«AMANAT» فراكتسياسىنىڭ مۇشەسى نارتاي سارسەنعاليەۆ پرەمەر-مينيستر ولجاس بەكتەنوۆتىڭ اتىنا دەپۋتاتتىق ساۋال جولداپ، ءوزىن «بيلەر كەڭەسى» نەمەسە «بي» دەپ اتايتىن قوعامدىق ۇيىمداردىڭ قىزمەتىنە قاتىستى ماسەلە كوتەردى.

دەپۋتاتتىڭ ايتۋىنشا، تاريحي تۇرعىدا بيلەر ينستيتۋتى ادىلدىك پەن دانالىقتىڭ سيمۆولى بولعانىمەن، قازىرگى تاڭدا بۇل اتاۋدى جامىلعان كەيبىر ۇيىمداردىڭ ارەكەتى قوعامدا الاۋىزدىق تۋدىرۋى مۇمكىن. ول مۇنداي قۇرىلىمداردىڭ كەيدە قۇقىقتىق ماسەلەلەرگە ارالاسىپ، رەسمي مەملەكەتتىك ورگانداردىڭ فۋنكتسيالارىن قايتالاپ جاتقانىن اتاپ ءوتتى.

ساۋالدا ناقتى مىسالدار كەلتىرىلگەن. اتاپ ايتقاندا، ءوزىن «بيلەر القاسى» دەپ تانىستىرعان توپتىڭ داۋلى ارەكەتتەرى، سونداي-اق ليتسەنزياسى جوق ادامنىڭ ءوزىن زاڭگەر رەتىندە تانىستىرىپ، ازاماتتاردى اداستىرۋ فاكتىلەرى قوعامدا رەزونانس تۋدىرعان.

دەپۋتاتتىڭ مالىمەتىنشە، ەلىمىزدە ونداعان «بيلەر» ۇيىمى جۇمىس ىستەيدى جانە ولاردىڭ مۇشەلەرى مىڭداپ سانالادى. الايدا ولاردىڭ قىزمەتىنىڭ قۇقىقتىق شەكاراسى ناقتى ايقىندالماعان.

وسىعان بايلانىستى نارتاي سارسەنعاليەۆ بىرقاتار ۇسىنىس بەردى. اتاپ ايتقاندا، «بيلەر»، «بيلەر كەڭەسى»، «باس بي» اتاۋىن قولداناتىن ۇيىمداردىڭ زاڭ تالاپتارىن ساقتاۋىن تەكسەرۋ; ولاردىڭ مەملەكەتتىك جانە كۆازيمەملەكەتتىك قۇرىلىمداردىڭ فۋنكتسيالارىن قايتالاماۋىن باقىلاۋدى; قۇقىق قورعاۋ ورگاندارىنىڭ قۇزىرەتىنە جاتاتىن ماسەلەلەرگە ارالاسۋىنا جول بەرمەۋدى; قوعام بىرلىگىنە نۇقسان كەلتىرەتىن ۇيىمدارعا قۇقىقتىق باعا بەرۋ.

دەپۋتاتتىڭ پىكىرىنشە، قۇقىقتىق مەملەكەت جاعدايىندا داۋلاردى شەشۋ تەك زاڭ اياسىندا جۇزەگە اسۋى ءتيىس، ال قوعامدىق ۇيىمداردىڭ تورەلىك ايتۋى ەكىۇداي پىكىر قالىپتاستىرۋى مۇمكىن.

Abai.kz