قازىر قوعامنىڭ بولمىسى قاتتى وزگەردى. بۇل الەمدە بولىپ جاتقان كۇردەلى جاعدايلارمەن تىكەلەي بايلانىستى. كەزىندە ناومي حومسكيدى وقىعانىمىزدا، مانيپۋلياتسيانى نەگىزىنەن ساياسي بيلىك جاسايدى دەپ تۇسىندىرىلەتىن. قازىر تەك ولاي ەمەس نەمەسە جاعداي كۇرت وزگەردى.

مانيپۋلياتسيانىڭ كوكەسىن وسى كۇنى قوعام مۇشەلەرى كورسەتىپ، كورىگىن تسيفرلىق ءداۋىر قىزدىرىپ تۇر. كەشەگى دەپۋتات ە.جاڭبىرشينگە قارشا بوراعان قارعىستار مەن بۋللينگتەر سونىڭ بۇلتارتپاس ايعاعى. ال كەيبىر اعايىن اسسالاۋماعالەيكۋم دەسەڭ "نەگە ارمىسىڭ دەمەيسىڭ" دەپ تىرەلەدى نەمەسە تۋرا كەرىسىنشە.

قوعام ءتۇرلى شابلوندار مەن شتامپتارعا جاتىپ العان. ويلانۋ جوق، تىز ەتپە سەزىمدى باۋراپ الاتىن دايىن كالكالار راتسيونى تالاق ەتۋدە. الەۋمەتتىك جەلى ءتۇرلى پسيحولوگيالىق تەرميندەردەن اياق الىپ جۇرگىسىز. انتالاپ تۇرعان ايىپتاۋشى، كۇستانالاۋشى، كىنا ارتۋشى قوعام. پسيحولوگيزم.

قازىرگى ادام - ءومىر سۇرگەنى ءۇشىن اپريوري كىنالى. بۇل حريستياندىق مادەنيەتتەن باستاۋ الاتىن كۇنادان ارىلۋ ءۇشىن ءومىر سۇرەتىن ءدىني-ەكزيستەنتسيونالدىق ماسەلە (بىزگە نەگىزى قاتىسى جوق!). ءبىز بولساق قوساق اراسىندا كەتىپ ادامنىڭ ازات باسىن تۇقىرتىپ، جاسامپاز ەركىن مۇقالتىپ جاتقاندايمىز. فيزيكالىق تا، مەتافيزيكالىق تا ماعىنادا "قارىز قوعام" قۇرۋدامىز. يپوتەكا، كرەديت، كاسپي رەدتەر بەر جاعى، "ەركەك بولىپ تۋعانىڭ ءۇشىن كىنا", "لگبت-عا قارسى شىعىپ، وتباسى قۇندىلىعىن قولداعانىڭ ءۇشىن كىنا", "ۇيات بولادى كۋلتىنە نەگىزدەلگەن مادەنيەت وكىلى بولعانىڭ ءۇشىن كىنا" ("د.ساتپاەۆتىڭ ۇياتمەنىن قاراڭىز), ەندى مىنە وسىلارعا "يتتەردىڭ ەۆتانازياسىن تالاپ ەتكەن قوعام مۇشەسى بولعانىڭ ءۇشىن كىنا" قوسىلۋدا. قىسىم سۇمدىق.

ادامدى تۋعاننان ءبىر نارسەگە قارىزدار نەمەسە ايىپتى ەتىپ قويۋ مانيپۋلياتسيانىڭ اتاسىنا اينالدى.

زاماناۋي ءمانيپۋلياتيۆتى قوعامدا سەنىڭ «ءيا» نەمەسە «جوق» دەپ جاۋاپ بەرگەنىڭ ماڭىزدى ەمەس. ماقسات - ادامدى ۇنەمى قورعانىس پوزيتسياسىندا ۇستاۋ. ادام ءوزىن ۇنەمى اقتاۋمەن، كىنالى ەمەس ەكەنىن دالەلدەۋمەن اينالىسقاندا، ونىڭ سىني ويلاۋعا، شىنايى ساياسي نەمەسە فيلوسوفيالىق ماسەلەلەردى تالداۋعا كۇشى قالمايدى.

ءتىپتى وزىڭە كۇماندانۋىڭ سونشالىق، ءتول مادەنيەتىڭنەن جەرىپ، ساناسى جۋىلعان ماڭگۇرت بولۋ عانا قالعانداي سەزىنەسىڭ. ادامداردىڭ مادەني قۇقىعى ەلەپ-ەسكەرىلمەۋدە. ال بۇل ادام قۇقىقتارىنىڭ زاماناۋي IV كەزەڭىنە جاتاتىن قۇندىلىقتار. ماسەلە سوندا، بۇعان مەملەكەت ەمەس، قاتارداعى قوعام مۇشەلەرى قول سۇعىپ وتىر.

ءبىز ءبىر قوعامدا ءومىر ءسۇرىپ وتىرعاندىقتان، ونىڭ باسقا دا مۇشەلەرىنىڭ قۇقىقتارى مەن بوستاندىقتارىنا بەي-جاي قاراماۋعا ءتيىسپىز. ويتكەنى ءبىز دە باسقا كەڭىستىك جوق. قوعامدىق مۇددە دەگەن ۇعىمدى قايتا قاراۋ جانە ونى زاڭمەن قورعاۋ قاجەتتىلىگى تۋىنداپ وتىر.

ءبىرتۇتاس قوعام يدەولوگەماسى ناسيحاتتالۋى ءتيىس. بۇل قالىپتاسىپ وتىرعان الەۋمەتتىك ديكتاتۋرادان، سونىڭ ىشىندە ازشىلىقتىڭ مانيپۋلياتسياسىنان ساقتانۋدىڭ باستى قۇرالى بولۋشى ەدى.

قازىبەك ءداۋىتالى، ساياساتتانۋشى

Abai.kz