەن سۇحباتىندا ايتتى.

«1 ساۋىرگە دەيىن تاريفتەردى وسىرمەۋ بويىنشا موراتوري بولعانى بەلگىلى. قازىر موراتوري اياقتالعاننان كەيىن تابيعي مونوپوليا سۋبەكتىلەرى بىزگە ءوتىنىم بەرە باستادى. تاريف قالىپتاستىرۋدىڭ ءوز قاراۋ مەرزىمدەرى بار. وتىنىمدەر 30 كۇننەن 90 كۇنگە دەيىن قارالۋى مۇمكىن. بىراق بۇنىڭ بارلىعى بىردەن قابىلدانادى دەگەن ءسوز ەمەس. قۇزىرلى ورگان نەگىزدىلىگىن قاراپ، جاريا تىڭداۋ وتكىزگەننەن كەيىن، بارلىق پروتسەستى وتكىزگەننەن كەيىن شەشىم قابىلدايدى»، - دەدى باعدارلاما قوناعى.

كوممۋنالدىق تاريفتەردىڭ قىمباتتاۋىنا نە سەبەپ؟

ينفلياتسيانىڭ، كوممۋنالدىق نىسانداردى جوندەۋ ءۇشىن ساتىپ الىناتىن تاۋارلار باعاسىنىڭ، جالاقىنىڭ ءوسۋى تاريفتەردىڭ كوتەرىلۋىنە ىقپال ەتىپ وتىر.

«ءار وڭىردە ءارتۇرلى. بۇل جەردە ورتاق ءوسىم تۋرالى ايتۋعا كەلمەيدى. تابيعي مونوپوليا سۋبەكتىلەرىنىڭ وزدەرىنىڭ تاريفتىك قۇرىلىمدارى بار. باستى سەبەپتەرىنىڭ ءبىرى - بىزدە كوممۋنالدىق ينفراقۇرىلىمداردىڭ، جەلىلەردىڭ توزۋىنىڭ جوعارى بولۋى. كۇردەلى جوندەۋلەر قاجەت ەتەدى. كۇردەلى جوندەۋلەر قاراجات قاجەت ەتەدى. ياعني، بارلىعى ءتاريفتىڭ قۇرىلىمىندا ءوزىنىڭ ورنىن الادى»، - دەپ اتاپ ءوتتى سپيكەر.

مونوپوليستەر حالىققا 14 ملرد تەڭگە قاراجاتتى قايتاردى

بىلتىر ءوز مىندەتتەمەلەرىن ورىنداماعان تابيعي مونوپوليا سۋبەكتىلەرى 14 ملرد تەڭگە قاراجاتتى تۇتىنۋشىلارعا كەرى قايتاردى. زاڭناما بۇزعان مونوپوليستەرگە قاتىستى 535 اكىمشىلىك ءىس قوزعالىپ، 1 ملرد تەڭگە ايىپپۇل سالىندى.

«وتكەن جىلى مونوپوليستەردىڭ زاڭ بۇزۋشىلىقتارعا جول بەرگەنىنە بايلانىستى ءبىز 14 ملرد تەڭگە قاراجاتتى حالىققا كەرى قايتارۋ جۇمىستارىن جۇرگىزدىك. ياعني، ۋاقىتشا وتەمدىك تاريف ارقىلى تاريفتەردى 14 ملرد تەڭگەگە ءتۇسىرۋ جۇمىستارىن جۇرگىزدىك. بۇعان قوسا، مونوپوليستەرگە اكىمشىلىك شارالار قولدانۋ جۇمىستارى جۇرگىزىلدى. 535 اكىمشىلىك ءىس قوزعالىپ، 1 ملرد تەڭگەگە جۋىق ايىپپۇل سالىنعان تابيعي مونوپوليا سۋبەكتىلەرىنە»، - دەدى نۇرلان بولاتباەۆ.

مونوپوليستەر تابىسىن كۇردەلى جوندەۋ جۇمىستارىنا جۇمساۋعا مىندەتتەلەدى

ەندى ستراتەگيالىق نىسانداردىڭ توزۋ دەڭگەيىن 90%-دان اسىرعان مونوپوليستەرگە قاتاڭ تالاپ قويىلىپ وتىر. «قىزىل» ايماقتاعىلار 5 جىل ىشىندە ءوز تابىسىن كۇردەلى جوندەۋ جۇمىستارىنا جۇمساۋعا مىندەتتەلەدى.

«تابيعي مونوپوليا سۋبەكتىلەرىن توزۋ دەڭگەيى بويىنشا «قىزىل»، «سارى»، «جاسىل» ايماقتاعىلار دەپ بولەمىز. قىزىل ايماقتاعىلارعا «كوممۋنالدىق جەلىلەر مەن ينفراقۇرىلىمدى جاڭعىرتۋ» ۇلتتىق جوباسى اياسىندا ءوز تابىستارىن ينۆەستيتسياعا، ياعني كۇردەلى جوندەۋ جۇمىستارىنا جۇمساۋ كەرەك دەگەن تالاپ قويىلىپ جاتىر. 5 جىلدىقتا ولاردان وتىنىمدەردى كۇتىپ، كۇردەلى جوندەۋ جۇمىستارىن جۇرگىزۋگە مىندەتتەيتىن بولامىز»، - دەپ قورىتتى تابيعي مونوپوليالاردى رەتتەۋ كوميتەتى توراعاسىنىڭ ورىنباسارى نۇرلان بولاتباەۆ.

تولىق باعدارلاما:

Abai.kz