ۋكرايناداعى كامەنسكوە قالاسىندا تۇرعان نۇرسۇلتان نازارباەۆتىڭ بارەلەفىن الىپ تاستاۋدان باس تارتتى.

ۋكراينانىڭ ۇلتتىق جادى ينستيتۋتى بۇل نىساندا تىيىم سالىنعان ءرامىز جوق دەپ تاۋىپ، ونى دەكوممۋنيزاتسيا جانە «رەسەيلىك يمپەريالىق ساياسات» تۋرالى زاڭدارعا جاتقىزباعان. بارەلەف 2005 جىلى ورناتىلعان، ول نازارباەۆ 1958-1960 جىلدارى وقىعان وقۋ ورنىنىڭ قابىرعاسىندا تۇر.

زاڭنىڭ تار شەڭبەرىمەن قاراسا، كيەۆتىڭ ءۋاجى تۇسىنىكتى بولۋى مۇمكىن. بىراق تاريحي جانە ساياسي ءمان جاعىنان بۇل شەشىم ءالسىز كورىنەدى. نازارباەۆ جاي عانا سول عيماراتتا وقىعان بۇرىنعى ستۋدەنت ەمەس. ول پوستكەڭەستىك اۆتوريتارلىق جۇيەنىڭ ەڭ تانىمال سيمۆولىنىڭ ءبىرى بولدى.

ونىڭ ۇستىنە 2014 جىلى نازارباەۆ پۋتينگە رەسەيدىڭ ۋكرايناداعى ارەكەتىنىڭ «لوگيكاسىن تۇسىنەتىنىن» ايتقان. سول جىلى ول پۋتينمەن بىرگە ەۋرازيالىق ەكونوميكالىق وداق تۋرالى شارتقا دا قول قويعان ەدى. وسىنداي ساياسي ءىزدى بىلە تۇرا، ونى بەيتاراپ تۇلعاداي قالدىرۋ قيسىنسىز.

ۋكراينا قازىر ءوز كەڭىستىگىن كەڭەستىك جانە يمپەريالىق كولەڭكەدەن تازارتۋعا تىرىسىپ وتىر. وسىنداي كەزەڭدە پۋتينمەن تىم جاقىن جۇرگەن، ماسكەۋدىڭ ينتەگراتسيالىق جوبالارىمەن قاتار جۇرگەن نازارباەۆقا قاتىستى قۇرمەت بەلگىسىن ساقتاپ قالۋ ەكىۇشتى اسەر بەرەدى. ماسەلە بارەلەفتە بالعا مەن وراقتىڭ بار-جوعىندا عانا ەمەس. ماسەلە – ول نىسان كىمنىڭ اتىن، قانداي ساياسي ءداۋىردى، قانداي بايلانىستاردى ەسكە سالاتىنىندا.

سوندىقتان بارەلەفتى بۇرىنعى ورنىندا قالدىرۋدان گورى، ونى الىپ تاستاپ، قاجەت بولسا مۋزەيگە نە ارحيۆتىك كەڭىستىككە كوشىرۋ الدەقايدا ورىندى شەشىم بولار ەدى. سوندا تاريح تا جوعالمايدى، بىراق وعان قۇرمەت كورسەتۋ رەڭكى دە ساقتالمايدى. ۋكراينا ءۇشىن ءدال قازىر ماڭىزدىسى – زاڭداعى فورمالدى تارماققا عانا سۇيەنۋ ەمەس، سوعىس جاعدايىنداعى ساياسي جانە مورالدىق سالماقتى دا دۇرىس تارازىلاۋ.

Abai.kz